ຕຳຫຼວດຂອງບຣາຊີລ ໄດ້ຈັບກຸມຜູ້ຊາຍຊາວເລບານອນຄົນນຶ່ງ ຜູ້ຊຶ່ງສະຫະລັດ ສົງໄສ
ວ່າ ເປັນບຸກຄົນທີ່ສຳຄັນ ໃຫ້ການສະໜັບສະໜູນທາງດ້ານການເງິນ ແກ່ກຸ່ມ
ເຮສໂບລລາ ເຊິ່ງເປັນກຸ່ມຫົວຮຸນແຮງຂອງເລບານອນ.
ທ້າວ ອາຊາດ ບາຣາຄັດ ໄດ້ຖືກຈັບກຸມໃນວັນສຸກວານນີ້ ຢູ່ທີ່ເມືອງ ຟອສ ດູ ອີກົວຊູ
ຂອງ ບຣາຊີລ. ເມືອງດັ່ງກ່າວ ຕັ້ງຢູ່ໃນເຂດທີ່ເອີ້ນວ່າ ເຂດຊາຍແດນ ລະຫວ່າງ 3
ປະເທດຄື ບຣາຊີລ ອາເຈັນຕີນາ ແລະປາຣາໄກວ ທີ່ບັນຈົບຄົບກັນ. ພື້ນທີ່ແຫ່ງນີ້
ເປັນທີ່ຮູ້ຈັກກັນມາດົນນານແລ້ວວ່າ ເປັນເຂດທີ່ມີພວກລັກລອບຄ້າສິ່ງທີ່ຜິດກົດໝາຍ
ພວກຄ້າມະນຸດ ແລະພວກປ້ອມແປງເອກກະສານ ແລະເງິນ.
ທ້າວ ບາຣາຄັດ ເປັນຜູ້ທີ່ທາງການຂອງປາຣາໄກວ ຕ້ອງການໂຕ ໃນການລັກຂະໂມຍ
ເອົາຂໍ້ມູນຂອງສ່ວນບຸກຄົນ ແລະ ສານໄດ້ອອກໝາຍຈັບຜູ້ກ່ຽວ ເມື່ອເດືອນແລ້ວນີ້.
ລາວໄດ້ຖືກຂັງຄຸກຢູ່ໃນປາຣາໄກວ ເປັນເວລາ 6 ປີ ໃນຂໍ້ຫາຫຼີກລ່ຽງການເສຍພາສີ
ແຕ່ໄດ້ຖືກປ່ອຍໂຕໃນປີ 2008.
ຕຳຫຼວດບຣາຊີລ ໄດ້ກ່າວວ່າ “ພວກສະມາຊິກຂອງກຸ່ມບາຣາຄັດ ໄດ້ຊື້ກາຊີໂນ ທີ່ມີ
ມູນຄ່າ 10 ລ້ານໂດລາ ໂດຍທີ່ບໍ່ໄດ້ແຈ້ງມູນຄ່າການຊື້ຂາຍຂອງພວກເຂົາເຈົ້າ ໃຫ້
ທາງການຊາບ ທີ່ເມືອງອີກົວຊູ ຂອງອາເຈັນຕິນາ ເຊິ່ງທາງການມອງເຫັນວ່າ ເພື່ອ
ໃຊ້ເປັນການຟອກເງິນຂອງອົງການດັ່ງກ່າວນີ້.”
ອາເຈັນຕິນາ ຍັງໄດ້ກ່າວຫາທ້າວບາຣາຄັດວ່າ ຟອກເງິນໃຫ້ແກ່ກຸ່ມເຮສໂບລລາ
ແລະໄດ້ສັ່ງໃຫ້ກັກເງິນແລະຊັບສິນອື່ນໆ ຂອງທ້າວບາຣາຄັດ ອີງຕາມບັນດາເຈົ້າໜ້າທີ່
ຂອງອາເຈັນຕິນາ.
ຍັງບໍ່ເປັນທີ່ຈະແຈ້ງເທື່ອວ່າ ທ້າວ ບາຣາຄັດ ຈະປະເຊີນກັບຂໍ້ກ່າວຫາອັນໃດ ຢູ່ໃນ
ບຣາຊີລ ຫຼືວ່າ ຜູ້ກ່ຽວຈະຖືກສົ່ງໂຕ ໄປໃຫ້ທາງການປາຣາໄກວ.
ທ່ານ ຊີໂມນ ແຊມມີລສ໌ ຜູ້ອຳນວຍການດ້ານສາຍສຳພັນລະຫວ່າງປະເທດ ຢູ່ທີ່ສູນ
ກາງ ຊີໂມນ ໄວເຊັນໂຕລ (Simon Wiesenthal Center) ເຊິ່ງ ເປັນອົງການຄົ້ນຄວ້າ
ແລະປຸກລະດົມເພື່ອຕໍ່ຕ້ານການມີອະຄະຕິ ຄວາມກຽດຊັງ ແລະ ການກໍ່ການຮ້າຍ ຕໍ່
ຊາວຢິວ ໄດ້ກ່າວໃນຖະແຫລງການສະບັບນຶ່ງ ວ່າ ທ່ານຫວັງວ່າ ການຈັບກຸມຂອງທ້າວ
ບາຣາຄັດ ໃນເຂດຊາຍແດນ ລະຫວາງ 3 ປະເທດນັ້ນ ຈະເປັນ “ສັນຍານບົ່ງບອກວ່າ
3 ປະເທດນັ້ນ ຈະເລີ້ມຂັບໄລ່ ກຸ່ມເຮສໂບລລາ ອອກໄປຈາກອາເມຣິກາລາຕີນ.”
ສະຫະລັດ ໄດ້ຊີ້ແຈງວ່າ ທ້າວ ບາຣາຄັດ ເປັນ “ຜູ້ກໍ່ການຮ້າຍລະດັບໂລກ.”
