4 ຄົນ ເສຍຊີວິດ ໃນການໂຈມຕີ ຂະບວນລົດ ຜູ້ສະໝັກ ປະທານາທິບໍດີ ອັຟການິສຖານ (ສະໄລດ໌/ວີດີໂອ)

ມີຜູ້ເສຍຊີວິດ ຢ່າງໜ້ອຍ 4 ຄົນ ຫລັງຈາກໄດ້ມີການໂຈມຕີດ້ວຍ
ລະເບີດ 2 ລູກ ໃສ່ຂະບວນລົດຂອງທ່ານ Abdullah Abdullah ຜູ້ສະໝັກປະທານາທິບໍດີທີ່ໄດ້ຮັບຄະແນນສຽງຫຼາຍກວ່າໝູ່ຂອງ
ອັຟການິສຖານ.

ນອກນັ້ນຍັງມີອີກຢ່າງໜ້ອຍ 16 ຄົນໄດ້ຮັບບາດເຈັບຍ້ອນເຫດ
ລະເບີດ ຊຶ່ງເກີດຂຶ້ນບໍ່ດົນ ຫລັງຈາກ ທ່ານ Abdullah ໄດ້ອອກ ຈາກບ່ອນໂຄສະນາຫາສຽງ ທີ່ນະຄອນຫລວງກາບູລ ໃນວັນສຸກ
ມື້ນີ້. ເຈົ້າໜ້າທີ່ຮັກສາຄວາມສະຫງົບກ່າວວ່າ ນຶ່ງໃນເຫດລະເບີດ ແມ່ນເປັນການໂຈມຕີສະຫຼະຊີບ.

ທ່ານ Abdullah ບໍ່ໄດ້ຮັບບາດເຈັບແຕ່ປະການໃດ ແຕ່ໃນຖະແຫຼງການທີ່ອອກທາງ ໂທລະພາບບໍ່ດົນຫລັງຈາກໄດ້ມີການໂຈມຕີນັ້ນ ທ່ານເວົ້າວ່າ ອາລັກຂາຂອງທ່ານ 2
ຄົນໄດ້ຮັບບາດເຈັບ.

ຍັງບໍ່ທັນມີກຸ່ມໃດອ້າງເອົາຄວາມຮັບຜິດຊອບເທື່ອ. ແຕ່ໃນມື້ວັນຈັນຜ່ານມານີ້ກຸ່ມຕາ ລີບານເຕືອນພວກມີສິດປ່ອນບັດ ບໍ່ໃຫ້ໄປໃຊ້ສິດໃຊ້ສຽງໃນລະຫວ່າງການປ່ອນບັດ ເລືອກຕັ້ງປະທານາທິບໍດີຮອບສອງ ໃນວັນທີ 14 ມິຖຸນານີ້.

ກຸ່ມຫົວຮຸນແຮງດັ່ງກ່າວໄດ້ອອກຖະແຫຼງການເວົ້າວ່າ ຕົນວາງແຜນທີ່ຈະທຳການໂຈມ ຕີເພີ້ມຂຶ້ນແນໃສ່ເພື່ອລົບກວນການປ່ອນບັດ ຊຶ່ງມີຂຶ້ນ ຍ້ອນບໍ່ມີຜູ້ສະໝັກຄົນໃດເປັນ ຜູ້ຊະນະແບບເດັດຂາດໃນການເລືອກຕັ້ງຮອບທຳອິດ ເມື່ອວັນທີ 5 ເມສາຜ່ານມາ.

ທ່ານ Abdullah ແມ່ນເປັນອະດີດລັດຖະມົນຕີຕ່າງປະເທດອັຟການິສຖານ. ທ່ານໄດ້ ຮັບຄະແນນສຽງທັງໝົດ 45 ເປີເຊັນ ໃນການປ່ອນບັດເມື່ອເດືອນເມສາ. ທ່ານຈະທຳ ການແຂ່ງຂັນກັບທ່ານ Ashraf Ghani ອະດີດເຈົ້າໜ້າທີ່ທະນາຄານໂລກ.