ນາຍ​ທະນາຄານ ຊາວ​ອັງກິດ ພົບເຫັນວ່າ ມີສະພາບດີ ທີ່ຈະດຳເນີນຄະດີ ຄາຕະກຳໄດ້ ໃນຮົງກົງ

ສານ​ຮົງ​ກົງ​ແຫ່ງ​ນຶ່ງ ​ໄດ້​ມີ​ຄຳ​ເຫັນ ວ່າ ນາຍ​ທະນາຄານ ຊາວ​ອັງກິດ
ຜູ້​ຖືກ​ກ່າວ​ຫາ ຂ້າ​ຜູ້ຍິງ​ຊາວ​ອິນ​ໂດ​ເນ​ເຊຍ ສອງ​ຄົນ ​ແມ່ນ​ມີ​
ສະພາບ​ດີ ທີ່​ຈະໃຫ້ການ​ດຳ​ເນີນ​ຄະດີ ຫຼັງຈາກ ​ທີ່​ໄດ້​ຜ່ານ​ການ
ກວດ​ສອບ ຂອງ​ຈິດຕະ​ແພດ​ແລ້ວ.

​ຜູ້​ພິພາກສາ ຍັງ​ໄດ້ເລື່ອນ​ການ​ໄຕ່​ສວນ​ໃນ​ຂັ້ນຕົ້ນ ​ຄະດີຄວາມ
ຂອງ ທ່ານ Rurik Jutting ​ໄປ​ຈົນ​ກວ່າ​ ວັນ​ທີ 6 ​ເດືອນ ກໍລະກົດ
​ເພື່ອ​ທີ່​ຈະ​ໃຫ້ບັນດາໄອ​ຍະການ ມີ​ເວລາຫຼາຍຂຶ້ນ​ຕື່ມ ​ໃນ​ການ
ກວດ​ສອບຫຼັກຖານ.

ທ່ານ Jutting ຜູ້​ທີ່​ໄດ້​ເຮັດ​ວຽກ ​ໃຫ້ ບໍ​ລິ​ສັດ Bank of America ຢູ່
​ໃນ​ຮົງ​ກົງ ຖືກ​ຈັບ​ກຸມ ​ເມື່ອ​ຕົ້ນ​ເດືອນ​ນີ້ ຫຼັງຈາກ​ທີ່​ເຈົ້າໜ້າ​ທີ່​ຕຳຫລວດ ພົບ​ສົບ​ຂອງ​ຜູ້ຍິງ​
ສອງ​ຄົນ​ ຢູ່​ໃນ​ເຮືອນພັກ​ ຂອງ​ລາວ. ສົບ​ນຶ່ງ ຖືກ​ຍັດ​ເຂົ້າ​ໄວ້​ໃນ​ຫີບ​ເດີນທາງ ຢູ່​ລະບຽງ
​ຂອງ​ລາວ.

ທ່ານ Jutting ຍັງ​ບໍ່​ທັນ ​ໃຫ້​ການ​ຮັບສາລະພາບ​ໃດໆຕໍ່​ສານ. ລາວ ຈະ​ຍັງ​ຢູ່​ໃນ​ການ​ຄຸ້ມ​ຄອງ ​ຂອງ​ເຈົ້າໜ້າ​ທີ່ ຈົນ​ກວ່າ ການ​ດຳ​ເນີນ​ຄະດີ ຂອງ​ລາວ ຕໍ່​ໄປ​ໃນ​ເດືອ​ນກໍລະກົດ​ເສຍ​ກ່ອນ.