ລິ້ງ ສຳຫລັບເຂົ້າຫາ

logo-print

ທ່ານ ໄບ​ເດັນ ຊະ​ນະ ​ການ​ເລືອກ​ຕັ້ງ​ ຂັ້ນ​ຕົ້ນ ໃນ​ລັດ ຄາ​ໂຣ​ໄລ​ນາ​ໃຕ້


ຜູ້​ລົງ​ແຂ່ງ​ຂັນ​ເອົາ​ຕຳ​ແໜ່ງ​ປະ​ທາ​ນາ​ທ​ີ ປີ 2020 ສັງ​ກັດ​ພັກ​ເດ​ໂມ​ແຄ​ຣັດ ອະ​ດີດ​ຮອງປະ​ທາ​ນາ​ທິ​ບໍ​ດີ ກ່າວ​ຄຳ​ໄປ ແລະ ທັກ​ທາຍ​ຜູ້​ສະ​ໜັບສະ​ໜູນ​ຢູ່​ມະ​ຫາ​ວິ​ທະ​ຍາ​ໄລ Coastal Carolina University, ເມືອງ ຄອນ​ເວ, ລັດ ຄາ​ໂຣ​ໄລ​ນາ​ໃຕ້. 27 ກຸມ​ພາ, 2020. REUTERS/Randall Hill

ອະ​ດີດ​ຮອງ​ປະ​ທານ​າ​ທິ​ບໍ​ດີ ທ່ານ ໂຈ ໄບ​ເດັນ ໄດ້​ຊະ​ນະ​ການ​ເລືອ​ກ​ຕັ້ງ​ຂັ້ນ​ຕົ້ນ​ຂອງ​ພັກ​ເດ​ໂມ​ແຄ​ຣັດຢ່າງ​ຖ້ວມ​ລົ້ນ​, ເປັນ​ການ​ພິກ​ຟື້ນ​ການ​ໂຄ​ສະ​ນາ​ຫາ​ສຽງ​ທີ່ບໍ່​ໝັ້ນ​ຄົງ​ຂອງ​ທ່ານ ແລະ ສ້າງ​ກຳ​ລັງ​ໃຈໃນ​ການ​ກ້າວ​ເຂົ້າ​ສູ່​ການ​ແຂ່ງ​ຂັນ​ສຸດ ຍອດ​ວັນ​ອັງ​ຄານ ​ທີ່​ສຳ​ຄັນ​ໃນ​ອາ​ທິດ​ໜ້າ, ເມື່ອ 14 ລັດ​ຈະ​ຈັດ​ການ​ແຂ່ງ​ຂັນ​ສະ​ເໜີ​ຊື່​ຜູ້​ຕາງ​ໜ້າ​ຂອງ​ພັກ.

ຫຼັງ​ຈາກ​ຜົນ​ງານ​ທີ່ບໍ່​ດີ​ຂອງ​ທ່ານ ໄບ​ເດັນ ໃນ​ການ​ແຂ່ງ​ຂັນ​ສະ​ເໜີ​ຊື່​ສາມ​ຄັ້ງ​ທຳ​ອິດ​ນັ້ນ, ບັນ​ດາ​ນັກ​ວິ​ເຄາະ​ຄາດ​ເດົາ​ວ່າ ​ການ​ໂຄ​ສະ​ນາ​ຫາ​ສຽງ​ຂອງ​ທ່ານ​ຈະ​ຈົບ​ລົງ ຖ້າ​ທ່ານບໍ່​ໄດ້​ຮັບ​ໄຊ​ຊະ​ນະ​ຄັ້ງ​ໃຫຍ່​ໃນ​ລັດ ຄາ​ໂຣ​ໄລ​ນາ​ໃຕ້, ບ່ອນ​ທີ່​ທ່ານ​ໄດ້​ຮັບ​ການ​ສະ​ໜັບ​ສະ​ໜູນ​ຢ່າງຫຼວງຫຼາຍ ອີງ​ໃສ່​ການ​ສະ​ໜັ​ບ​ສະ​ໜູນ​ຂອງ​ທ່ານ​ຈາກ​ຊາວ​ອາ​ເມ​ຣິ​ກັນ​ຜິວ​ດຳ ເຊິ່ງ​ແມ່ນ​ຜູ້ປ່ອນ​ບັດ​ທີ່​ມີ​ຈຳ​ນວນຫຼາຍ ​ໃນ​ລັດ​ທີ່​ສະ​ໜັບ​ສະ​ໜູນ​ພັກ​ເດ​ໂມ​ແຄ​ຣັດ​ນັ້ນ.

