ທີ່ປະເທດອັງກິດ ພວກປະທ້ວງທີ່ສວມໜ້າກາກໄດ້ປະທະ
ກັບຕໍາຫລວດປາບຈະລາຈົນ ແລະບຸກໂຈມຕີ ຮ້ານຄ້າ ທະນາຄານ ແລະໂຮງແຮມຫລາຍ
ແຫ່ງໃນນະຄອນຫລວງລອນດອນ ໃນວັນເສົາວານນີ້ ຊຶ່ງເປັນເຫດການທີ່ບົດບັງການ
ປະທ້ວງຢ່າງສັນຕິກ່ອນໜ້ານີ້ໂດຍ ປະຊາຊົນອັງກິດຫລາຍກວ່າ ສອງແສນຫ້າໝື່ນຄົນ
ທີ່ຕໍ່ຕ້ານການຕັດການ ໃຊ້ຈ່າຍ ຕ່າງໆຂອງລັດຖະບານ.
ຕໍາຫລວດກ່າວວ່າ ປະຊາຊົນຫລາຍກວ່າ 200 ຄົນ ຖືກຈັບກຸມແລະອີກຫລາຍສິບຄົນ
ໄດ້ຮັບບາດເຈັບ ເວລາພວກປະທ້ວງພາກັນຂວ່າງຂວດແກ້ວ ປະທຸໄຟ ແລະວັດຖຸອື່ນໆ
ໃສ່ພວກຕໍາຫລວດ.
ການປະທະກັນແມ່ນໄດ້ຫັນເຫຄວາມສົນໃຈ ອອກໄປຈາກການເດີນປະທ້ວງຢ່າງສັນຕິ
ທີ່ມີຂຶ້ນກ່ອນໜ້ານັ້ນ ເພື່ອປະທ້ວງການຕັດການໃຊ້ຈ່າຍ ຂອງຫລວງເພື່ອສາທາລະນະ
ປະໂຫຍດ ການເພີ່ມພາສີ ແລະການປະຕິຮູບ ລະບົບເບ້ຍບໍານານ.
ເວລານີ້ອັງກິດກໍາລັງປະເຊີນກັບການຕັດການໃຊ້ຈ່າຍດ້ານສາທາລະນະລົງຈໍານວນ 130
ພັນ ລ້ານໂດລາ ຂະນະທີ່ລັດຖະບານກໍາລັງດິ້ນຮົນເພື່ອຈະລົດການຂາດດຸນງົບປະມານ
ຂອງປະເທດລົງ.
ການປະທ້ວງແມ່ນຖືກຈັດຕັ້ງຂຶ້ນມາໂດຍສະພາສະຫະພັນກໍາມະບານ ທີ່ໂຕ້ແຍ້ງວ່າ ການ ຕັດການໃຊ້ຈ່າຍດັ່ງກ່າວຈະສ້າງຄວາມເສຍຫາຍໃຫ້ແກ່ການ ຟື້ນຕົວຄືນຂອງເສດຖະກິດ ແລະທໍາລາຍຊື່ສຽງຂອງອັງກິດ ການເດີນປະ ທ້ວງຄັ້ງນີ້ຖືວ່າໃຫຍ່ທີ່ສຸດໃນເມືອງຫລວງ ຂອງອັງກິດນັບຕັ້ງແຕ່ການປະທ້ວງ ຕໍ່ຕ້ານສົງຄາມອີຣັກ ໃນປີ 2003 ເປັນຕົ້ນມາ.
