ລິ້ງ ສຳຫລັບເຂົ້າຫາ

ວັນອາທິດ, ໑໔ ເມສາ ໒໐໒໔

ເຈົ້າໜ້າທີ່ ພົບ 32 ສົບ ຢູ່ພາກໃຕ້ ເມັກຊິໂກ ທີ່ສົງໄສ ເປັນນ້ຳມື ກຸ່ມຄ້າຢາເສບຕິດ


ຮູບພາບຂອງພວກທີ່ຫາຍສາບສູນ ວາງສະແດງໃຫ້ເຫັນຢູ່ໃນ ເມືອງ Iguala, ລັດ Guerrero ປະເທດ Mexico.
ຮູບພາບຂອງພວກທີ່ຫາຍສາບສູນ ວາງສະແດງໃຫ້ເຫັນຢູ່ໃນ ເມືອງ Iguala, ລັດ Guerrero ປະເທດ Mexico.

ພວກ​ນັກ​ສືບສວນ​ຢູ່​ພາ​ກ​ໃຕ້​ເມັກ​ຊິ​ໂກ ​ໄດ້​ພົບ​ເຫັນຊາກ​ສົບ​ຂອງ 32 ຄົນ ​ແລະ​ຫົວ​ຄົນ​ເກົ້າ​ຫົວ​ທີ່​ໄດ້​ຝັງ​ໄວ້ຢູ່​ໃນ​ຂຸ​ມລັບ​ຈຳນວນ​ນຶ່ງ.

ການ​ຄົ້ນ​ພົບ​ທີ່​ໜ້າ​ຢ້ານ​ກົວ​ດັ່ງກ່າວ​ແມ່ນຖືກ​ຂຸດ​ຂຶ້ນ​ມາ ຈາກ​ສິບກວ່າຂຸມທີ່​ຝັງເຊື່ອງ​ໄວ້ຢູ່​ໃນ​ເມືອງ Zitlala ລັດ Guerrero ຊຶ່ງ​ເປັນ​ທີ່​ຕັ້ງ ຂອງ​ກຸ່ມ​ຄ້າຢາ​ເສ​ບຕິດທີ່​ເປັນ​ຄູ່​ແຂ່ງ​ກັນ ຫຼາຍໆ​ກຸ່ມ. ​ເຂດ​ດັ່ງກ່າວ ​ໄດ້​ປະສົບ​ກັບ​ຄື້ນຟອງ ​ການ​ລັກພາ​ໂຕ ການ​ຄາດ​ຕະ​ກຳ ແລະ​ການ​ຍາດ​ແຍ່ງ​ກັນ​ເຂດ​ຄວບ​ຄຸມ. ກຸ່ມ​ຄ້າ​ຢາ​ເສບ​ຕິດ ແມ່ນເປັນທີ່​ຮູ້​ກັນ​ດີວ່າ ​ໄດ້ຝັງ​ພວກ​ເຄາະ​ຮ້າຍ​ຢູ່​ໃນ​ຂຸມ​ຝັງ​ສົບ​ລັບຈຳນວນ​ນຶ່ງ.

ພວກ​ເຈົ້າ​ໜ້າ​ທີ່​ ກ່າວ​ວ່າ​ ຊາກ​ສົບ​ເຫຼົ່ານີ້​ໄດ້​ຖືກ​ສົ່ງ​ໄປ​ທີ່​ເມືອງ Chilpancingo ​ຊຶ່ງ​ເປັນ​ເມືອງ​ເອກຂອງ​ລັດ ​ເພື່ອ​ທຳ​ການ​ພິສູດ.

ກຳລັງ​ຮັກສາ​ຄວາມ​ປອດ​ໄພ​ເມັກ​ຊິ​ໂກ ​ໄດ້​ພົບ​ເຫັນ​ຊາກ​ສົບ​ເຫຼົ່ານີ້ ​ຫລັງ​ຈາກ​ໄດ້​ຮັບ​ຂ່າວ​ໂດຍ​ພວກ​ທີ່​ບໍ່​ບອກ​ຊື່ວ່າ ມີ​ຄົນ​ຖືກ​ກັກ​ຂັງ​ໄວ້ ​ຢູ່​ໃນ​ສູນ​ແຫ່ງ​ນຶ່ງ​. ​ເວລາ​ເຂົາ​ເຈົ້າໄປ​ເຖິງ​ບ່ອນ​ດັ່ງກ່າວ ​ເຂົາ​ເຈົ້າ​ໄດ້​ພົບ​ເຫັນ​ຜູ້​ເຄາະ​ຮ້າຍ ​ທີ່​ຖືກ​ລັກພາ​ໂຕ. ລາຍ​ລະອຽດ​ກ່ຽວ​ກັບ​ຜູ້​ເຄາະ​ຮ້າຍ​ ຍັງ​ບໍ່​ທັນມີ​ການ​ເປີດ​ເຜີຍໃນທັນ​ທີ​ເທື່ອ.

ອ່ານຂ່າວນີ້ເພີ້ມເປັນພາສາອັງກິດ

XS
SM
MD
LG