ສະຖານະການໃນກຸງລອນດອນ ສ່ວນໃຫຍ່ແລ້ວງຽບສະຫງົບໃນວັນພຸດມື້ນີ້ ແຕ່ຄວາມ
ວຸ້ນວາຍທີ່ຄອບງໍານະຄອນຫລວງຂອງອັງກິດ ມາເປັນເວລາສອງສາມຄືນຜ່ານມານີ້ໄດ້
ແຜ່ລາມອອກໄປຍັງຫົວເມືອງອື່ນໆ ຮວມທັງເມືອງ Manchester ແລະ Birmingham ນໍາ.
ຕໍາຫລວດເມືອງ Birmingham ກ່າວວ່າ ຜູ້ຊາຍ 3 ຄົນເສຍຊີວິດ ເວລາເຂົາເຈົ້າຖືກລົດ
ຄັນນຶ່ງຕໍາ ໃນລະຫວ່າງເກີດຄວາມວຸ້ນວາຍນັ້ນ. ຊາຍທັງ 3 ຄົນນີ້ໄດ້ພະຍາຍາມປົກ
ປ້ອງປະຊາຄົມຂອງເຂົາເຈົ້າ ຈາກພວກຄົນຂະໂມຍສິ່ງຂອງ. ຕໍາຫລວດໄດ້ຈັບຜູ້ຕ້ອງສົງ
ໄສຄົນນຶ່ງ ແລະການສືບສວນ ສອບສວນກ່ຽວກັບການຄາດຕະກໍາບຸກຄົນເຫລົ່ານີ້ພວມ
ດໍາເນີນໄປ.
ພວກເຫັນເຫດການກ່າວວ່າ ພວກຊາວໜຸ່ມ ທີ່ພາກັນແລ່ນອາລະວາດໄປທົ່ວ ຈໍານວນ
ຫລາຍຮ້ອຍຄົນພາກັນທັບປ່ອງຢ້ຽມ ລັກເອົາສິ່ງຂອງໃນຮ້ານຄ້າຮ້ານຂາຍ ແລະຈູດເຜົາ
ຕຶກອາຄານ ຫລາຍຫລັງໃນ Manchester ເມືອງໃຫຍ່ອັນດັບ 3 ຂອງອັງກິດ. ຕໍາຫລວດ
ໄດ້ຈັບກຸມ 47 ຄົນ ທີ່ພົວພັນກັບກັບການກໍ່ຄວາມວຸ້ນວາຍ ໃນຄັ້ງຫລ້າສຸດນີ້.
ເບິ່ງວີດີໂອ ການກໍ່ຈະລາຈົນໃນລອນດອນ:
ສະຖານະການແມ່ນງຽບສະຫງົບກວ່າ ໃນກຸງລອນດອນ ບ່ອນທີ່ພວກຕໍາຫລວດຈໍານວນ
16 ພັນຄົນ ອອກປະຕິບັດງານຢູ່ເຕັມຖະໜົນຫົນທາງ. ຮ້ານຄ້າຫລາຍຮ້ານພາກັນອັດລົງ
ແຕ່ເວັນ ແລະພວກໃຊ້ລະບົບຂົນສົ່ງມວນຊົນ ພາກັນຟ້າວອອກຈາກໃນເມືອງໄປ ກ່ອນ
ຕາເວັນຕົກດິນຫລັງຈາກເລີກການແລ້ວ.
ຄວາມວຸ້ນວາຍດັ່ງກ່າວໄດ້ເກີດຂຶ້ນ ຫລັງຈາກຕໍາຫລວດຍິງຜູ້ຊາຍຄົນນຶ່ງ ໄວ 29 ປີຕາຍ
ຊຶ່ງຜູ້ກ່ຽວມີລູກ 4 ຄົນ ໃນຄຸ້ມ Tottenham ຂອງພວກຄົນທຸກ ທີ່ປະເຊີນກັບບັນຫາດ້ານ
ເສດຖະກິດໃນກຸງລອນດອນເມື່ອທ້າຍສັບປະດາຜ່ານມາ.
ລາຍງານຂ່າວບາງສະບັບກ່າວວ່າ ຊາຍຄົນນີ້ຍິງປືນສັ້ນໃສ່ຕໍາຫລວດ ເວລາເຂົາເຈົ້າຢຸດລົດ
ຕັກຊີຂອງລາວ. ແຕ່ລາຍງານການສືບສວນຂອງຕໍາຫລວດໃນວັນອັງຄານວານນີ້ເວົ້າວ່າ
ປືນສັ້ນທີ່ໄດ້ພົບເຫັນໃນບ່ອນເກີດເຫດ ຍັງບໍ່ທັນໄດ້ຍິງອອກມາເທື່ອ. ເຫດຜົນທີ່ວ່າເປັນ
ຫຍັງຕໍາຫລວດ ຈຶ່ງຍິງຊາຍຄົນນີ້ຕາຍ ຍັງບໍ່ຈະແຈ້ງເທື່ອ.
ເບິ່ງວີດີໂອ ກ່ຽວກັບຄວາມເສບຫາຍ ໃນລອນດອນ: