ລິ້ງ ສຳຫລັບເຂົ້າຫາ

ສຸຂະພາບ: ເດັກນ້ອຍເກີດໃໝ່ທີ່ໄດ້ກິນນົມແມ່ ມີຈໍານວນເພີ້ມຂຶ້ນ

  • ດຣ. ບົວສະຫວັນ ສິມມາລາ

ສຸຂະພາບ: ເດັກນ້ອຍເກີດໃໝ່ທີ່ໄດ້ກິນນົມແມ່ ມີຈໍານວນເພີ້ມຂຶ້ນ

ການສໍາຫລວດໃໝ່ໄດ້ພົບວ່າ ຈໍານວນ 3 ສ່ວນ 4 ຂອງເດັກນ້ອຍເກີດໃໝ່ ແມ່ນໄດ້ກິນ ນົມແມ່ໃນທັນທີທີ່ເກີດມາ ແຕ່ຈໍານວນເດັກກິນນົມແມ່ໄດ້ຫລຸດລົງຢ່າງໄວວາ ໃນໄລຍະປີ ທໍາອິດ ຫລັງຈາກເກີດມາແລ້ວ.

ອີງ​ຕາມ​ລາຍ​ງານ​ຫລ້າ​ສຸດກ່ຽວ​ກັບ​ການ​ລ້ຽງ​ເດັກ​ດ້ວຍ​ນໍ້າ ນົມແມ່ ​ກໍ​ແມ່ນ​ວ່າ 75% ຂອງ​ເດັກນ້ອຍເກີດໃໝ່ທັງໝົດ ​ແມ່ນ​ໄດ້​ກິນ​ນົມ​ແມ່​ໃນ​ທັນໃດໂລດ. ຕົວເລກ​ນີ້​ສະ​ແດ​ງໃຫ້​ເຫັນເຖິງ​ການ​ເພິ່ມຂຶ້ນ​ຢ່າງ​ຊ້າໆ ​ແຕ່​ກໍ​ສະໝໍ່າສະ​ເໝີ​ ​ໃນສັດ ສ່ວນ​ຂອງ​ເດັກນ້ອຍ​ທີ່ກິນນົມ​ແມ່ ໃນ​ໄລຍະສອງ​ສາມປີທີ່ຜ່ານ ​ມານີ້.

ການ​ສໍາ​ຫລວດ​ໃໝ່​ທີ່​ວ່າ​ນີ້ ​ແມ່ນສໍາ​ຫລວດ​ເບິ່ງ​ເດັກ ນ້ອຍ​ທີ່​ເກີດ​ໃໝ່​ໃນ​ປີ 2007 ​ເຊິ່ງ​ເປັນ​ຂໍ້​ມູນ​ທີ່​ໃໝ່ທີ່​ສຸດ ​ທີ່​ມີ​ຢູ່​ໃນ​ປັດຈຸບັນ.

ການ​ສິກ​ສາ​ຄົ້ນຄວ້າ​ກ່ຽວກັບເດັກນ້ອຍ​ກິນ​ນົ​ມ​ແມ່ ​ແມ່ນ​ມາ​ຈາກສູນ​ກາງ​ຄວບ​ຄຸມ ​ແລະປ້​ອງ ກັນ​ພະຍາດ ຂອງ​ສະຫະລັດ. ທ່ານ​ນາງ Carol MacGowan ທີ່​ປຶກສາດ້ານ​ສາທາລະນະ​ສຸກ ທີ່​ສູນກາງ​ດັ່ງກ່າວ ​ເວົ້າວ່າ ຄວາມ​ຕ້ອງການ​ຂອງແມ່​ທີ່​ມີ​ລູກ​ຫົວ​ສາວ ທີ່ຢາກ​ໃຫ້​ລູກ​ກິນ​ນົມ​ຕົນເອງ​ ​ແຕ່​ພຽງ​ຢ່າງ​ດຽວນັ້ນ ​ແມ່ນ​ບໍ່ພຽງພໍ. ເຂົາ​ເຈົ້າ​ຕ້ອງ​ໄດ້​ຮຽນ​ຮູ້​ກ່ຽວ​ກັບ​ວິທີ​ລ້ຽງ​ລູກ​ດ້ວຍ​ນໍ້ານົມ​ແມ່ ຢ່າງ​ຖືກຕ້ອງ​.

ທ່ານ​ນາງ Carol MacGowan ​ເວົ້າວ່າ:

“ຍັງມີ ຄວາມ​ຈໍາ​ເປັນ ຕ້ອງໄດ້​ມີ​ການເຝິກແອບ​ບັນດາ​ແມ່ຍິງ​ທີ່​ເກີດ​ລູກເປັນຄັ້ງທຳ​ອິດ​ທັງຫລາຍ ຢູ່​ໃນ​ໂຮງໝໍນັ້ນ​ຢູ່ ​ເພື່ອ​ຊ່ວຍ​ສະໜັບສະໜູນ​ເຂົາ​ເຈົ້າ​ໃຫ້​ຕັດສິນ​ໃຈລ້ຽງ​ລູກ ດ້ວຍ​ນໍ້ານົມ​ຂອງຕົນເອງ. ທັງ​ນີ້ກໍ​ເພາະວ່າ ​ໃນ​ເວລາ​ເກີດ​ລູກ​ໃໝ່ ແມ່​ຍິງຜູ້​ນຶ່ງອາດ​ຕັດ​ສິນ​ໃຈ​ໃຫ້ລູກ​ກິນ​ນົມ​ຕົນເອງ ​ແຕ່​ວ່າ ຖ້າ​ບໍ່ ມີການສະໜັບສະໜູນ ທີ່​ຊ່ວຍໃຫ້ຜູ້ກ່ຽວ ສືບຕໍ່​ໃຫ້​ລູກ​ກິນ​ນົມຕົນ​ເອງ​ແລ້ວ ​ຜູ້​ກ່ຽວອາດ​ຈະ​ບໍ່ຄິດ​ ແມ່ນ​ແຕ່​ຈະ​ເລີ້ມຕົ້ນໃຫ້ລູກ​ກິນ​ນົມ​ຕົນເອງຊໍ້າ.”

ການເຝິກ​ແອບຂອງ​ທາງໂຮງໝໍ ທີ່​ສົ່ງ​ເສີມ​ໃຫ້ບັນດາ​ແມ່ຍິງ​ທີ່​ເກີດ​ລູກ​ໃໝ່ເອົາລູກ​ກິນ​ນົມ​ຕົນເອງ ກໍມີລວມ ທັງເຝິກ​ການ​ເອົາ​ລູກ​ແນບ​ໃສ່​ກັບ​ແມ່​ທັນໃດ​ໂລດ ​ເວລາເດັກ​ເກີດ​ອອກ​ມາ ​ແລະ ກໍ​ບໍ່​ເອົາ​ນົມ​ຝຸ່ນ​ສູດ​ລ້ຽງລູກ ຫລື​ເອົາໝາກ​ແວ້ໃຫ້​ທາລົກ​ດູດ.

ເຖິງ​ແມ່ນ​ວ່າ​ 3 ສ່ວນ 4 ຂອງ ​ເດັກນ້ອຍ​ເກີດໃໝ່​ເລີ້ມຕົ້ນຊີວິດ​ໂດຍ​ການ​ກິນ​ນົມ​ແມ່​ຂອງ​ເຂົາ​ເຈົ້າກໍ​ຕາມ ​ແຕ່​ພໍ​ອາຍຸ​ໄດ້ 6​ ເດືອນ ກໍມີພຽງ​ແຕ່ 43% ຂອງ​ເດັກ​ເຫລົ່ານີ້ ທີ່ຍັງ​ສືບຕໍ່ກິນ​ນົມ​ແມ່. ​ເມື່ອຮອດອາຍຸ 12 ​ເດືອນ ມີ​ພຽງ​ແຕ່ 1 ສ່ວນ 5 ຂອງ​ຈຳນວນ ​ເດັກ​ນອ້ຍ ຫລື 1 ຄົນ​ໃດໃນ​ທຸກໆ 5 ຄົນ​ເທົ່າ​ນັ້ນ ທີ່​ຍັງກິນ​ນົມ​ແມ່ຢູ່.

ຕາມ​ຄໍາ​ແນະນໍາຂອງ​ເຈົ້າໜ້າທີ່​ສະຫະລັດ ​ແມ່ນ​ວ່າ ​ເດັກນ້ອຍ​ເກີດ​ໃໝ່ຕ້ອງ​ໄດ້​ກິນ​ນົມ​ແມ່​ຈົນຮອດອາຍຸ ນຶ່ງ​ຂວບ ​ແຕ່​ວ່າ​ອົງການ​ອະນາ​ໄມ​ໂລກ ຫລື WHO ​ເວົ້າວ່າ ການ​ໃຫ້​ລູກ ​ກິນ​ນົມ​ແມ່​ຄວນ​ສືບຕໍ່​ໄປ ​ຈົນ​ເດັກ​ອາຍຸ​ໄດ້ສອງ​ຂວບ.

ທ່ານ​ນາງ Carol MacGowan, ອະທິບາຍ​ວ່າ ມີ​ເຫດຜົນ​ຫລາຍ​ຢ່າງ​ທີ່​ພາ​ໃຫ້ ຜູ້​ຍິງ​ອາ​ເມຣິກັນ​ບໍ່ສືບຕໍ່ໃຫ້​ລູກ​ກິນ​ນົມຕົນ​ເອງ.

