ທີ່ປຶກສາດ້ານຄວາມປອດໄພແຫ່ງຊາດຂອງສະຫະລັດ ທ່ານຈອນ ໂບລຕັນໄດ້ໃຫ້
ຮ່ອງຮອຍວ່າ ຂໍ້ຕົກລົງຄວບຄຸມອາວຸດທີ່ສຳຄັນ ກັບຣັດເຊຍ ອາດຈະໄດ້ດຳເນີນໄປ
ຕາມທິດທາງຂອງມັນ.
ທ່ານໂບລຕັນ ພົບກັບປະທານາທິບໍດີຣັດເຊຍ ທ່ານວລາດິເມຍ ປູຕິນ ໃນວັນອັງຄານ
ມື້ນີ້ ທີ່ມົສກູ ເພື່ອອະທິບາຍເຖິງສາເຫດວ່າເປັນຫຍັງປະທານາທິບໍດີດໍໂນລ ທຣຳ
ຈຶ່ງຕ້ອງການຢາກຈະຖອນສະຫະລັດ ອອກຈາກສົນທິສັນຍາກຳລັງນິວເຄລຍໄລຍະ
ປານກາງ ປີ 1987 ນີ້.
ທ່ານທຣຳ ໄດ້ກ່າວຫາຣັດເຊຍ ວ່າໄດ້ລະເມີດສົນທິສັນຍາ ດັ່ງກ່າວ.
“ພວກເຮົາບໍ່ຄິດວ່າ ການຖອນຕົວອອກຈາກສົນທິສັນຍານີ້ຈະສ້າງບັນຫາໃດໆ.
ພວກເຮົາຄິດວ່າ ສິ່ງທີ່ຣັດເຊຍໄດ້ກະທຳຕະຫຼອດມານັ້ນ ແມ່ນການລະເມີດຕໍ່ສົນທິ
ສັນຍາ ນັ້ນຄືບັນຫາ,” ທ່ານໂບລຕັນ ໄດ້ບອກໜັງສືພິມ Kommersant ຂອງຣັດເຊຍ
ໄວ້ ແລະທ່ານໄດ້ກ່າວຕື່ມວ່າ “ທ່ານບໍ່ສາມາດນຳ ເອົາຜູ້ໃດນຶ່ງມາປະຕິບັດຕາມໄດ້
ທີ່ເຂົາເຈົ້າຄິດບໍ່ຄິດວ່າ ເຂົາໄດ້ລະເມີດສົນທິສັນຍານັ້ນ.”
ທ່ານໂບລຕັນ ໄດ້ກ່າວວ່າ ທ່ານເຊື່ອວ່າ ສົນທິສັນຍາສອງຝ່າຍໃນຍຸກສົງຄາມເຢັນ
ແມ່ນບໍ່ໄດ້ສອດຄ່ອງແລ້ວ ຍ້ອນສະພາບການຮັກສາຄວາມປອດໄພໃນທົ່ວໂລກ
ຂອງທຸກມື້ນີ້, ບ່ອນທີ່ບັນດາປະເທດທັງຫຼາຍ ແມ່ນກຳລັງພັດທະນາລູກສອນໄຟກັນ.
ອະດີດປະທານາທິບໍດີມີແຄລ ກໍບາຊອບ ກັບມື້ລາງປະທານາທິບໍດີຣອນໂນລດ໌
ເຣເກິນ ໄດ້ລົງນາມໃນສົນທິສັນຍາ INF ໃນປີ 1987. ສົນທິສັນຍາດັ່ງກ່າວ
ແມ່ນເກືອດຫ້າມສະຫະລັດ ແລະຣັດເຊຍ ບໍ່ໃຫ້ສ້າງ, ທົດລອງ, ສະສົມລູກ ສອນໄຟ
ນິວເຄຼຍ ທີ່ຍິງຈາກພາກພື້ນດິນ ໄລຍະຕັ້ງແຕ່ 500 ຫາ 5,000 ກິໂລແມັດໄວ້ໃນສາງ.
ທ່ານທຣຳ ໄດ້ກ່າວວ່າ ສະຫະລັດ ແມ່ນຄວນທີ່ຈະພັດທະນາອາວຸດໃໝ່ ຖ້າຫາກວ່າ
ຣັດເຊຍ ແລະຈີນ ເຮັດ ຊຶ່ງບໍ່ແມ່ນພາກສ່ວນຂອງສົນທິສັນຍາ INF ນີ້.
ຣັດເຊຍ ປະຕິເສດວ່າ ຕົນບໍ່ໄດ້ລະເມີດຂໍ້ຕົກລົງທີ່ວ່ານີ້ ແລະກ່າວວ່າ ລະບົບປ້ອງກັນ
ລູກສອນໄຟສະຫະລັດ ໃນສະຫະພາບຢູໂຣບນັ້ນ ແມ່ນເປັນການລະເມີດແລ້ວ.
ໂຄສົກຂອງທ່ານປູຕິນ ກ່າວວ່າ ການຖອນຕົວສະຫະລັດ ອອກຈາກສົນທິສັນຍາ INF
ຈະເຮັດໃຫ້ໂລກ ມີອັນຕະລາຍຫຼາຍຂຶ້ນ. ທ່ານໄດ້ກ່າວວ່າຣັດເຊຍ ແມ່ນຈະໄດ້ເອົາ
ມາດຕະການດ້ານຄວາມປອດໄພ ເພື່ອ “ຟື້ນຟູຄວາມກ້ຳເກິ່ງໄວ້.”
ປະທານສະພາຄວາມໆໝັ້ນຄົງຂອງຣັດເຊຍ ທ່ານນິໂຄໄລນ໌ ປາທຣັສເຊບວ໌
ໄດ້ກ່າວ ຫຼັງຈາກທີ່ທ່ານໄດ້ໂອ້ລົມກັບທ່ານໂບລຕັນໃນວັນຈັນວານນີ້ວ່າ ຣັດເຊຍ
ແມ່ນຈະສົນທະນາກັບສະຫະລັດ ກ່ຽວກັບການປະຕິບັດຕາມຂໍ້ຕົກລົງນີ້ ຊຶ່ງເປັນ
ຄວາມພະຍາຍາມອີກອັນນຶ່ງ ທີ່ຈະກອບກູ້ສົນທິສັນຍາ INF.
