ສິບເອກ Bowe Bergdhal ກັບຄືນມາ ເຖິງ ສຫລ ແລ້ວ (ວີດີໂອ)

ສິບເອກທະຫານອາເມຣິກັນ ທີ່ຖືກພວກຕາລີບານຈັບເປັນເວລາ
ເກືອບ 5 ປີນັ້ນ ໄດ້ເດີນທາງກັບຄືນມາສູ່ສະຫະລັດແລ້ວ.

ເຈົ້າໜ້າທີ່ຂອງກອງທັບສະຫະລັດ ກ່າວວ່າ ສິບເອກ Bowe Berg-
dahl ທີ່ໄດ້ຮັບການປິ່ນປົວຢູ່ໂຮງໝໍທະຫານໃນເຢຍຣະມັນນັ້ນໄດ້ ເດີນທາງມາເຖິງສູນກາງການແພດກອງທັບບົກສະຫະລັດທີ່ເມືອງ
San Antonio ໃນ Texas ໃນຕອນເຊົ້າວັນສຸກມື້ນີ້.

ສິບເອກ Bergdahl ອາຍຸ 28 ປີໄດ້ຮັບອິດສະຫຼະພາບເມື່ອສອງອາ
ທິດກ່ອນ ເວລາປະທານາທິບໍດີສະຫະລັດ ທ່ານບາຣັກ ໂອບາມາ ໄດ້ຕົກລົງໃຫ້ມີການແລກ ປ່ຽນນັກໂທດ ໂດຍໄດ້ປ່ອຍພວກຜູ້ຕ້ອງສົງໄສ ເປັນຜູ້ກໍ່ການຮ້າຍ ຕາລີບານ 5 ຄົນ ຈາກຄຸກທະຫານທີ່ອ່າວ Guantanamo ໃນປະເທດຄິວບາ ແລະສົ່ງພວກ ກ່ຽວໄປຍັງ Qatar ຊຶ່ງໄດ້ຕົກລົງ ທີ່ໃຫ້ພວກກ່ຽວຢູ່ທີ່ນັ້ນ ເປັນເວລານຶ່ງປີ.

ຫຼັງຈາກໄດ້ມີການຕື່ນເຕັ້ນຂັ້ນຕົ້ນຢູ່ໃນສະຫະລັດກ່ຽວກັບການປ່ອຍຕົວສິບເອກ Bergdahl ແລ້ວ ກໍລະນີຂອງຜູ້ກ່ຽວໄດ້ກໍ່ໃຫ້ເກີດມີການອະພິປາຍກັນຢ່າງຂຸ້ນຂ້ຽວຢູ່ໃນທົ່ວປະເທດ. ສະ ມາຊິກລັດຖະສະພາບາງທ່ານຂອງສະຫະລັດ ໄດ້ຕຳໜິຕິຕຽນ ທ່ານໂອບາມາ ກ່ຽວກັບການ ປ່ອຍພວກເຈົ້າໜ້າທີ່ຕາລີບານ ຊຶ່ງພວກທ່ານເຊື່ອວ່າ ໃນທີ່ສຸດ ກໍຈະຊອກຫາຊ່ອງທາງເພື່ອ ທຳລາຍສະຫະລັດ ບໍ່ໃນທາງໃດ ກໍໃນທາງນຶ່ງ ໃນຂະນະທີ່ພວກອື່ນໆ ຕິຕຽນປະທານາທິບໍ
ດີວ່າ ບໍ່ປະຕິບັດຕາມ ກົດໝາຍສະຫະລັດ ທີ່ບັງຄັບວ່າ ຕ້ອງໄດ້ແຈ້ງ ໃຫ້ລັດຖະສະພາ ຊາບ ພາຍໃນເວລາ 30 ມື້ ກ່ອນທີ່ພວກນັກໂທດ ຢູ່ອ່າວ Guantanamo ຈະຖືກປ່ອຍນັ້ນ.