ລິ້ງ ສຳຫລັບເຂົ້າຫາ

ວັນອາທິດ, ໑໙ ພຶດສະພາ ໒໐໒໔

ທ່ານ ໄບເດັນ ຈະເຊັນລົງນາມ ຊຸດການຊ່ວຍເຫຼືອແກ່ ຢູເຄຣນ ອິສຣາແອລ ແລະ ໄຕ້ຫວັນ


ຜູ້ນໍາໃນການຕິດຕາມກວດກາຂອງສະພາສູງ ທ່ານມິດຈ໌ ແມັກຄໍແນລ ຍົກສູງກ່ຽວກັບການສະໜັບສະໜູນຕໍ່ຢູເຄຣນ ໃນຂະນະທີ່ສະພາສູງ ກໍາລັງດໍາເນີນງານຜ່ານຮ່າງກົດໝາຍໃນການຊ່ວຍເຫຼືອຈໍານວນ 95 ຕື້ໂດລາ ສໍາລັບສົງຄາມໃນ ຢູເຄຣນ, ອິສຣາແອລ ແລະ ໄຕ້ຫວັນ, ຢູ່ທີ່ຫໍລັດຖະສະພາໃນນະຄອນຫຼວງວໍຊິງຕັນ, ວັນທີ 23 ເມສາ 2024.
ຜູ້ນໍາໃນການຕິດຕາມກວດກາຂອງສະພາສູງ ທ່ານມິດຈ໌ ແມັກຄໍແນລ ຍົກສູງກ່ຽວກັບການສະໜັບສະໜູນຕໍ່ຢູເຄຣນ ໃນຂະນະທີ່ສະພາສູງ ກໍາລັງດໍາເນີນງານຜ່ານຮ່າງກົດໝາຍໃນການຊ່ວຍເຫຼືອຈໍານວນ 95 ຕື້ໂດລາ ສໍາລັບສົງຄາມໃນ ຢູເຄຣນ, ອິສຣາແອລ ແລະ ໄຕ້ຫວັນ, ຢູ່ທີ່ຫໍລັດຖະສະພາໃນນະຄອນຫຼວງວໍຊິງຕັນ, ວັນທີ 23 ເມສາ 2024.

ປະທານາທິບໍດີ​ສະຫະລັດ ທ່ານໂຈ ໄບເດັນ ກ່າວ​ວ່າ ທ່ານ​ຈະ​ລົງ​ນາມ​ຕໍ່​ຮ່າງ​ກົດໝາຍ​ໃນ​ວັນ​ພຸດ​ມື້​ນີ້ ທີ່​ຈະ​ມອບການຊ່ວຍ​ເຫຼືອ 95 ຕື້ໂດ​ລາ​ໃຫ້​ແກ່ ​ຢູ​ເຄຣນ, ອິສຣາ​ແອ​ລ ​ແລະ ​ໄຕ້​ຫວັນ ລຸນຫຼັງສະພາ​ສູງ​ ໄດ້​ໃຫ້ການ​ອະນຸມັດ​ໃນຕອນແລງຂອງ​ວັນ​ອັງຄານ​ວານ​ນີ້.

ການລົງຄະແນນສຽງ 79-18 ມີຂຶ້ນຫຼັງຈາກມີຄວາມຫຼ້າຊ້າມາຫຼາຍເດືອນ, ເຊິ່ງລວມມີ ການຜ່ານຮ່າງຂອງສະພາສູງທີ່ມີມາດຕະການຄ້າຍຄືກັນ ແລະ ບັນດາຜູ້ນຳໃນສະພາຕໍ່າ ທີ່ປະຕິເສດການລົງຄະແນນສຽງຂອງຕົນເອງທ່າມກາງຄວາມຂັດແຍ້ງກ່ຽວກັບການສົ່ງການຊ່ວຍເຫຼືອໄປຕ່າງປະເທດ ແລະບູລິມະສິດດ້ານຄວາມໝັ້ນຄົງຢູ່ພາຍໃນປະເທດ.

ສະພາຕໍ່າ ໄດ້ທົບທວນຄືນຕໍ່ຄວາມພະຍາຍາມດັ່ງກ່າວ ລຸນຫຼັງການເຈລະຈາລະຫວ່າງບັນດາຜູ້ນຳລັດຖະສະພາ ເພື່ອເອົາຊະນະການຄັດຄ້ານນັ້ນ, ແລະໃນທີ່ສຸດ ກໍມີການອະນຸມັດມາດຕະການດັ່ງກ່າວໃນວັນເສົາແລ້ວນີ້ ດ້ວຍການລົງຄະແນນສຽງ 311 ຕໍ່ 112 ສຽງ.

