ອັງກິດ ໄດ້ເປີດຄືນ ສະຖານທູດຂອງຕົນໃນເມືອງຫຼວງຂອງ
ອີຣ່ານ ໃນວັນອາທິດມື້ນີ, ພາຍຫຼັງເວລາເກືອບ 4 ປີທີ່ໄດ້ຖືກປິດລົງເຊິ່ງຕາມມາຈາກການໂຈມຕີຂອງພວກປະທ້ວງທີ່ໄດ້ບຸກເຂົ້າໄປໃນຕຶກສະຖານທູດດັ່ງກ່າວ.
ລັດຖະມົນຕີການຕ່າງປະເທດ ອັງກິດ ທ່ານ Philip Hammond ໄດ້ເດີນທາງໄປນະຄອນຫຼວງ ເທເຮຣ່ານ ເພື່ອເຂົ້າຮ່ວມພິທີ ເຊິ່ງເປັນບ່ອນທີ່ທ່ານໄດ້ປະກາດການເປີດສະຖານທູດຂຶ້ນ.
ທ່ານໄດ້ເອີ້ນການຢ້ຽມຢາມໃນວັນອາທິດມື້ນີ້ວ່າເປັນ “ເວລາແຫ່ງປະຫວັດສາດ” ໃນສາຍພົວພັນລະຫວ່າງທັງສອງປະເທດ, ແລະ ກ່າວເຖິງຄວາມສຳຄັນວ່າມັນເປັນການຢ້ຽມຢາມຄັ້ງທຳອິດ ໂດຍບາງຄົນທີ່ມີຕຳແໜ່ງສູງລະດັບທ່ານຕັ້ງແຕ່ປີ 2003 ເປັນຕົ້ນມາ.
ກ່ອນໜ້າຂອງພິທີດັ່ງກ່າວ, ກະຊວງການຕ່າງປະເທດຂອງ ອັງກິດ ໄດ້ກ່າວວ່າ ສະຖານທູດຂອງ ອີຣ່ານ ທີ່ນະຄອນຫຼວງ ລອນດອນ ກໍຈະໄດ້ໄຂຂຶ້ນໃນເວລາດຽວກັນນີ້ເຊັ່ນກັນ, ໃນເບື້ອງຕົ້ນທີ່ລະດັບອຸປະທູດ, ດ້ວຍການແນໃສ່ການຕັ້ງບັນດາເອກອັກຄະລັດຖະທູດ ຢູ່ທັງສອງແຫ່ງໃນເດືອນທີ່ໃກ້ຈະມາເຖິງນີ້.