ທ່ານ​ນາງອະທິບາຍ​ວ່າ:

“​ບາງ​ເຫ​ດຜົນ​ນັ້ນກໍ​ຄື ການ​ສະໜັບສະໜູນ ຂອງ​ປະຊາ​ຄົມ; ສະນັ້ນ ພວກ​ເຮົາ​ຄວນແກ້​ໄຂ ​ໂດຍ​ສົ່ງ​ນັກ​ວິຊາ​ການ​ດ້ານ​ເອົາ​ນົມ​ໃຫ້​ລູກ​ກິນໄປ​ຊ່ວ​ຍ ​ເຫ​ລື​ອບັນດາ​ແມ່ຍິງ ທີ່​ມີ​ລູກ ນ້ອຍ​ທັງຫລາຍ. ​ແຕ່​ວ່າ​ອຸບປະສັກໃຫຍ່​ອັນ​ນຶ່ງສຳລັບ​ແມ່ຍິງ ກໍ​ຄືການ​ທີ່ ​ເຂົາ​ເຈົ້າຕ້ອງ​ໄດ້​ໄປເຮັດວຽກ​ເຮັດ​ການ ທັງ​ໃຫ້​ລູກ​ກິນ​ນົມໄປພ້ອມ. ​ໃນ​ບາງ​ກໍລະນີ ມັນ​ກໍ​ເປັນ ພຽງ ອຸບປະສັກທີ່​ຄິດເອົາເທົ່ານັ້ນ ​ແຕ່​ວ່າ​ໃນ​ບາງກໍລະນີ ກໍ​ເປັນ​ບັນຫາ​ອັນ​ຫຍຸ້ງຍາກ​ອີ່ຫລີ.”

ແຕ່​ວ່າ​ເຖິງ​ຈະ​ມີອຸບປະສັກພຽງ​ໃດ ສິງ​ທີ່​ສໍາຄັນ​ກໍ​ຄື ນົມ​ແມ່​ເປັນ​ອາຫານ​ສໍາລັບ​ເດັກ ທີ່​ຖືກ ຕ້ອງ​ແລະ​ມີ​ຄຸນ​ນະ​ປະ​ໂຫຍ​ດ ​ເພາະ​ໄດ້​ມີ​ການ​ສຶກສາ​ຫລາຍ​ບັ້ນ ສະ​ແດງ​ໃຫ້​ເຫັນ​ວ່າເດັກ ນ້ອຍ ​ທີ່​ໄດ້ກິນ​ນົມ​ແມ່​ ແມ່ນ​ມີ​ສຸຂະພາບ​ທີ່​ແຂງ​ແຮງ ກວ່າ​ເດັກ​ທີ່​ບໍ່​ໄດ້​ກິນ​ນົມ​ແມ່.

ທ່ານ​ນາງ Carol MacGowan ກ່າວ​ສະຫລູ​ບວ່າ:

“ປະ​ໂຫຍ​ດຂອງ​ການ​ກິນນໍ້ານົມ​ແມ່​ແມ່ນ​ມີ​ຫລາຍ​ດ້ານ ​ເວົ້າ​ແລ້ວ​ກໍດີ​ໝົດທຸກ​ຢ່າງ ນັບ​ແຕ່​ການ​ປ້ອງ​ກັນ​ການ​ຕິດ​ເຊື້ອພະຍາດຕ່າງໆ ຈົນ​ເຖິງ ພະຍາດ​ຊໍ້າ​ເຮື້ອ​ຫລາຍ​ຢ່າງ ເຊ່ນ ພະຍາດ​ກ່ຽວກັບ​ຫລອດລົມ​ຫາຍໃຈ ​ຊຶ່ງ ການ​ກິນນໍ້ານົມ​ແມ່​ກໍໃຫ້​ປະໂຫຍ​ດ ຢ່າງ​ນຶ່ງ ເພາະ​ມັນ​ຊ່ວຍ​ຫລຸດຜ່ອນ​ຄວາມຮຸນ​ແຮງຂອງ​ໂຣກຫືດ ຖ້າ​ຫາກ​ວ່າ​ເດັກນ້ອຍ​ເຫລົ່ານັ້ນ ​ມີ​ທ່າ​ທີ​ວ່າ ຈະ​ເປັນໂຣກຫືດ ແລະຊ່ວຍ​ຕ້ານການເປັນ ພະຍາດ​ຊໍາ​ເຮື້ອຕ່າງໆ ​ເຊ່ນ ​ໂຣກ​ເບົາ ຫວານ ​ແລະ ອ້ວນ​ພີ​ຈົນ​ເກີນ​ໄປ."

ນອກ​ຈາກນັ້ນ ​ແມ່​ເອງ​ກໍ​ໄດ້​ປະ​ໂຫຍ​ດ​ເຊ່ນ​ກັນ ​ເພາະ​ການໃຫ້​ລູກ​ກິນ​ນົມ​ຕົນເອງ ​ເຮັດ​ໃຫ້​ຄວາມ​ສ່ຽງຕໍ່ການ​ເປັນ​ໂຣກມະ​ເຮງບາງ​ຊະນິດຫລຸດ​ລົງ, ​ຊ່ວຍ​ໃຫ້​ໄລຍະ​ຫ່າງ​ຂອງ​ການ​ຖືພາ​ ໄກ​ອອກ​ຢ່າງ​ທຳ​ມະ​ຊາດ ​ແລະກໍບໍ່ຕ້ອງ​ເສຍ​ເງິ​ນຊື້ ອີກດ້ວຍ.

XS
SM
MD
LG