ນາຍົກລັດຖະມົນຕີອັງກິດ ທ່ານ David Cameron ຈະໄດ້ຕັດການຢ້ຽມຢາມອາຟຣິກາ
ໃຫ້ສັ້ນລົງ ເພື່ອກັບຄືນເມືອຈັດການກັບຂ່າວນອງນັນ ກ່ຽວກັບການດັກຟັງແລະລັກເອົາ ຂໍ້ມູນທາງໂທລະສັບ.
ລັດຖະສະພາອັງກິດໄດ້ມີກໍານົດຈະຢຸດພັກເປັນເວລາ 6 ອາທິດໃນວັນອັງຄານມື້ອື່ນນີ້ ແຕ່
ບັດນີ້ອາດຈະມີປະຊຸມພິເສດກັນໃນວັນພຸດ.
ຫົວໜ້າຕໍາຫລວດອັງກິດໄດ້ລາອອກຈາກຕໍາແໜ່ງໃນວັນອາທິດວານນີ້ ສືບເນື່ອງ
ມາຈາກການກ່າວຫາ ກ່ຽວກັບວິທີການສືບສວນຂອງຕໍາຫລວດກ່ຽວກັບຂ່າວນອງນັນ
ດັ່ງກ່າວ ທີ່ພົວພັນກັບນັກຂ່າວຂອງອົງການຂ່າວໃຫຍ່ຂອງອັງກິດ News of the
World ທີ່ຖືກປິດລົງແລ້ວນັ້ນ.
ທ່ານ Paul Stephenson ໄດ້ບອກກັບນັກຂ່າວໃນວັນອາທິດວານນີ້ວ່າ ທ່ານບໍ່ໄດ້
ເຮັດຫຍັງຜິດ, ແຕ່ທ່ານກ່າວວ່າ ທ່ານບໍ່ຢາກໃຫ້ການຕໍາໜິຕິຕຽນກ່ຽວກັບ ການປະພຶດ
ຂອງທ່ານ ໄປຫັນເຫຫລືລົບກວນການປະຕິບັດໜ້າທີ່ຂອງກົມຕໍາຫລວດ.
ຕໍາຫຼວດຂອງອັງກິດໄດ້ຖືກກ່າວຫາວ່າ ຮັບເອົາເງິນສິນບົນຈາກພວກນັກຂ່າວຂອງ News
of the World ແລະບໍ່ໄດ້ເຮັດໜ້າທີ່ຢ່າງພຽງພໍໃນການສືບສວນ ກ່ຽວກັບການດັກຟັງ
ເພື່ອລັກລອບເອົາຂໍ້ມູນທາງໂທລະສັບນັ້ນ.
ອົງການຂ່າວ News of the World ໄດ້ປິດລົງນຶ່ງອາທິດກ່ອນນີ້ ຫລັງຈາກ ທີ່ມີການ
ກ່າວຫາວ່າ ພວກນັກຂ່າວຂອງຕົນໄດ້ລັກເອົາຂໍ້ມູນທາງໂທລະສັບຫຼືດັກຟັງໂທລະສັບ
ມືຖືຢ່າງຜິດກົດໝາຍ ຂອງພວກຄົນດັງ, ນັກການເມືອງ, ພວກນັກຂ່າວທີ່ຊິງດີຊິງເດ່ນກັນ
ຫຼືແມ້ກະທັງພວກທີ່ຖືກຄາດຕະກໍາ. ນອກນັ້ນ ຍັງມີການສົງໄສກັນອີກວ່າ ພວກນັກຂ່າວ
ໄດ້ໃຫ້ສິນບົນແກ່ຕໍາຫຼວດນໍາ.
