ທ່ານ David Cameron ນາຍົກລັດຖະມົນຕີອັງກິດຈະໄປຕອບຂໍ້ຊັກຖາມຕ່າງໆໃນສະພາ
ໃນວັນພຸດມື້ນີ້ ກ່ຽວກັບຄວາມສໍາພັນຂອງທ່ານ ກັບພວກຫົວໜ້າບໍລິຫານຄົນສໍາຄັນໆຈາກ
ບໍລິສັດສື່ມວນຊົນຍັກໃຫຍ່ທ່າມ ກາງຂ່າວນອງນັນເລື້ອງການລັກຟັງໂທລະສັບນັ້ນ.
ທ່ານ Cameron ປະເຊີນກັບການຕໍາໜິຕິຕຽນ ຍ້ອນການຕັດສິນໃຈຂອງທ່ານໃນການ
ວ່າຈ້າງອະດີດບັນນາທິການຂອງໜັງສືພິມສະບັບນຶ່ງ ຊຶ່ງປັດຈຸບັນອັດກິດຈະການແລ້ວນັ້ນ
ທີ່ຖືກກ່າວຫາວ່າລັກຟັງໂທລະສັບມືຖືຂອງແມ່ຍິງໄວລຸ່ນທີ່ຖືກຂ້າຕາຍຄົນນຶ່ງ ພວກທະຫານ
ທີ່ເສຍຊີວິດ ແລະບຸກຄົນອື່ນໆອີກຈໍານວນນຶ່ງນັ້ນ.
ທ່ານ Andy Coulson ອະດີດບັນນາທິການໜັງສືພິມສະບັບນີ້ ໄດ້ເປັນຫົວໜ້າຝ່າຍຕິດ
ຕໍ່ປະສານງານປະຈໍານາຍົກລັດຖະມົນຕີ ກ່ອນທ່ານລາອອກຈາກຕໍາແໜ່ງໄປໃນເດືອນມັງ
ກອນປີນີ້. ທ່ານ Coulson ໄດ້ຖືກຈັບກຸມທີ່ມີສ່ວນພົວພັນກັບຂ່າວນອງນັນທີ່ວ່ານີ້.
ບັນດາພັກຝ່າຍຄ້ານອັງກິດຍັງໄດ້ຕໍາໜິຕິຕຽນການພົບປະກັນເລື້ອຍໆຂອງນາຍົກລັດຖະມົນ
ຕີກັບພວກຫົວໜ້າບໍລິຫານຈາກບໍລິສັດຂ່າວ News Corporation ຂອງທ່ານ Rupert
Murdoch ຊຶ່ງເປັນເຈົ້າຂອງໜັງສືພິມທີ່ຖືກຍຸບນຳນັ້ນ.
ທ່ານ Cameron ໄດ້ເປີດເຜີຍໃນສັບປະດາຜ່ານມາວ່າ ທ່ານໄດ້ພົບປະກັບພວກຫົວໜ້າ
ຂອງບໍລິສັດຂ່າວດັ່ງກ່າວ 26 ຄັ້ງໃນລະຫວ່າງການດໍາລົງຕໍາແໜ່ງນາຍົກລັດຖະມົນຕີມາ
14 ເດືອນ ຊຶ່ງເປັນຈໍານວນ 2 ເທົ່າຂອງການພົບປະກັບພວກອົງການສື່ມວນຊົນອື່ນໆ.
