ລາຍງານຂ່າວຂອງເກົາຫລີໃຕ້ແລະຍີ່ປຸ່ນເວົ້າວ່າ ຜູ້ນໍາເກົາ ຫລີເໜືອ ທ່ານຄິມ ຈົງ ອິລ ກໍາລັງເດີນທາງກັບຄືນບ້ານ ຫລັງຈາກໄປຢ້ຽມຢາມຈີນຢ່າງລັບໆ ເປັນເວລາສາມມື້.
ອົງການຂ່າວກຽວໂດ໊ະຂອງຍີ່ປຸ່ນລາຍງານວ່າ ລົດໄຟຂະ ບວນພິເສດ ທີ່ບັນທຸກຄະນະຜູ້ແທນເກົາຫລີເໜືອ ໄດ້ອອກ ຈາກເມືອງ Changchun ຂອງແຂວງຈິລິນ ທາງທິດຕາ ເວັນອອກສຽງເໜືອຂອງຈີນ ໃນຕອນແລງຂອງວັນເສົາ ວານນີ້.
ອົງການຂ່າວຢົນຮັບຂອງເກົາຫລີໃຕ້ກໍເວົ້າວ່າ ມີຄົນເຫັນ ຂະບວນລົດໄຟພິເສດດັ່ງກ່າວໃນເວລາຕໍ່ມາ ຢູ່ໄກ້ເຂດຊາຍແດນເກົາຫລີເໜືອ.
ກ່ອນໜ້ານັ້ນໃນມື້ວານນີ້ ທ່ານຄິມ ໄດ້ໄປຢ້ຽມຊົມງານສະແດງການກະເສດນາໆຊາດ ທີ່ຈັດຂື້ນຢູ່ເຂດ ຊານເມືອງ Changchun ນັ້ນ.
ວົງການສື່ມວນຊົນຂອງທັງທາງການເກົາຫລີເໜືອ ແລະຈີນ ບໍ່ໄດ້ອອກລາຍງານລາຍ ລະອຽດກ່ຽວກັບການຢ້ຽມຢາມຈີນຂອງຜູ້ນໍາເກົາຫລີເໜືອ ແຕ່ຢ່າງໃດ ຊຶ່ງເວົ້າກັນວ່າ ເປັນການໄປຢ້ຽມຢາມຈີນຄັ້ງທີ່ສອງຂອງ ທ່ານ ຄິມ ຈົງ ອິລ ໃນປີນີ້.
ສື່ມວນຊົນເກົາຫລີໃຕ້ໄດ້ອ້າງເອົາຄໍາເວົ້າຂອງແຫລ່ງຂ່າວການທູດ ທີ່ບໍ່ບອກຊື່ວ່າ ທ່ານຄິມ ໄດ້ພົບປະກັບທ່ານ ຫູ ຈິນ ເຖົາ ປະທານປະເທດຈີນ ໃນວັນສຸກຜ່ານມານີ້. ລາຍງານຍັງ ເວົ້າອີກວ່າ ນາຍຄິມ ຈົງ ອັນ ລູກຊາຍຫລ້າຂອງທ່ານຄິມ ກໍໄດ້ເດີນທາງ ໄປກັບພໍ່ໃນຄັ້ງນີ້ ຊຶ່ງມີການສັນນິຖານກັນວ່າ ຜູ້ກ່ຽວອາດໄດ້ຖືກພາໄປແນະນຳຕົວວ່າ ຈະເປັນຜູ້ສືບຕໍ່ຕໍາແໜ່ງ ແທນພໍ່ ກໍເປັນໄດ້.
