ເຈົ້າໜ້າທີ່ຕໍາຫລວດເວົ້າວ່າ ຜູ້ຊາຍສາມຄົນໄດ້ຖືກຈັບກຸມໃນຂະນະທີ່ມີການກວດ
ຄົ້ນບ້ານເຮືອນຫລາຍໆບ່ອນໃນວັນພຸດຜ່ານມາ ຢູ່ທາງທິດຕາເວັນອອກຂອງນະ
ຄອນລອນດອນ ຍ້ອນຖືກສົງໄສວ່າໄດ້ດໍາເນີນການໃນຂັ້ນສຸດທ້າຍຂອງການວາງ
ແຜນໂຈມຕີໂດຍການກໍ່ການຮ້າຍ ຢູ່ນະຄອນຫລວງຂອງອັງກິດ ທີ່ມີລັກສະນະຄ້າຍ
ກັນກັບການກໍ່ຄວາມຮຸນແຮງສັງຫານຄົນທີ່ໄດ້ດໍາເນີນໄປໃນວັນເສົາແລ້ວນີ້ ທີ່ຂົວ
ລອນດອນ.
ຕໍາຫລວດເວົ້າອີກວ່າ ພວກຜູ້ຊາຍດັ່ງກ່າວທີ່ມີອາຍຸ 30 ປີກວ່າ ບໍ່ໄດ້ມີການພົວພັນ
ກັບການໂຈມຕີທີ່ມີຄົນອອກຈາກລົດຕູ້ ແລະການໃຊ້ມີດແທງຄົນຍ່າງໃນວັນທ້າຍ
ອາທິດແລ້ວນີ້ ຢູ່ເທິງຂົວລອນດອນ ແລະຢູ່ເມືອງ Borough ຂອງນະຄອນຫລວງ
ທີ່ໄດ້ເຮັດໃຫ້ 8 ຄົນເສຍຊີວິດ ແລະ 48 ຄົນໄດ້ຮັບບາດເຈັບນັ້ນແຕ່ຢ່າງໃດ.
ຂ່າວກ່ຽວກັບການຈັບກຸມດັ່ງກ່າວ ແມ່ນຖືກເຜີຍແຜ່ອອກມາໃນຂະນະທີ່ມີພາບວີດິໂອ
ສະແດງໃຫ້ເຫັນວ່າຕໍາຫລວດໄດ້ຍິງພວກໂຈມຕີຢູ່ຂົວລອນດອນໃນວັນເສົາແລ້ວນີ້.
ມັນສະແດງໃຫ້ເຫັນວ່າ ພວກເຈົ້າໜ້າທີ່ໂດດອອກຈາກລົດຕໍາຫລວດທີ່ກໍາລັງແລ່ນໄປ
ຢູ່ ເພື່ອຍິງຜູ້ຊາຍດັ່ງກ່າວ ພາຍໃນເວລາບໍ່ພໍເທົ່າໃນວິນາທີ ຫລັງເກີດເຫດອັນສະ
ຫຍອງຂັວນນັ້ນ ຊຶ່ງ ໄດ້ເຮັດໃຫ້ການຂ້າຄົນແບບເປັນກຸ່ມໃຫຍ່ທີ່ດໍາເນີນໄປເປັນເວລາ
ແປດນາທີ່ນັ້ນ ສິ້ນສຸດລົງ. ພາບວີດິໂອ ທີ່ຖ່ຍທໍາໂດຍຄົນທີ່ອາໄສຢູ່ເຂດນັ້ນ ໄດ້ຖືກນໍາ
ສົ່ງຕໍ່ກັນ ແລະສາຍຢູ່ທົ່ວເວັບໄຊ ຂອງສື່ສັງຄົມອອນລາຍ.
ພາບວີດິໂອ ອັນອື່ນອີກກໍປະກົດໃຫ້ເຫັນວ່າ ພວກໂຈມຕີຢູ່ຂົວລອນດອນ 3 ຄົນ ຄືທ້າວ
Khuram Shazad Butt, Rachid Redouane ແລະ Youssef Zaghba ປະຊຸມກັນ
ຢູ່ນອກບ່ອນອອກກໍາລັງກາຍ ທີ່ໃຊ້ສະເພາະຊາວມຸສລິມ ຊຶ່ງເປັນບ່ອນພົບກັນເລື້ອຍໆ
ຂອງສາມຄົນຢູ່ໃນພາກຕາເວັນອອກຂອງນະຄອນລອນດອນ ໃນໄລຍະ 5 ມື້ ກ່ອນທໍາ
ການໂຈມຕີນັ້ນ.
ຕາມພາບວີດິໂອ ທີ່ອອກມາສາຍໂດຍໜັງສືພິມ The Times newspaper ສະແດງ
ໃຫ້ເຫັນວ່າ ຜູ້ໍາຍສາມຄົນນັ້ນ ກອດກັນ ແລ້ວກໍຫົວຢູ່ຂ້າງນອກສູນອອກກໍາລັງກາຍ Ummah ຊຶ່ງເປັນບ່ອນທີ່ ທ້າວ Butt ອາໄສຢູ່ກັບເມຍຂອງລາວ ແລະລູກນ້ອຍ 2 ຄົນ.
