ກອງທັບໄນຈີເຣຍ ກ່າວວ່າ ກອງກຳລັງຂອງຕົນ ໄດ້ຂັບໄລ່
ການໂຈມຕີເທື່ອຫລ້າສຸດ ຂອງພວກນັກຕໍ່ສູ້ຫົວຮຸນແຮງ
Boko Haram ເພື່ອຍຶດເອົາເມືອງ Maiduguri ທີ່ສຳຄັນ
ຢູ່ທາງພາກຕາເວັນອອກສຽງເໜືອ ນັ້ນ.
ບັນດາເຈົ້າໜ້າທີ່ທະຫານ ກ່າວວ່າ ການໂຈມຕີເມືອງ Maiduguri
ໃນວັນອາທິດວານນີ້ ແມ່ນໄດ້ຖືກຄວບຄຸມ ແລະຕ້ານຢັນໄວ້ໄດ້
ຫຼັງຈາກທີ່ພວກຫົວຮຸນແຮງ Boko Haram ໄດ້ທຳການປິດລ້ອມ
ເມືອງໄວ້ ຈາກສີ່ເສັ້ນທາງ ເປັນເວລາ ຫຼາຍກວ່າ 12 ຊົ່ວໂມງ.
ເຈົ້າໜ້າທີ່ກ່າວວ່າ ພວກຫົວຮຸນແຮງຫຼາຍຄົນຖືກຂ້າຕາຍ ໃນ
ລະຫວ່າງ ການຕໍ່ສູ້ກັນ ໃນເມືອງຫລວງຂອງລັດ Borno. ພົນລະເຮືອນຫຼາຍຄົນເສຍຊີວິດເຊັ່ນກັນ.
ນັກຂ່າວວີໂອເອ ໄດ້ເຫັນພົນລະເຮືອນຫຼາຍຮ້ອຍຄົນ ຖືປືນ
ລ່າສັດ ໄມ້ຄ້ອນ ແລະ ງ້າວພາກັນມຸ່ງໜ້າໄປຍັງເຂດສູ້ລົບ
ຂະນະທີ່ກ່າວວ່າ ພວກເຂົາຢາກຊ່ອຍພວກທະຫານ ຢຸດ
ຢັ້ງພວກຫົວຮຸນແຮງ.
ໃນອີກຂ່າວໜຶ່ງນັ້ນ ແຫລ່ງຂ່າວຈາກໜ່ວຍຮັກສາຄວາມປອດໄພ
ກ່າວວ່າ ການວາງລະເບີດສະຫລະຊີບ ທີ່ມີເປົ້າໝາຍແນໃສ່
ກອງປະຊຸມທາງການເມືອງບັ້ນໜຶ່ງ ໃນເມືອງ Potiskum ທາງ
ພາກຕາເວັນອອກສຽງເໜືອ ຂອງໄນຈີເຣຍ ໄດ້ສັງຫານຢ່າງນ້ອຍ
7 ຄົນ. ແລະຜູ້ເຫັນເຫດການ ກ່າວວ່າ ລະເບີດລູກນຶ່ງທີ່ແຕກຂຶ້ນ ໃນເມືອງ Gombe
ທາງທິດຕາເວັນຕົກສຽງໃຕ້ ຂອງເມືອງ Maiduguri ໄດ້ສັງຫານ 2 ຄົນ.
ເຫດການເຫຼົ່ານີ້ ມີຂຶ້ນ 2 ອາທິດ ກ່ອນໜ້າການເລືອກຕັ້ງທົ່ວໄປ ທີ່ຈະມີຂຶ້ນ ໃນວັນທີ 14 ກຸມພານີ້.
