ຜູ້ນຳກຸ່ມຫົວຮຸນແຮງຈັດ Boko Haram ຂອງໄນຈີເຣຍ ກ່າວວ່າ
ພວກເດັກນັກຮຽນຍິງ 219 ຄົນ ທີ່ຖືກລັກພາໂຕໄປ ຈາກເມືອງ
Chibok ໃນຕົ້ນປີນີ້ໄດ້ພາກັນປ່ຽນໄປນັບຖືສາສະໜາອິສລາມ ແລະກໍແຕ່ງງານໝົດແລ້ວ.
ທ້າວ Abubarka Shekau ກ່າວຢູ່ໃນວີດີໂອວ່າ ພວກເດັກຍິງທີ່
ລາວເວົ້າວ່າເວລານີ້ຢູ່ເຮືອນກັບຜົວເຂົາເຈົ້ານັ້ນແມ່ນພາກັນທ່ອງ ຂຶ້ນໃຈສອງບົດຂອງຄຳພີໂກຣ່ານ.
ໄນຈີເຣຍປະກາດວ່າ ຕົນໄດ້ທຳການເຈລະຈາກັບກຸ່ມ Boko Ha-
ram ເພື່ອໃຫ້ປ່ອຍພວກເດັກຍິງເຫຼົ່ານີ້. ທ້າວ Shekau ປະຕິເສດ ຕໍ່ການກ່າວອ້າງດັ່ງກ່າວໂດຍເວົ້າວ່າ ລາວບໍ່ຮູ້ຈັກກັບຜູ້ຊາຍທີ່ອ້າງວ່າເປັນຜູ້ຕາງໜ້າຂອງ
ກຸ່ມ Boko Haram ໃນການເຈລະຈາກັນນັ້ນ.
ທ້າວ Shekau ເວົ້າວ່າ ບັນຫາຂອງພວກເດັກນ້ອຍນັກຮຽນຍິງຈຸນີ້ແມ່ນລືມກັນໄປດົນແລ້ວ.
ກຸ່ມປົກປ້ອງສິດທິມະນຸດ Human Rights Watch ໄດ້ພິມເຜີຍແຜ່ລາຍງານ ສະບັບນຶ່ງ ໃນຕົ້ນອາທິດນີ້ ເວົ້າວ່າ ກຸ່ມ Boko Haram ໄດ້ຈັບພວກແມ່ຍິງແລະເດັກນ້ອຍແມ່ຍິງໄວ້ ຫລາຍເຖິງ 500 ຄົນ ແລະການບັງຄັບໃຫ້ແຕ່ງງານ ແມ່ນເປັນເລື່ອງທຳມະດາຢູ່ໃນຄ້າຍ ຂອງພວກຫົວຮຸນແຮງ. ອະດີດໂຕປະກັນຄົນນຶ່ງແຈ້ງໃຫ້ກຸ່ມປົກປ້ອງສິດທິມະນຸດດັ່ງກ່າວ ຊາບວ່າ ນາງໄດ້ເຫັນພວກນັກຮຽນຍິງບາງຄົນ ຈາກເມືອງ Chibok ຖືກບັງຄັບໃຫ້ເຮັດ
ກິນ ແລະທຳຄວາມສະອາດມ້ຽນມັດ ໃຫ້ແກ່ພວກແມ່ຍິງ ແລະເດັກຍິງຈຸນຶ່ງ ທີ່ໄດ້ຖືກຄັດ ເລືອກເປັນພິເສດ ຍ້ອນຄວາມງາມຂອງພວກເຂົາເຈົ້າ.
ກຸ່ມປົກປ້ອງສິດທິມະນຸດ Human Rights Watch ກ່າວວ່າ ຄຳໃຫ້ການ ຂອງພວກພະ ຍານແລະຜູ້ເຄາະຮ້າຍ ກ່ຽວກັບການລັກພາໂຕ ຂອງກຸ່ມ Boko Haram ແມ່ນແນະໃຫ້ ເຫັນວ່າ ລັດຖະບານໄນຈີເຣຍບໍ່ໄດ້ດຳເນີນການຢ່າງເປັນການພຽງພໍເພື່ອປົກປ້ອງພວກ ແມ່ຍິງແລະເດັກຍິງ ຈາກການປະຕິບັດທີບໍ່ຖືກບໍ່ຕ້ອງຈຳນວນມະຫາສານຕໍ່ພວກແມ່ຍິງ ຫຼືໃຫ້ການສະໜັບສະໜຸນຕໍ່ພວກເຂົາເຈົ້າຢ່າງມີປະສິດທິຜົນຕະຫຼອດທັງດ້ານສຸຂະພາບ ຈິດແລະການປິ່ນປົວພະຍາບານ ຫລັງຈາກຖືກລັກພາໂຕໄປ. ລາຍງານທີ່ຍາວ 63 ໜ້າ ຍັງເວົ້າວ່າໄນຈີເຣຍແມ່ນບໍ່ສາມາດທຳການສືບສວນແລະລົງໂທດຕໍ່ພວກທີ່ຮັບຜິດຊອບ ໃນການກໍ່ລ່ວງລະເມີດເຫຼົ່ານີ້.
ທ້າວ Shekau ຊຶ່ງເປັນຜູ້ນຳຂອງກຸ່ມ Boko Haram ໄດ້ກ່າວເຖິງອີກເລື່ອງນຶ່ງ ຢູ່ໃນວີດີ ໂອໂດຍອ້າງວ່າກຸ່ມຂອງລາວມີໂຕປະກັນຊາວເຢຍຣະມັນທີ່ຖືກລັກພາໂຕໄປເມື່ອເດືອນ ກໍລະກົດຜ່ານມານີ້.