ມັນ​ບໍ່​ພຽງ​ແຕ່​ທ່ານ ໄບ​ເດັນ ໄດ້​ເອົາ​ຊະ​ນະ​ສະ​ມາ​ຊິກ​ສະ​ພາ​ສູງ​ຈາກ​ລັດ ເວີ​ມັອນ ທ່ານ ເບີ​ນີ ແຊນ​ເດີ​ສ໌, ຜູ້​ທີ່​ໄດ້​ເຂົ້າ​ມາ​ແຂ່ງ​ຂັນ​ໃນ​ລັດ ຄາ​ໂຣ​ໄລ​ນາ​ໃຕ້ ເປັນຜູ້​ມີ​ຄະ​ແນນ​ນຳ​ໜ້າ​ເທົ່າ​ນັ້ນ, ແຕ່​ທ່ານ​ຍັງ​ໄດ້​ສະ​ແດ​ງ​ໃຫ້​ບັນ​ດາ​ຜູ້​ລົງ​ຄະ​ແນນ​ສຽງ ເຫັນຢ່າງວ່ອງ​ໄວ​ວ່າ ​ທ່ານ​ຍັງ​ມີ​ຄວາມ​ສາ​ມາດ​ທີ່​ຈະ​ທຳ​ການ​ແຂ່ງ​ຂັນ​ຢ່າງ​ໜ້າ​ເຊື່ອ​ຖື​ໄດ້​ກັບ​ທ່ານ ແຊນ​ເດີ​ສ໌.

ຜົນ​ທີ່​ອອກ​ມາ​ຈາກ​ເຂດ​ປົກ​ຄອງຫຼາຍກວ່າ 60 ເປີ​ເຊັນ​ໄດ້​ສະ​ແດງ​ໃຫ້​ເຫັນ​ວ່າ​ທ່ານ ໄບ​ເດັນ ໄດ້​ຊະ​ນະ​ປະ​ມານ 50 ເປີ​ເຊັນ​ຂອງ​ຄະ​ແນນ​ສ​ຽງ. ທ່ານ ແຊນ​ເດີ​ສ໌ ຕາມຫຼັງ​ຢູ່​ຫ່າງ​ໄກ​ທີ່​ອັນ​ດັບ​ສອງ​ດ້ວຍ​ຄະ​ແນນ​ສຽງ 19 ເປີ​ເຊັນ. ທ່ານ ທອມ ສ​ເຕ​ເຢີ, ມະ​ຫາ​ເສດ​ຖີ​ພັນ​ລ້ານ ແລະ ເປັນ​ນັກ​ໃຈ​ບຸນ ຜູ້​ທີ່​ໄດ້​ລົງ​ທຶນ​ທັງ​ເວ​ລາ ແລະ ເງິນ​ໃນ​ການ​ໂຄ​ສະ​ນາ​ຫາ​ສຽງ​ຢ່າງຫຼວງຫຼາ​ຍ​ໃນ​ລັດ ຄາ​ໂຣ​ໄລ​ນາ​ໃຕ້ ນັ້ນ, ໄດ້​ອັນ​ດັບ​ສາມ, ດ້ວຍ​ຄະ​ແນນ​ສຽງ 11 ເປີ​ເຊັນ.

ທ່ານ ສ​ເຕ​ເຢີ ໄດ້​ຍຸບ​ການ​ໂຄ​ສະ​ນາ​ຫ​າ​ສຽງ​ຂອງ​ທ່ານ​ ລຸນຫຼັງ​ຜົນ​ຄະ​ແນນ​ດັ່ງ​ກ່າວ.

