ທ້າວ Tsarnaev ວ່າ ການວາງລະເບີດ ຢູ່ບອສຕັນ ແມ່ນ ເພື່ອແກ້ແຄ້ນ

ແຫຼ່ງຂ່າວຂອງພວກເຈົ້າໜ້າທີ່ປະຕິບັດກົດໝາຍແຈ້ງໃຫ້ຊາບວ່າ ຜູ້ຕ້ອງສົງໄສທີ່ລອດຊີວິດມາໄດ້ໃນການວາງລະເບີດຢູ່ບ່ອນແຂ່ງ ແລ່ນມາຣາທອນທີ່ນະຄອນບອສຕັນໄດ້ຂຽນໃສ່ເຮືອບ່ອນທີ່ລາວ ຫຼົບລີ້ເອີ້ນການວາງລະເບີດວ່າ ເປັນການແກ້ແຄ້ນຕໍ່ສະຫະລັດທີ່
ທຳການໂຈມຕີຊາວມຸສລິມ ຢູ່ໃນອີຣັກແລະອັຟການິສຖານ.

ຕຳຫຼວດພົບວ່າ ທ້າວ Dzhokhar Tsarnaev ຫຼົບລີ້ໃນເຮືອຢູ່ຫຼັງ
ບ້ານເຮືອນຫຼັງນຶ່ງ ທີ່ເຂດຊານເມືອງ ຂອງນະຄອນບອສຕັນ 4 ມື້ ຫຼັງຈາກການວາງລະເບີດໃນວັນທີ 15 ເມສາທີ່ໄດ້ສັງຫານ 3 ຄົນ
ແລະບາດເຈັບອີກຫຼາຍກວ່າ 260 ຄົນ.

ສື່ມວນຊົນຂອງສະຫະລັດ ລາຍງານໃນວັນພະຫັດວານນີ້ວ່າ ທ້າວ Tsarnaev ເອີ້ນພວກ
ເຄາະຮ້າຍທີ່ນະຄອນບອສຕັນວ່າ “ຄວາມເສຍຫາຍຂ້າງຄຽງ”. ລາວເວົ້າວ່າ ສະຫະລັດຖື ພວກມຸສລິມທີ່ຖືກສັງຫານຢູ່ອີຣັກ ແລະອັຟການິສຖານ ໃນທຳນອງດຽວກັນ.

ສ່ວນນຶ່ງຂອງຄຳເວົ້າທີ່ລາວຂຽນໄວ້ນັ້ນ ກໍຄື “ເວລາເຈົ້າໂຈມຕີຊາວມຸສລິມຄົນນຶ່ງ ກໍຄືເຈົ້າ
ໂຈມຕີຊາວມຸສລິມທັງມວນ.”

ຕຳຫຼວດ ໄດ້ຍິງທ້າວ Tsarnaev ບາດເຈັບສາຫັດ ກ່ອນທີ່ຈະຈັບລາວໄດ້ ແລະເວລານີ້ຜູ້
ກ່ຽວພວມພັກຟື້ນຢູ່ຄຸກທີ່ເປັນໂຮງໝໍແຫ່ງນຶ່ງເພື່ອລໍຖ້າການດຳເນີນຄະດີ. ອ້າຍຂອງທ້າວ Tsarnaev ຄືທ້າວ Tamerlan ໄດ້ເສຍຊີວິດໃນການຍິງຕໍ່ສູ້ກັນກັບຕຳຫຼວດນຶ່ງມື້ກ່ອນໜ້າ ນັ້ນ.