ປະທານາທິບໍດີ Dilma Rousseff ໄດ້ຮັບຄະແນນສຽງອັນດັບ
ນຶ່ງ ໃນການເລືອກຕັ້ງປະທານາທິບໍດີບຣາຊີລ ໃນວັນອາທິດ
ວານນີ້ ແຕ່ກໍບໍ່ໄດ້ສຽງສະໜັບສະໜຸນຂ້າງຫຼາຍທີ່ຕ້ອງການ
ເພື່ອຫລີກລ້ຽງການການເລືອກຕັ້ງຮອບຊີ້ຂາດ ຊຶ່ງກຳນົດຈະ
ມີຂຶ້ນໃນທ້າຍເດືອນນີ້.
ທ່ານນາງ Rousseff ໄດ້ຮັບ ເກືອບ 42 ເປີເຊັນຂອງຄະແນນ
ສຽງທັງໝົດໃນວັນອາທິດວານນີ້ ຂະນະທີ່ທ່ານ Aecio Neves
ສັງກັດ ພັກສັງຄົມປະຊາທິປັດນິຍົມທຸລະກິດ ໄດ້ຮັບສຽງສະໜັບ
ສະໜຸນ ເກືອບ 34 ເປີເຊັນ. ການເລືອກຕັ້ງຮອບສອງ ຄືຮອບຕັດ
ສິນຊີ້ຂາດ ກຳນົດຈະມີຂຶ້ນ ໃນວັນທີ 26 ເດືອນນີ້.
ປະທານາທິບໍດີ Rousseff ໄດ້ຮັບສຽງສະໜັບສະໜຸນຈາກຊົນຊັ້ນອອກແຮງງານຂອງ
ບຣາຊີລ ຍ້ອນໂຄງການປະຊາສົງເຄາະທີ່ໃຫ້ເງິນຢ່າງຫຼວງຫຼາຍ ຊຶ່ງລິເລີ້ມຂຶ້ນໃນລະ
ຫວ່າງການດຳລົງຕຳແໜ່ງສອງສະໄໝຂອງປະທານາທິບໍດີຄົນກ່ອນ ທ່ານ Luiz Inacio Lula da Silva ທີ່ໄດ້ຮັບຄວາມນິຍົມຊົມຊອບຈາກປະຊາຊົນ ຢ່າງຫຼວງຫຼາຍນັ້ນ.
ຜົນການເລືອກຕັ້ງ ປະທານາທິບໍດີ ຢູ່ບຣາຊີລ – ວັນຈັນ ທີ 6 ຕຸລາ.
ປະທານາທິບໍດີ Rousseff ກ່າວວ່າ “ພວກໝູ່ເພື່ອນແລະມິດສະຫາຍທີ່ເຄົາລົບ
ແລະນັບຖືທັງຫຼາຍຂອງຂ້າພະເຈົ້າ. ອີກຄັ້ງນຶ່ງປະຊາຊົນບຣາຊີລ ໄດ້ໃຫ້ກຽດ
ແກ່ຂ້າພະເຈົ້າດ້ວຍຄວາມໝັ້ນໃຈ ໂດຍໄດ້ມອບໄຊຊະນະໃຫ້ຂ້າພະເຈົ້າໃນ
ການເລືອກຕັ້ງຮອບທຳອິດນີ້. ສຳລັບພວກເຮົາ ກໍຄືພັກແຮງງານ ນີ້ເປັນໄຊຊະ
ນະຄັ້ງທີ 7 ຊຶ່ງ 2 ຄັ້ງ ແມ່ນໃນການເລືອກຕັ້ງປະທານາທິບໍດີ Lula ຄັ້ງທຳອິດ
ອີກສອງຄັ້ງ ແມ່ນໃນການເລືອກຕັ້ງປະທານາທິບໍດີ Lula ຄັ້ງທີສອງ ແລະອີກ
2 ຄັ້ງ ແມ່ນໃນການເລືອກຕັ້ງຂ້າພະເຈົ້າເອງ ແລະບັດນີ້ ອີກຄັ້ງນຶ່ງ ໃນການ
ເລືອກຕັ້ງຂ້າພະເຈົ້າຄືນອີກ ໃນຮອບທຳອິດນີ້.”
ອະດີດລັດຖະມົນຕີປົກປ້ອງສິ່ງແວດລ້ອມ ທ່ານນາງ Marina Silva ຊຶ່ງໃນທ້າຍເດືອນ
ສິງຫາຜ່ານມາ ໄດ້ມີຄະແນນນຳໜ້າຢ່າງຫຼວງຫຼາຍ ໃນການຢັ່ງຫາງສຽງນັ້ນ ກັບບໍ່ໄດ້
ຄະແນນສຽງຫລາຍ ໃນການເລືອກຕັ້ງໂຕຈິງ.
ການອອກໄປປ່ອນບັດ ແມ່ນເປັນການບັງຄັບຢູ່ໃນບຣາຊີລ ຊຶ່ງໝົດທຸກຄົນທີ່ມີອາຍຸໃນ
ລະຫວ່າງ 18 ປີ ຂຶ້ນໄປຮອດອາຍຸ 70 ປີຕ້ອງໄປປ່ອນບັດ.
