ບັນດາໄອຍະການຂອງ Belgium ກ່າວວ່າ ສາມຄົນໄດ້ຖືກກັກ
ຂັງ ໃນການປະຕິບັດງານ ຕໍ່ຕ້ານການກໍ່ການຮ້າຍ ຢູ່ທີ່ນະຄອນ
Brussels. ບັນດາເຈົ້າໜ້າທີ່ກ່າວວ່າ ການບຸກເຂົ້າໄປກວດຄົ້ນ
ໄດ້ມີຂຶ້ນໃນວັນພະຫັດ ຫຼັງຈາກການຈັບກຸມຜູ້ຊາຍຝຣັ່ງຄົນໜຶ່ງ
ໃນນະຄອນປາຣີ ທີ່ສົງໄສວ່າພວມວາງແຜນການໂຈມຕີຄັ້ງໃໝ່.
ຫ້ອງການໄອຍະການຍັງກ່າວອີກວ່າ ເຈົ້າໜ້າທີ່ສືບສວນໄດ້ໃຊ້
ການກວດສອບ DNA ເພື່ອພິຈາລະນາເບິ່ງວ່າ ທ້າວ Naijim
Laachraoui ແມ່ນຜູ້ໜຶ່ງໃນການໂຈມຕີສະລະຊີບທີ່ໄດ້ບີບຄະ
ນວນລະເບີດສັງຫານຕົນເອງຢູ່ສະໜາມບິນນະຄອນ Brussels
ໃນວັນອັງຄານທີ່ຜ່ານມາຫລືບໍ່ ແລະເຈົ້າໜ້າທີ່ກ່າວວ່າ ສະໜາມບິນດັ່ງກ່າວຈະເປີດຄືນອີກໃນວັນອັງຄານຈະມານີ້.
ເຈົ້າໜ້າທີ່ອະວຸໂສສະຫະລັດທ່ານນຶ່ງ ໃຫ້ການຢືນຢັນວ່າ ມີຊາວອາເມຣິກັນ 2 ຄົນຮວມຢູ່ໃນພວກທີ່ເສຍຊີວິດໄປຫລາຍກວ່າ 30 ຄົນນັ້ນ.
ທ້າວ Laachraoui ຍັງໄດ້ພົວພັນກັບການໂຈມຕີທີ່ນະຄອນປາຣີເມື່ອວັນທີ 13 ເດືອນພະຈິກປີກາຍ ທີ່ເຮັດໃຫ້ 130 ຄົນເສຍຊີວິດ. DNA ຂອງລາວໄດ້ພົບເຫັນຢູ່ເສື້ອໃສ່ລະເບີດສະລະຊີບແລະຊິ້ນສ່ວນຂອງຜ້າທີ່ພົບເຫັນຢູ່ບ່ອນສະແດງ ຄອນເຊີດ Bataclan ບ່ອນທີ່ 90 ຄົນໄດ້ເສຍຊີວິດ.
ລັດຖະມົນຕີຕ່າງປະເທດ ສະຫະລັດ ທ່ານ John Kerry ໄດ້ໄປຢ້ຽມນະຄອນ Brussels
ໃນວັນສຸກວານນີ້ ເພື່ອສົນທະນາຫາລືກັບ ບັນດາຜູ້ນຳ Belgium ແລະພວກຜູ້ນຳຢູໂຣບ
ກ່ຽວກັບການໂຈມຕີດັ່ງກ່າວ. ໃນລະຫວ່າງການຢ້ຽມຢາມຂອງທ່ານນັ້ນ ທ່ານໄດ້ກ່າວວ່າ
ສະຫະລັດ ແລະບັນດາສະມາຊິກແນວໂຮມ ຂໍ ເຕືອນບຸກຄົນໃດກໍຕາມ ຜູ້ທີ່ສັງຫານແລະເຮັດໃຫ້ພົນລະເຮືອນ ທີ່ໄຮ້ດຽງສາໄດ້ຮັບບາດເຈັບ ທີ່ກຳລັງດຳລົງຊີວິດປະຈຳວັນ ຂອງ
ເຂົາເຈົ້າຢູ່ນັ້ນວ່າ “ພວກເຮົາຈະບໍ່ໄດ້ຮັບການຂັດຂວາງ. ພວກເຮົາຈະກັບຄືນມາພ້ອມກັບການຕົກລົງໃຈ ທີ່ຍິ່ງໃຫຍ່ກວ່າເກົ່າ ພ້ອມດ້ວຍຄວາມເຂັ້ມແຂງ ແລະພວກເຮົາ ຈະບໍ່ຢຸດ
ເຊົາຈົນກວ່າພວກ ເຮົາໄດ້ກຳຈັດຄວາມເຊື່ອຖື ໃນການທຳລາຍລ້າງ ແລະຄວາມຂີ້ຂາດ
ຕາຂາວໃຫ້ສິ້ນຊາກໄປຈາກໜ້າໂລກມະນຸດເຮົາ.”
