ລັດຖະມົນຕີການຕ່າງປະເທດ ສະຫະລັດ ທ່ານ ແອນໂທນີ ບລິງເກັນ ກຽມໂຕຈະໄປຢ້ຽມຢາມ ຊາອູດີ ອາຣາເບຍ (Saudi Arabia) ແລະອີຈິບ ໃນອາທິດນີ້ ສຳລັບການປຶກສາຫາລື ທີ່ທ່ານກ່າວວ່າ ຈະສຸມໃສ່ການຊຸກຍູ້ກໃຫ້ຢຸດຍິງ ຢູ່ໃນເຂດ ກາຊາ, ການປ່ອຍຕົວປະກັນທີ່ພວກຫົວຮຸນແຮງ ປາແລັສໄຕນ໌ ຈັບໄວ້, ແລະການວາງແຜນສໍາລັບ ເຂດກາຊາ ຫລັງສົງຄາມ.
ໃນການກ່າວຖະແຫລງ ໃນວັນອັງຄານມື້ນີ້ ໃນລະຫວ່າງການຢ້ຽມຢາມຟີລິບປິນ, ທ່ານ ບລິງເກັນ ບອກບັນດານັກຂ່າວວ່າ ຈຳເປັນຕ້ອງມີການກະກຽມ ກ່ຽວກັບວິທີການບໍລິຫານຈັດການ, ຄວາມໝັ້ນຄົງ, ການຊ່ວຍເຫລືອດ້ານມະນຸດສະທຳ ແລະການພັດທະນາເຂດ ກາຊາ ຄືນໃໝ່.
ທ່ານ ບລິງເກັນ ກ່າວວ່າ ສະຫະລັດ ເນັ້ນຢໍ້າຕໍ່ອິສຣາແອລເຖິງຄວາມຈຳເປັນທີ່ຕ້ອງໃຫ້ມີແຜນການ, ແລະຄວາມຫວັງທີ່ຍັງຄົງມີຢູ່ວ່າ ຄວາມຄັດແຍ້ງ ຈະສິ້ນສຸດລົງໂດຍໄວທີ່ສຸດ.
ພື້ນຖານໂຄງລ່າງ ແລະບ້ານເຮືອນ ຂອງເຂດກາຊາ ສ່ວນໃຫຍ່ ໄດ້ຖືກທຳລາຍຢ່າງຮາບຄາບ ໃນຂະນະທີ່ອິສຣາແອລ ໄດ້ດຳເນີນການເພື່ອກຳຈັດກຸ່ມຫົວຮຸນແຮງຮາມາສ ຫລັງຈາກການໂຈມຕີຂອງກຸ່ມຮາມາສ ໃນວັນທີ 7 ເດືອນຕຸລາ ໃນອິສຣາແອລ ຊຶ່ງເຮັດໃຫ້ມີຜູ້ເສຍຊີວິດ 1,200 ຄົນ ອີງຕາມການລາຍງານຂອງອິສຣາແອລ ແລະຮວມທັງການຈັບຕົວປະກັນປະມານ 250 ຄົນ. ກະຊວງສາທາລະນະສຸກຂອງເຂດກາຊາກ່າວວ່າ ການໂຈມຕີຕອບໂຕຄືນຂອງອິສຣາແອລ ໄດ້ສັງຫານຊາວປາແລັສໄຕນ໌ ເກືອບ 32,000 ຄົນ, ຊຶ່ງສ່ວນໃຫຍ່ແມ່ນແມ່ຍິງ ແລະເດັກນ້ອຍ. ປະຊາກອນໃນເຂດ ກາຊາ ຫຼາຍກວ່າເຄິ່ງນຶ່ງ ຕ້ອງໄດ້ຖືກຍົກຍ້າຍ.
ທ່ານ ບລິງເກັນ ອະທິບາຍເຖິງສິ່ງທີ່ທ່ານເອີ້ນວ່າ "ສະຖານະການດ້ານມະນຸດສະທໍາທີ່ເປັນຕາຢ້ານຫຼາຍ" ຢູ່ໃນເຂດກາຊາ, ໂດຍອ້າງເຖິງບົດລາຍງານຂອງອົງການສະຫະປະຊາຊາດ ທີ່ວ່າ ປະຊາກອນທັງຫມົດຕ້ອງການການຊ່ວຍເຫຼືອດ້ານມະນຸດສະທໍາ.
ຟໍຣັມສະແດງຄວາມຄິດເຫັນ