ເຈົ້າຂອງສະໂມສອນກິລາເຕະບານແລັສເຕີ ຊີຕີຂອງ ສະຫະພັນ Premier League
ຂອງອັງກິດແມ່ນນຶ່ງໃນ 5 ຄົນທີ່ເສຍຊີວິດໄປ ພາຍຫລັງທີ່ເຮືອບິນເຮລິຄອບເຕີຂອງທ່ານ
ຕົກ ແລ້ວເກີດໄຟໄໝ້ ຢູ່ນອກສະໜາມກິລາພາຍໃນເວລາບໍ່ພໍເທົ່າໃດ ພາຍຫລັງທີ່ເຮືອ
ບິນລຳນັ້ນບິນຂຶ້ນໄປ ໃນວັນເສົາຜ່ານມາ.
ພ້ອມໆກັບທ່ານວິໄຊ ສຣີວັດທະນະປຣະພາ ນັກທຸລະກິດເສດຖີເງິນຕື້ໂດລາ ທີ່ມີອາຍຸ 60
ປີນັ້ນ ມີພະນັກງານຂອງທ່ານ ວິໄຊ 2 ຄົນ ຄືທ່ານ ເນີຊາຣາ ສຸກນາໄມ ແລະກາວິພົນ ພູນ
ແປະ ແລະນັກບິນ ເອຣິກ ສແວັຟເຟີ ແລະນາວ ວິສແບລລາ ໂຣຊາ ເລກໂຄວິກສ໌ ທີ່ເປັນ
ຄົນໂດຍສານໃນເຮືອບິນລຳນັ້ນ ກໍໄດ້ ເສຍຊີວິດໄປ ໃນຂະນະທີ່ມັນລົງຈອດໃນເດີ່ນຈອດ
ລົດໃກ້ໆກັບສະໜາມກິລາ King Power ຫລັງຈາກສິ້ນສຸດການແຂ່ງຂັນກິລາເຕະບານ
ໃນຕອນກາງຄືນນັ້ນ.
ສະໂມສອນແລັສເຕີຊີຕີ ກ່າວຢູ່ໃນຄຳຖະແຫລງການສະບັບນຶ່ງວ່າ “ໂລກໄດ້ສູນເສຍ
ຊາຍທີ່ດີເລີດໄປ. ຊາຍທີ່ໃຈດີ, ມີໃຈກວ້າງ ແລະມີຊີວິດທີ່ເຕັມໄປດ້ວຍຄວາມຮັກແພງ ທີ່
ທ່ານອຸທິດໃຫ້ແກ່ຄອບຄົວ ແລະຜູ້ອື່ນທີ່ທ່ານໄດ້ໃຫ້ການນຳພາຢ່າງມີຜົນສຳເລັດ.”
ທ່ານວິໄຊ ທີ່ເປັນເຈົ້າຂອງຮ້ານຂາຍເຄື່ອງປອດພາສີ King Power ຍັກໃຫຍ່ຂອງໄທ ໃຫ້
ເງິນທຶນແກ່ສະໂມສອນໄລແຊັສເຕີ ເຮັດໃຫ້ໄດ້ຮັບໄຊຊະນະໃນສະຫະພັນກິລານັ້ນ ໃນປີ
2016.
ທ່ານໄດ້ຊື້ເອົາສະໂມສອນແລັສເຕີ 50 ລ້ານໂດລາ ໃນປີ 2010 ເມື່ອມັນໄດ້ທີສອງໃນ
ການແຂ່ງຂັນ ແລະໄດ້ພຳພາມັນນຳໜ້າຄູ່ແຂ່ງທີ່ມີຄວາມເຂັ້ມແຂງສຸດ ຍາດໄຊຊະນະໄດ້
ໃນກິລາດັ່ງກ່າວ.
ທ່ານວິໄຊໄດ້ໃຫ້ລາງວັນອັນງາມແກ່ ພວກນັກກິລາ ທີ່ຊະນະການແຂ່ງຂັນເຕະບານ
Premier League ໂດຍການເຊັນສັນຍາແບບຄ້ຳປະກັນ. ນອກນັ້ນ ທ່ານກໍໄດ້ຊື້ລົດ
BMWi8 ໃຫ້ແກ່ນັກກິລາແຕ່ລະຄົນ 1 ຄັນ ຊຶ່ງມີມູນຄ່າ 1 ແສນ 35 ພັນໂດລາ ລວມ
ທັງຊື້ ໃຫ້ຜູ້ຮັບບານຢູ່ປະຕູ ທ່ານ ແຄວເປີ ສໄມແຊລ ນັ້ນນຳ.
ທ່ານວິໄຊ ທີ່ໄດ້ເລີ້ມຕົ້ນເຮັດທຸລະກິດຂອງຕົນໂດຍມີຮ້ານຂາຍເຄື່ອງພຽງຮ້ານດຽວ ແລ້ວ
ເຕີບໂຕຂຶ້ນເປັນຮ້ານປອດພາສີ King Power ທີ່ມີສາຂາຫລາຍແຫ່ງນັ້ນ ເປັນທີ່ຮູ້ກັນວ່າ
ທ່ານໄດ້ມາເຖິງ ແລະອອກຈາກສະໜາມກິລາໄປໃນເຮືອບິນເຮລິຄອບເຕີສ່ວນຕົວຂອງທ່ານ.
ສະໜາມກິລາຂອງສະໂມສອນແລັສເຕີຕັ້ງຢູ່ພາກກາງຂອງອັງກິດ ຊຶ່ງຫ່າງຈາກນະ
ຄອນຫລວງລອນດອນປະມານ 143 ກິໂລແມັດ.