ທ່ານ ໄບ​ເດັນ ໄດ້​ກ່າວ​ຕໍ່​ບັນ​ດາ​ຜູ້​ສະ​ໜັບ​ສະ​ໜູນ​ທີິ່​ຍິນ​ດີ​ຊົມ​ເຊີຍ​ໃນ​ເມືອງ ໂຄ​ລຳ​ບັ​ສ, ລັດ ຄາ​ໂຣ​ໄລ​ນາ​ໃຕ້ ໃນ​ຄືນ​ວັນ​ເສົາ​ວານນີ້​ວ່າ, “ສຳ​ລັບ​ທຸກ​ທ່ານ​ຜູ້​ທີ່​ຖືກ​ນັອກ​ລົງ ແລະ ນັບ​ອອກ​ນັ້ນ, ນີ້​ແມ່ນ​ການຕໍ່​ສູ້​ຂອງ​ພວກ​ເຈົ້າ.”

ທ່ານ​ໄດ້​ກ່າວ​ຕື່ມ​ວ່າ “ພວກ​ເຮົາ​ມີ​ຊີ​ວິດ​ຄືນຫຼາຍ​ແລ້ວ.”

ຜົນ​ການ​ຢັ່ງ​ຫາງ​ສຽງ​ທີ່​ໄດ້​ນັບ​ກ່ອນ​ປິດ​ການ​ເລືອກ​ຕັ້ງ​ໃນ​ວັນ​ເສົາ​ວານນີ້ ​ໄດ້​ສະ​ແດງ​ໃຫ້​ເຫັນ​ວ່າ ທ່ານ ໄບ​ເດັນ ໄດ້​ຊະ​ນະ​ການ​ສະ​ໜັບ​ສະ​ໜູນ​ຢ່າງ​ເຂັ້ມ​ແຂງ​ຈາກ​ຜູ້​ລົງ​ຄະ​ແນນ​ສຽງ​ຜິວ​ດຳ, ຄົນ​ທີ່​ມີ​ອາ​ຍຸຫຼາຍກວ່າ 45 ປີ ແລະ ອະ​ທິ​ບາຍ​ຕົນ​ເອງວ່າ​ເປັນ​ຫົວ​ປານ​ກາງ.

ລັດ​ຄາ​ໂຣ​ໄລ​ນາ​ ໄດ້​ຖືກ​ພິ​ຈາ​ລະ​ນາ​ດັ່ງ​ກັບ “ລະ​ບົບ​ປ້ອງ​ກັນ” ຂອງ​ທ່ານ ໄບ​ເດັນ ຍ້ອນຜູ້​ລົງ​ຄະ​ແນນ​ສຽງ​ຊາວ ອາ​ເມ​ຣິ​ກັນ ເຊື້ອ​ສາຍ ອາ​ຟ​ຣິ​ກາ ຈຳ​ນວນຫຼວງຫຼາຍ​ ທີ່ມີ​ຄວາມ​ຈົງ​ຮັກ​ພັກ​ດີ​ຕໍ່​ອະ​ດີດ​ຮອງ​ປະ​ທາ​ນາ​ທິ​ບໍ​ດີ ຜູ້​ທີ່​ໄດ້​ປະ​ຕິ​ບັດ​ໜ້າ​ທີ່ ພາຍ​ໃຕ້​ທ່ານ ບາ​ຣັກ ໂອ​ບາ​ມາ, ປະ​ທາ​ນາ​ທິ​ບໍ​ດີ ອາ​ເມ​ຣິ​ກັນ ເຊື້ອ​ສາຍ​ອາ​ຟ​ຣິ​ກາ ​ຄົນ​ທຳ​ອິດ​ທີ່​ຖືກ​ເລືອກ​ເປັນ​ປະ​ທາ​ນາ​ທິ​ບໍ​ດີ​ຂອງ ສະ​ຫະ​ລັດ.

ອ່ານ​ຂ່າວນີ້​ເປັນ​ພາ​ສາ​ອັງ​ກິດ

ເບິ່ງຄວາມເຫັນ

ທ່ານອາດຈະມັກເລື້ອງນີ້ຄືກັນ

XS
SM
MD
LG