ມີການຢືນສະງົບສະຕິອາລົມຊົ່ວຂະນະນຶ່ງ ທີ່ເມືອງ Manchester ໃນຕອນເຊົ້າ
ວັນພະຫັດມື້ນີ້ ເພື່ອໄວ້ອາໄລ ໃຫ້ແກ່ພວກເຄາະຮ້າຍ ໃນການໂຈມຕີດ້ວຍລະເບີດ
ສະຫລະຊີບ ໃນວັນຈັນຜ່ານມານີ້ ຫຼັງຈາກງານສະແດງດົນຕີປ໊ອປ ໄດ້ຈົບລົງແລ້ວນັ້ນ.
ປະຊາຂົນໃນເມືອງດັ່ງກ່າວ ໄດ້ພາກັນໄປເຕົ້າໂຮມກັນ ໃນວົງວຽນໃຫຍ່ ທີ່ຈະຕຸລັດ
St. Ann ເພື່ອໄວ້ອາໄລ ໂດຍພາກັນກົ້ມຫົວ ຢູ່ຕໍ່ໜ້າບ່ອນວາງພວງມາລາ ດອກໄມ້
ໝາກປູມເປົ້າ ແລະທຽນ ເພື່ອເປັນຂອງທີ່ລະລຶກ ຕໍ່ພວກເຄາະຮ້າຍ 22 ຄົນ ທີ່ໄດ້ເສຍ
ຊີວິດ ເວລາທ້າວ Salman Abedi ໄດ້ບີບຄະນວນລະເບີດໃຫ້ແຕກຂຶ້ນ ພຽງບໍ່ເທົ່າໃດ
ນາທີ ຫຼັງຈາກຄອນເຊີດ ຂອງນັກຮ້ອງປ໊ອປ Ariana Grande ໄດ້ຈົບລົງນັ້ນ.
ບໍ່ດົນຫຼັງຈາກພິທີໄວ້ອາໄລ ໄດ້ຈົບລົງແລ້ວນັ້ນ ພະລາຊີນີ Elizabeth ກໍສະເດັດໄປຮອດໂຮງພະຍາບານເດັກນ້ອຍ ທີ່ເມືອງ Manchester ເພື່ອທຳການຢ້ຽມຢາມສ່ວນນຶ່ງ ຂອງ
64 ຄົນ ທີ່ໄດ້ຮັບບາດເຈັບແລະຮັກສາປິ່ນປົວຢູ່ທີ່ນັ້ນ. ໃນຈຳນວນພວກເຄາະຮ້າຍນີ້
ສ່ວນໃຫຍ່ແມ່ນເປັນພວກເດັກນ້ອຍ.
ເວລານີ້ ມີຜູ້ຊາຍ 8 ຄົນ ໄດ້ຖືກຄຸມຂັງ ຢູ່ໃນການຄວບຄຸມຂອງພວກຕຳຫຼວດແລ້ວ
ທີ່ພົວພັນກັບເຫດລະເບີດໃນວັນຈັນຜ່ານມານີ້ ຊຶ່ງຮວມມີຊາຍ 2 ຄົນ ທີ່ຖືກຈັບກຸມ
ໂດຍ ພວກຕຳຫຼວດຂອງເທດສະບານເມືອງ Manchester ໃນການເຂົ້າບຸກເຂົ້າກວດຄົ້ນ
ໃນທີ່ມີຂຶ້ນຕ່າງຫາກ ໃນເຊົ້າວັນພະຫັດມື້ນີ້. ມີແມ່ຍິງຄົນນຶ່ງ ໄດ້ຖືກຈັບກຸມ ໃນວັນພຸດ
ວານນີ້ ໃນການບຸກເຂົ້າໄປກວດຄົ້ນຫໍພັກແຫ່ງນຶ່ງ ທາງພາກເໜືອຂອງເມືອງ
Manchester ໄດ້ຖືກປ່ອຍຕົວແລ້ວ.
ຕຳຫຼວດ ບໍ່ໄດ້ໃຫ້ຂໍ້ມູນຫຍັງກ່ຽວກັບ ພວກທີ່ຖືກຈັບກຸມນີ້ວ່າ ມີການພົວພັນກັບເຫດ
ລະເບີດແນວໃດ. ໃນການຖະແຫຼງທາງໂທລະພາບ ນາຍົກລັດຖະມົນຕີອັງກິດທ່ານນາງ Theresa May ໄດ້ປະກາດວ່າ ການຂົ່ມຂູ່ຂອງການກໍ່ການຮ້າຍນີ້ ທີ່ອັງກິດ ຍັງຢູ່ໃນ
ລະດັບສູງ.
ພໍ່ຂອງທ້າວ Abedi ແລະນ້ອງຊາຍຂອງລາວ ຖືກຈັບກຸມໂດຍກອງກຳລັງຮັກສາຄວາມ
ປອດໄພລີເບຍ. ໂຄສົກຂອງໜ່ວຍຕໍ່ຕ້ານພວກກໍ່ການຮ້າຍລີເບຍ ໄດ້ກ່າວວ່າ ນ້ອງຂອງ
ລາວ ທ້າວ Hashim Abedi ແມ່ນໄດ້ຕິດຕໍ່ກັບທ້າວ Salman ແລະຮູ້ເຖິງການວາງແຜນ
ໂຈມຕີໃນຄັ້ງນີ້.
ພໍ່ຂອງທ້າວ Abedi, ທ້າວ Ramadan ໄດ້ບອກກັບອົງການຂ່າວ Reuters ວ່າ ລາວໄດ້
ໂອ້ລົມກັບລູກຊາຍຂອງລາວ ເມື່ອ 5 ມື້ກ່ອນ ແລະວ່າທຸກສິ່ງຢ່າງ “ແມ່ນເປັນປົກກະຕິ.”
ອ່ານຂ່າວນີ້ເພີ້ມຕື່ມເປັນພາສາອັງກິດ
