ລັດຖະມົນຕີການຕ່າງປະເທດ ສະຫະລັດ ທ່ານ ແອນໂທນີ ບລິງເຄັນ ໃນວັນອັງຄານວານນີ້ໄດ້ເຕືອນ ອີຣ່ານ ວ່າ ສະຫະລັດ ຈະຕອບໂຕ້ “ຢ່າງເດັດຂາດ” ຕໍ່ການໂຈມຕີໃດໆໂດຍພວກຕົວແທນຂອງເຂົາເຈົ້າ, ໃນຂະນະທີ່ຄວາມເຄັ່ງຕຶງໄດ້ເພີ່ມຂຶ້ນໃນສົງຄາມລະຫວ່າງ ອິສຣາແອລ ແລະ ກຸ່ມຮາມາສ.
ທ່ານ ບລິງເຄັນ ໄດ້ກ່າວຕໍ່ກອງປະຊຸມສະພາຄວາມໝັ້ນຄົງ ສະຫະປະຊາຊາດ ວ່າ “ສະຫະລັດ ບໍ່ໄດ້ສະແຫວງຫາຄວາມຂັດແຍ້ງກັບ ອີຣ່ານ. ພວກເຮົາບໍ່ຢາກໃຫ້ສົງຄາມນີ້ແຜ່ກວ້າງອອກ. ແຕ່ຖ້າ ອີຣ່ານ ຫຼື ຕົວແທນທັງຫຼາຍຂອງພວກເຂົາໂຈມຕີເຈົ້າໜ້າທີ່ ສະຫະລັດ ຢູ່ບ່ອນໃດກໍ່ຕາມ, ໂດຍບໍ່ມີຄວາມຜິດພາດ. ພວກເຮົາຈະປ້ອງກັນປະຊາຊົນຂອງພວກເຮົາ, ພວກເຮົາຈະປ້ອງກັນຄວາມປອດໄພຂອງພວກເຮົາຢ່າງວ່ອງໄວ ແລະ ຢ່າງເດັດດ່ຽວ.”
ສະຫະລັດ ໄດ້ກ່າວຫາ ອີຣ່ານ ກ່ຽວກັບ ການຊ່ວຍໂຈມຕີຖານທັບ ສະຫະລັດ ຄັ້ງໃໝ່ໃນ ອີຣັກ ທີ່ເປັນສ່ວນນຶ່ງຂອງພັນທະມິດຕໍ່ຕ້ານກຸ່ມລັດອິສລາມ.
ຜູ້ນຳທາງສາສະໜາຂອງ ອີຣ່ານ ສະໜັບສະໜູນກຸ່ມຮາມາສ, ເຊິ່ງໄດ້ດຳເນີນການໂຈມຕີນອງເລືອດໃນ ອິສຣາແອລ ເມື່ອວັນທີ 7 ຕຸລາທີ່ຜ່ານມາ, ເຊິ່ງຖືກຕອບໂຕ້ດ້ວຍການແກ້ແຄ້ນຂະໜາດໃຫຍ່. ອີຣ່ານ ຍັງມີສາຍພົວພັນທີ່ໃກ້ຊິດກັບກຸ່ມທະຫານບ້ານ ເຮັສໂບລາ ນິກາຍຊີໄອ້ ຂອງ ເລບານອນ, ທີ່ໄດ້ມີຄວາມຂັດແຍ້ງຊ້ຳແລ້ວຊ້ຳອີກັບ ອິສຣາແອລ.
ສະຫະລັດ, ເຊິ່ງແມ່ນຜູ້ໜູນຫຼັງທາງການທູດລະດັບສູງຂອງ ອິສຣາແອລ ນັ້ນ, ເມື່ອອາທິດທີ່ຜ່ານມາໄດ້ຍັບຢັ້ງຮ່າງມະຕິສະບັບນຶ່ງ ກ່ຽວກັບ ຄວາມຂັດແຍ້ງດັ່ງກ່າວ, ໂດຍເວົ້າວ່າມັນຄວນປ້ອງກັນສິດທິຂອງ ອິສຣາແອລ ເພື່ອປ້ອງກັນຕົນເອງຢ່າງຊັດເຈນ.
