ລິ້ງ ສຳຫລັບເຂົ້າຫາ

ເຫດລະເບີດ ຢູ່ຕະຫຼາດ ປາກິສຖານ ສັງຫານ ບໍ່ຕ່ຳກວ່າ 22 ຄົນ


ເຈົ້າໜ້າທີ່ຮັກສາຄວາມສະຫງົບປາກິສຖານ ແລະປະຊາຊົນ ໃນເຂດທ້ອງຖິ່ນ ຊຸມນຸມກັນຢູ່ບ່ອນເກີດລະເບີດ ທີ່ຕະຫຼາດ ເມືອງ Parachinar ໃນເຂດຊົນເຜົ່າ Kurram ໃກ້ຊາຍແດນ ອັຟການິສຖານ. (21 ມັງກອນ 2017)

ລະ​ເບີດ​ຂະໜາດ​ແຮງ ​ໄດ້​ແຕກ​ຂຶ້ນທີ່​ຕະຫຼາດ​ແຫ່ງ​ນຶ່ງ ​ໃນ​ພາກ​ຕາ​ເວັນ​ຕົກ​ສຽງ​ເໜືອ​ຂອງ​ ປາ​ກິ​ສຖານ​ໃນ​ວັນ​ເສົາ​ມື້ນີ້ເຮັດ​ໃຫ້​ມີ​ຜູ້​ເສຍ​ຊີວິດ​ຢ່າງ​ໜ້ອຍ 22 ຄົນ ​ແລະ​ໄດ້​ຮັບ​ບາດ​ເຈັບ​ອີກ​ຫລາຍ​ກວ່າ 50 ຄົນ.

​ເຫດ​ລະ​ເບີດ​ໃນ​ຕອນ​ເຊົ້າມື້ນີ້ ທີ່​ເມືອງ Parachinar ຊຶ່ງ​ເປັນ​ສູນ​ກາງ​ບໍລິຫານຂອງ​ເຂດ​ຊົນ​ເຜົ່າ Kurram ທີ່​ມີ​ຊາຍ​ແດນ​ຕິດ​ກັບ​ອັຟກາ​ນິສຖານ.

​ເຈົ້າໜ້າ​ທີ່​ກ່າວວ່າ ການ​ສືບສວນ​ໃນ​ຂັ້ນຕົ້ນ​ແນະ​ໃຫ້​ເຫັນ​ວ່າ ​ເປັນ​ລະ​ເບີດ​ທີ່​ຄວບຄຸມ​ຈາກ​ໄລຍະ​ໄກ ທີ່​ເຊື່ອງ​ໄວ້​ໃນຖົງ​ເປ້ ​ໄດ້​ແຕກ​ຂຶ້ນ​ໃນ​ເວລາ​ທີ່​ຕະຫຼາດດັ່ງກ່າວ ​ເຕັມ​ໄປ​ດ້ວຍ​ລູກ​ຄ້າ.

ພວກ​ກູ້​ໄພ​ແລະ​ສະມາຊິກ​ສະພາ​ທ້ອງ​ຖິ່ນ ທ່ານ Sajid Hussain Turi ກ່າວ ຕໍ່​ພວກ​ນັກ​ຂ່າວ​ວ່າ ​ໂຕ​ເລກ​ຜູ້​ເສຍ​ຊີວິດ​ມີ​ທ່າ​ທາງ​ວ່າ​ຈະ​ເພີ້ມຂຶ້ນຕື່ມ ຍ້ອນ​ວ່າ ມີຫລາຍໆ​ຄົນ​ໄດ້​ຮັບ​ບາດ​ເຈັບ​ສາຫັດ.

​ເຮືອບິນ​ເຮຣີຄອບ​ເຕີ້ ຂອງກອງທັບ​ປາ​ກິ​ສຖາ​ນ ກໍ​ໄດ້​ຊ່ອຍ​ເຈົ້າໜ້າ​ທີ່​ພົນລະ​ເຮືອນ ໃນ​ການຂົນ​ສົ່ງ​ພວກ​ທີ່​ໄດ້​ຮັບ​ບາດ​ເຈັບ​ຈາກ​ເຂດ​ຊາຍ​ແດນ​ທີ່​ສອກຫຼີກ​ຫ່າງ​ໄກໄປ​ຫາ​ໂຮງ ໝໍທີ່​ເມືອງ Peshawar.

ໂຄສົກ​ຂອງ​ກຸ່ມ​ຕາ​ລີ​ບານ ​ທີ່​ຕໍ່ຕ້ານ​ລັດຖະບານ​ປາ​ກິ​ສຖານ ​ໄດ້ອ້າງ​ເອົາ​ຄວາມ​ຮັບຜິດ ຊອບ​ໃນ​ການ​ໂຈມ​ຕີຕໍ່​ອັນ​ທີ່​ລາວ​ກ່າວ​ວ່າ ​ເປັນ​ການ​ໂຈມ​ຕີ​ສະຫຼະຊີບເພື່ອ​ແກ້ແຄ້ນ​ໃນ​ການ​ສັງຫານສະມາຊິກ​ຂອງ​ຕົນ​ທີ່​ຖືກ​ຄຸມຂັງຢູ່ໃນ​ການ​ກ່າວ​ຫາ​ທີ່​ວ່າເປັນ​ການ​ປະຕິ​ບັດ​ງານ​ປອມ​ຂອງ​ຕຳຫຼວດນັ້ນ.

​ເຂດ Kurram ​ແມ່ນ​ສ່ວນນຶ່ງ​ຂອງ 7 ​ເຂດ​ເຄິ່ງ​ປົກຄອງ​ຕົນ​ເອງຂອງ​ຊົນ​ເຜົ່າທີ່​ຄຸ້ມ​ຄອງ​ໂດຍລັດຖະບານ​ກາງ ສ່ວນ​ໃຫຍ່​ແລ້ວ​ແມ່ນ​ຕັ້ງຢູ່​ໃກ້ໆ​ຊາຍ​ແດນ​ອັຟການິສຖານ.

​ເຂດ​ຊົນ​ເຜົ່າ​ທີ່​ຍາວ​ຢຽດຕິດ​ຕໍ່​ກັນນີ້​ແມ່ນ​ຖືກ​ໃຊ້​ເປັນ​ບ່ອນ​ຫລົບ​ລີ້ມາ​ເປັນ​ເວລາ​ດົນ​ນານ​ແລ້ວ ຂອງ​ພວກ​ຫົວ​ຮຸນ​ແຮງ​ໃນທ້ອງ​ຖິ່ນແລະ​ຕ່າງປະ​ເທດ ​ແຕ່​ເຈົ້າໜ້າ​ທີ່ກ່າວ​ເມື່ອ​ໄວໆ​ມານີ້ວ່າ ການ​ປະຕິບັດ​ງານ​ຕໍ່​ຕ້ານ​ພວກ​ຫົວ​ຮຸນ​ແຮງ​ຂະໜາດ​ໃຫຍ່ ພາຍ​ໃຕ້​ການ​ນຳພາ​ຂອງ​ກອງທັບ​ໄດ້​ກວດ​ລ້າງ​ພື້ນທີ່​ສ່ວນ​ໃຫຍ່​ຂອງ​ເຂດ​ດັ່ງກ່າວນີ້​ແລ້ວ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG