ອະດີດປະທານາທິບໍດີ Brazil ທ່ານ Luiz Inacio Lula da Silva ໄດ້ຖືກຟ້ອງໃນຄະດີຟອກເງິນແລະສໍ້ລາດບັງຫຼວງ.
ຄະນະສືບສວນສອບສວນຂອງລັດຖະບານກາງ ໄດ້ປະກາດກ່ຽວກັບການຟ້ອງຮ້ອງດັ່ງກ່າວໃນວັນພຸດວານນີ້ ທີ່ໄດ້ພົວພັນກັບການສືບສວນສອບສວນ ກ່ຽວກັບການສໍ້ລາດບັງຫຼວງ ທີ່ບໍລິສັດລັດວິສາຫະກິດນ້ຳມັນ Petrobras.
ອະດີດປະທານາທິບໍດີ ແລະພັນລະຍາຂອງທ່ານ ພ້ອມທັງບຸກຄົນອື່ນໆທີ່ກ່ຽວຂ້ອງ ອີກຈຳນວນນຶ່ງຖືກກ່າວຫາວ່າ ໄດ້ຮັບຜົນປະໂຫຍດ ຈາກການປັບປຸງທີ່ດິນຊຶ່ງເປັນຫາດຊາຍແຄມທະເລ ໂດຍບໍລິສັດກໍ່ສ້າງ ທີ່ມີສ່ວນພົວພັນກັບການຮັບເງິນສິນບົນທີ່ເປັນຂ່າວນອງນັນຂອງບໍລິສັດນ້ຳມັນ Petrobras.
ທ່ານ Lula ປະຕິເສດ ຕໍ່ຂໍ້ກ່າວຫາ ແລະກ່າວວ່າ ທ່ານບໍ່ເຄີຍເປັນເຈົ້າຂອງທີ່ດິນຜືນນັ້ນ.
ການຟ້ອງຮ້ອງດັ່ງກ່າວ ປະຈຸບັນນີ້ ໄດ້ຖືກສົ່ງໄປໃຫ້ຜູ້ພິພາກສາສານລັດຖະບານກາງ ທີ່ກຳກັບການສືບສວນສອບສວນກ່ຽວກັບບໍລິສັດນ້ຳມັນ Petrobras. ທ່ານຈະຕ້ອງໄດ້ຕັດສິນວ່າ ທ່ານ Lula ຈະຖືກນຳໂຕຂຶ້ນສານ ຫຼືບໍ່.
