ໃນວັນອາທິດວານນີ້ ທີ່ສະໜາມບິນ Heathrow ຄົນໂດຍສານຂອງສາຍການບິນ
British Airways ຍັງສືບຕໍ່ປະເຊີນກັບການຫລ້າຊ້າ, ການຍົກເລີກຖ້ຽວບິນ, ແລະ
ຄວາມແອອັດ ໃນຂະນະທີ່ສາຍການບິນດັ່ງກ່າວປະສົບກັບບັນຫາຄອມພີວເຕີຕິດຂັດ.
ສາຍການບິນນີ້ເວົ້າວ່າ ຖ້ຽວບິນທີ່ໄປໄລຍະໄກທັງໝົດ ຍັງຈະສືບຕໍ່ດໍາເນີນໄປໄດ້ຢູ່
ໃນວັນອາທິດວານນີ້ ຫາກແຕ່ວ່າ ເພື່ອຫລີກລ່ຽງຄວາມແອອັດເກີນໄປເພີ້ມຂຶ້ນອີກ
ຄົນໂດຍສານຈະໄດ້ຮັບອະນຸຍາດໃຫ້ເຂົ້າໄປໃນອາຄານສະໜາມບິນໄດ້ ເປັນເວລາ
90 ນາທີ ກ່ອນຖ້ຽວບິນຈະເລີ້ມ ເທົ່ານັ້ນ.
ທ່ານ executive Alex Cruz ຫົວໜ້າດ້ານບໍລິຫານຂອງສາຍການບິນ ກ່າວວ່າ ຄົນໂດຍ
ສານຍັງຄວນຄາດເອົາໄວ້ອີກວ່າ ອາດຈະມີການຫລ້າຊ້າ ແລະ ການຍົກເລີກຖ້ຽວ
ບິນສໍາລັບຖ້ຽວບິນທີ່ບິນໄລຍະໃກ້ ແລະກ່າວເພີ້ມອີກວ່າ ສາຍການບິນຢູ່ໃນສະພາບ
ທີ່ປະຕິບັດງານໄດ້ "ເກືອບເຕັມສ່ວນແລ້ວ" ໃນວັນອາທິດ ວານນີ້.
ທ່ານ Cruz ເວົ້າວ່າ "ຂ້າພະເຈົ້າຮູ້ວ່າ ນີ້ເປັນໄລຍະເວລາທີ່ບໍ່ດີຫລາຍ ສໍາລັບລູກຄ້າ"
ແລະກໍໄດ້ກ່າວຂໍໂທດໃນບົດຖະແຫລງທີ່ອອກໃນວີດິໂອ ແລະເອົາລົງໃສ່ໃນອິນເຕີ
ເນັດໄວ້.
ສາຍການບິນຖືກບັງຄັບໃຫ້ຍົກເລີກຖ້ຽວບິນໃນວັນເສົາຜ່ານມາ ທີ່ສະໜາມບິນ Heathrow ແລະສະໜາມບິນ Gatwick ໃນຂະນະທີ່ພວກນັກຊ່ຽວຊານພະຍາຍາມແກ້ໄຂບັນຫາຕິຂັດ
ຂອງຄອມພີວເຕີ.
ສາຍການບິນ British Airways ບໍ່ໄດ້ເວົ້າວ່າ ສາຍເຫດທີ່ພາໃຫ້ຕິດຂັດແມ່ນຫຍັງ ແຕ່
ກໍໄດ້ລາຍງານວ່າ ບໍ່ໄດ້ມີຫລັກຖານໃດໆ ສະແດງໃຫ້ເຫັນວ່າ ມີການໂຈມຕີທາງອິນເຕີ
ເນັດແຕ່ຢ່າງໃດ.
ການຕິດຂັດຂອງເຄື່ອງຄອມພີວເຕີທີ່ເກີດຂຶ້ນໂດຍສະເພາະໃນວັນພັກທ້າຍອາທິດ ທີ່ມີ
ມື້ພັກຕໍ່ໃສ່ກັນໃນວັນຈັນ ແລະໃນຂະນະທີ່ເດັກນ້ອຍເລີ້ມພັກກາງເທີມ ໄດ້ເຮັດໃຫ້ຄົນ
ໂດຍສານທີ່ ຄ້າງຢູ່ສະໜາມບິນ ສະແດງຄວາມຫງຸດຫງິດອອກມາທາງອອນລາຍຢູ່ໃນ Twitter.
