ລັດຖະມົນຕີປ້ອງກັນປະເທດ ອັງກິດ ທ່ານ Michael Fallon ໄດ້ ກ່າວໃນວັນຈັນວານນີ້ວ່າ ທ່ານກຳລັງສົ່ງພວກຝຶກແອບຈຳນວນ 20 ຄົນໄປປະເທດ ຕູນີເຊຍ ເພື່ອຊ່ວຍປ້ອງກັນ ບໍ່ໃຫ້ຄົນລັກລອບເຂົ້າ ປະເທດຢ່າງຜິດກົດໝາຍ ຈາກປະເທດ ລີເບຍ ທີ່ຢູ່ໃກ້ຄຽງນັ້ນ.
ພວກນັກຮົບລັດ ອິສລາມ ໄດ້ຂະຫຍາຍການເຂົ້າໄປມີໜ້າຂອງ ພວກເຂົາເຈົ້າຢູ່ໃນປະເທດ ລີເບຍ ໃນຂະນະທີ່ສອງລັດຖະບານຄູ່ ແຂ່ງບໍ່ສາມາດບັນລຸຄວາມພະຍາຍາມ ໃນການທີ່ຈະລວມເຂົ້າກັນ ແລະສ້າງ ຕັ້ງອຳນາດການປົກຄອງກາງ ເພື່ອຍຶດຄືນເຂດແດນ ຈາກພວກຫົວຮຸນແຮງ. ສິ່ງດັ່ງກ່າວໄດ້ກໍ່ໃຫ້ມີຄວາມເປັນຫ່ວງ ກ່ຽວ ກັບ ພວກລັດອິສລາມ ເປີດການໂຈມຕີຈາກປະເທດ ລີເບຍ ແລະ ໃຊ້ເຂດຊາຍແດນເພື່ອເດີນທາງເຂົ້າປະເທດ ຕູນີເຊຍ, ເຊິ່ງປະເທດດັ່ງກ່າວໄດ້ປະສົບກັບການ ໂຈມຕີດ້ວຍອາວຸດປືນ ແລະ ລະເບີດຢ່າງຮ້າຍແຮງ ໂດຍເພັ່ງເລັງໃສ່ບັນດານັກທ່ອງ ທ່ຽວ ແລະ ເຈົ້າໜ້າທີ່ລັດຖະບານ.
ທ່ານ Fallon ໄດ້ກ່າວຕໍ່ສະພາແຫ່ງຊາດວ່າ ອັງກິດ ແມ່ນພ້ອມແລ້ວທີ່ຈະສະ ໜອງການຝຶກແອບ ແລະ ການຊີ້ນຳທາງການທະຫານຕໍ່ ລີເບຍ, ແຕ່ປະຈຸບັນຍັງ ບໍ່ມີແຜນການທີ່ຈະສົ່ງ ທະຫານພາກພື້ນດິນເພື່ອໄປປະຕິບັດການຕໍ່ສູ້ໃນປະ ເທດດັ່ງກ່າວ.
ທ່ານໄດ້ສະແດງຄວາມເປັນຫ່ວງ ກ່ຽວກັບ ການຂະຫຍາຍຕົວຂອງພວກ ລັດອິສລາມ ຕາມເຂດຊາຍຝັ່ງຂອງປະເທດ ລີເບຍ ແລະ ໄດ້ກ່າວວ່າ ຍ້ອນແນວນັ້ນ ອັງກິດ ຈຶ່ງ “ກຳລັງໃຫ້ ການຊ່ວຍເຫຼືອ ໃນການສ້າງຕັ້ງລັດຖະບານໃໝ່ ລີເບຍ ຢ່າງຮີບດ່ວນ.”
