ພາຍຫລັງທີ່ໄດ້ມີການສະທ້ານໃຈ ແລະຄວາມເຈັບປວດລວດລ້າວຕິດຕໍ່ກັນຫລາຍຄັ້ງ
ເນື່ອງມາຈາກການໂຈມຕີຂອງພວກກໍ່ການຮ້າຍໃນສອງສາມອາທິດຜ່ານມານີ້ ອັງກິດ
ຈະຈັດການເລືອກຕັ້ງໃຫຍ່ຂຶ້ນ ໃນວັນພະຫັດມື້ອື່ນນີ້ ແລະການຮັກສາຄວາມສະຫງົບ
ໄດ້ກາຍເປັນເລື້ອງສໍາຄັນສູງສຸດຂອງປະເທດ.
ເນື່ອງຈາກມີການໂຈມຕີດັ່ງກ່າວ ທ່ານນາງ Theresa May ນາຍົກລັດຖະມົນຕີ ເວົ້າວ່າ
“ຄັນວ່າພໍແລ້ວກໍຕ້ອງພໍ” ແລະໄດ້ເຕືອນວ່າ ອັງກິດ ຈະຕ້ອງໄດ້ປ່ຽນແປງວິທີການໃໝ່
ຢ່າງໃຫຍ່ເລີຍ.
ໃນຂະນະດຽວກັນ ນະຄອນຫລວງຂອງອັງກິດ ກໍາລັງປັບຕົວເຂົ້າກັບສະພາບທີ່ປະກົດ
ວ່າຈະມີໄພນາບຂູ່ຄັ້ງໃໝ່. ໄດ້ມີການເອົາຕໍາຫລວດທີ່ປະກອບອາວຸດໄປປະຈໍາຢູ່ບ່ອນທີ່
ຂ້ອນຂ້າງ ຈະເປັນເປົ້າໝາຍໃນການໂຈມຕີ ເຊັ່ນສະຖານີລົດໄຟ ແລະສູນກາງທີ່ນັກທ່ອງ
ທ່ຽວມັກໄປ. ໄດ້ມີການເອົາໄມ້ຂັ້ນລະຫວ່າງ ເລນການສັນຈອນຂອງລົດ ແລະບ່ອນຄົນ
ຍ່າງຢູ່ເທິງຂົວແມ່ນໍ້າ Thames ເພື່ອປ້ອງກັນສ່ວນໃດສ່ວນນຶ່ງ ບໍ່ໃຫ້ມີການໂຈມຕີ ທີ່ມາ
ຈາກລົດຕໍ່ວິທີການທໍາງານ ໃນເຫດການກໍ່ການຮ້າຍສອງຄັ້ງ ທີ່ຫາກໍ່ເກີດຂຶ້ນໃນນະຄອນ
ຫລວງດັ່ງກ່າວຫວ່າງໝໍ່ໆມານີ້.
ແຕ່ວ່າ ນອກເໜືອຈາກການປ້ອງກັນທາງດ້ານສະຖານທີ່ແລ້ວ ປະເທດອັງກິດ ຈະປົກ
ປ້ອງຕົນເອງໄດ້ແນວໃດ? ຄໍາຖາມດັ່ງກ່າວນັ້ນແມ່ນ ຄໍາຖາມທີ່ສໍາຄັນທີ່ສຸດ ໃນຂະນະທີ່
ປະຊາຊົນໃນປະເທດ ກະກຽມໄປປ່ອນບັດ.
ໃນວັນອັງຄານວານນີ້ ຢູ່ໃນລະຫວ່າງການໂຄສະນາຫາສຽງຢູ່ນັ້ນ ນາຍົກລັດຖະມົນຕີ
Theresa May ໄດ້ໃຫ້ຄໍາໝັ້ນສັນຍາວ່າ ຈະໃຫ້ເຄື່ອງມື ແກ່ພວກໃຫ້ການບໍລິການດ້ານ
ປ້ອງກັນຄວາມສະຫງົບຕາມຄວາມຕ້ອງການ.
ທ່ານນາງກ່າວວ່າ "ຂ້າພະເຈົ້າຈະພິຈາລະນາໃຫ້ອໍານາດເພີ້ມຂຶ້ນ ແກ່ຕໍາຫລວດ ແລະ
ພວກໃຫ້ບໍລິການດ້ານການປ້ອງກັນຄວາມສະຫງົບ, ໃຫ້ມີການລົງໂທດທີ່ດົນຂຶ້ນຕໍ່ການ
ກະທໍາຜິດທີ່ກ່ຽວຂ້ອງກັບການກໍ່ການຮ້າຍ, ຮັບມືກັບບັນຫາທາງອິນເຕີແນັດ ແລະຮັບ
ປະກັນວ່າ ບໍ່ມີຊ່ອງຫວ່າງ ທີ່ປອດໄພ ແກ່ພວກກໍ່ການຮ້າຍທາງອອນລາຍ."
ລັດຖະບານກໍາລັງທໍາການກົດດັນເວັບໄຊ ເຊັ່ນ YouTube ໃຫ້ສິ້ງຊອມກວດເບິ່ງເນື້ອໃນ
ໃຫ້ເຂັ້ມງວດຂຶ້ນກວ່າເກົ່າ. Hamdi Abdalla Mohamud ນັກເຄື່ອນໄຫວໃນປະຊາຄົມ
ຊາວມຸສລິມ ມີຄວາມຍິນດີຕໍ່ການສຸມໃຈໃສ່ລະບົບຫົວຮຸນແຮງ ທາງອິນເຕີແນັດ.
ເບິ່ງວີດິໂອກ່ຽວກັບຂ່າວນີ້ເພີ້ມເປັນພາສາອັງກິດ