ການ​ຕໍ່ສູ້​ຕ້ານການຮຸກຮານຈາກ ຣັດ​ເຊຍ ຂອງ ຢູເຄຣນ ​ແມ່ນເປົ້າໝາຍ​ສຳຄັນ​ຂອງ​ຊຸດການຊ່ວຍເຫຼືອ ດ້ວຍຈໍານວນ​ເງິນ 61 ຕື້​ໂດ​ລາ ທີ່​ຈະສົງ​ໄປ​ສູ່​ການ​ສູ້​ລົບ​ດັ່ງກ່າວ.

ຮ່າງ​ກົດໝາຍດັ່ງກ່າວຍັງ​ລວມມີ​ການຊ່ວຍເຫຼືອໃຫ້ແກ່ ​ອິສຣາ​ແອ​ລ 26 ຕື້ໂດລາ ​ໃນ​ເວລາ​ທີ່​ພວກເຂົາດໍາເນີນການ​ຕໍ່ສູ້​ກັບ​ພວກ​ຫົວ​ຮຸນ​ແຮງຮາມາສຢູ່​ໃນຂົງເຂດ​ກາຊາ, ​ແລະ 8 ຕື້​ໂດ​ລາ ​ເພື່ອ​ຕອບໂຕ້ຕໍ່ການກະທໍາຕ່າງໆ​ຂອງ​ຈີນ ​ທີ່ກໍາລັງ​ຂົ່ມຂູ່​ ໄຕ້​ຫວັນ ​ແລະ​ບັນດາ​ປະ​ເທດ​ພັນທະ​ມິດ​ອື່ນໆ​ຢູ່ໃນ​ພາກ​ພື້ນ ​ອິນ​ໂດ-​ປາຊີ​ຟິກ.

ທ່ານ ໄບເດັນ ກ່າວ​ໃນ​ຖະ​ແຫຼງ​ການພຽງ​ບໍ່​ດົນ ລຸນ​ຫຼັງການ​ລົງ​ຄະ​ແນນ​ສຽງ​ຂອງ​ສະ​ພາ​ສູງ​ ວ່າສະ​ຫະ​ລັດ ​ຈະ​ເລີ້ມ​ສົ່ງ​ອາ​ວຸດ ​ແລະ​ອຸ​ປະ​ກອນ​ທາງ​ການ​ທະ​ຫານ​ໄປ​ໃຫ້ ​ຢູ​ເຄ​ຣນ ​ພາຍໃນ​ອາ​ທິດ​ນີ້.

ທ່ານ ໄບເດັນ ກ່າວ​ວ່າ “ກົດໝາຍ​ທີ່​ສຳຄັນ​ນີ້ ​ຈະ​ເຮັດ​ໃຫ້​ປະ​ເທດ​ຊາດຂອງພວກເຮົາ ​ແລະ ​ໂລກ ​ມີ​ຄວາມ​ໝັ້ນຄົງ​ຫຼາຍ​ຂຶ້ນ ​ໃນ​ຂະນະ​ທີ່​ພວກ​ເຮົາ​ສະໜັບສະໜູນ​ເພື່ອນ​ມິດທັງຫຼາຍ​ຂອງ​ພວກ​ເຮົາ​ທີ່ກໍາລັງ​ປົກປ້ອງ​ຕົນເອງຈາກ​ພວກ​ກໍ່​ການ​ຮ້າຍ​ເຊັ່ນ ກຸ່ມຮາມາສ ​ແລະພວກຜະເດັດການ​ເຊັ່ນ ​ປະທານາທິບໍດີ​ຣັດ​ເຊຍ ທ່ານວລາດີເມຍ ປູຕິນ.

ປະທານາທິບໍດີ​ຢູ​ເຄຣນ ທ່ານໂວໂລດີເມຍ ເຊເລັນສກີ ​ໄດ້​ຮຽກຮ້ອງ​ໃຫ້​ບັນດາ​ປະ​ເທດ​ພັນທະ​ມິດ​ຈົ່ງດໍາເນີນການຊ່ວຍ​ເຫຼືອ​ເພີ້ມເຕີມ ​ເພື່ອ​ສະໜັບສະໜູນ​ທະຫານ​ຂອງ​ຕົນໃຫ້ສາມາດ​ຕໍ່ສູ້​ຕ້ານກອງ​ກຳລັງ​ຂອງຣັດ​ເຊຍ, ​ໂດຍ​ສະ​ເພາະ​ແມ່ນ ການ​ປ້ອງ​ກັນໂຕ​ເມືອງ​ຕ່າງໆ​ຂອງ​ຢູ​ເຄຣນ ຈາກ​ການ​ໂຈມ​ຕີ​ດ້ວຍ​ລູກ​ສອນ​ໄຟ ​ແລະ​ເຮືອບິນ​ບໍ່​ມີ​ຄົນ​ຂັບໃນແຕ່ລະວັນນັ້ນ.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG