ປະທານາທິບໍດີ ສະຫະລັດ ທ່ານ ໂຈ ໄບເດັນ ໄດ້ກ່າວຕໍ່ບັນດານັກຂ່າວໃນວັນພຸດວານນີ້ວ່າ ທ່ານ “ສະບາຍດີ,” ບໍ່ເທົ່າໃດຊົ່ວໂມງຫຼັງຈາກຖືກກວດພົບເປັນຜົນບວກສຳລັບ ໂຄວິດ-19. ທຳນຽບຂາວໄດ້ປະກາດໃນຕອນແລງ, ບໍ່ດົນຫຼັງຈາກທ່ານໄດ້ຍົກເລີກການກ່າວຄຳປາໄສ ບ່ອນທີ່ທ່ານມີແຜນຈະທຳການຮ້ອງຂໍຕໍ່ບັນດາຜູ້ລົງຄະແນນສຽງຊາວ ອາເມຣິກາ ລາຕິນ.
“ດີ. ຂ້າພະເຈົ້າຮູ້ສຶກດີ,” ທ່ານ ໄບເດັນ ໄດ້ກ່າວຕໍ່ບັນດານັກຂ່າວ, ໂດຍໄດ້ຍົກນິ້ວໂປ້ຂຶ້ນໃນຂະນະທີ່ທ່ານກຽມຂຶ້ນເຮືອບິນ Air Force One ໄປລັດ ເດລາແວ.
ປະທານາທິບໍດີຜູ້ມີອາຍຸ 81 ປີນັ້ນຖືກກວດພົບເປັນຜົນບວກຫຼັງຈາກການອອກງານຄັ້ງທຳອິດຂອງທ່ານໃນນະຄອນ ລາສ ເວກັສ ເມື່ອວັນພຸດວານນີ້ ແລະ ມີ “ອາການທີ່ປານກາງ,” ໂຄສົກທຳນຽບຂາວ ທ່ານນາງ ຄາຣີນ ຊັອງ ປີແອ ໄດ້ກ່າວໃນຖະແຫຼງການສະບັບນຶ່ງ. ທ່ານນາງໄດ້ກ່າວຕື່ມວ່າ ທ່ານໄດ້ສັກຢາປ້ອງກັນ ແລະ ຢາເສີມເພື່ອຕໍ່ໄວຣັສດັ່ງກ່າວ ແລະ ຈະເດີນທາງກັບເມືອບ້ານຂອງທ່ານໃນເມືອງ ເຣີໂຮບົດທ໌, ລັດ ເດລາແວ, ບ່ອນທີ່ທ່ານຈະແຍກປ່ຽວຕົນເອງ.
ທ່ານນາງເວົ້າວ່າ “ທຳນຽບຂາວຈະໃຫ້ການລາຍງານຂໍ້ມູນໃໝ່ຢ່າງເປັນປະຈຳ ກ່ຽວກັບ ສະຖານະພາບຂອງທ່ານປະທານາທິບໍດີ ໃນຂະນະທີ່ທ່ານສືບຕໍ່ດຳເນີນໜ້າທີ່ຢ່າງເຕັມທີ່ ເວລາຖືກແຍກປ່ຽວນັ້ນ.”
ຂ່າວດັ່ງກ່າວຖືກປະກາດທຳອິດໂດຍປະທານຂອງອົງການ UnidoUS, ເຊິ່ງແມ່ນອົງການສົ່ງເສີມຊາວອາເມຣິກາ ລາຕິນ ທີ່ບໍ່ຫວັງຜົນກຳໄລທີ່ໃຫຍ່ທີ່ສຸດໃນປະເທດ.
ຂໍ້ຄວາມຈາກແພດໝໍຂອງທ່ານ ໄບເດັນ ລຸນຫລັງຖະແຫຼງການຂອງທ່ານນາງ ຊັອງ ປີແອ, ໄດ້ກ່າວຕື່ມວ່າລະດັບການຫາຍໃຈຂອງທ່ານ ໄບເດັນ, ອຸນຫະພູມ ແລະ ລະດັບອົກຊີເຈັນໃນເລືອດ ທຸກຢ່າງແມ່ນປົກກະຕິ, ແລະທ່ານໄດ້ຮັບຢາປິ່ນປົວອັນນຶ່ງ. ແພດໝໍຄົນດັ່ງກ່າວ, ເຊິ່ງບໍ່ໄດ້ບອກຊື່ໃນຖະແຫຼງການນັ້ນ, ໄດ້ກ່າວວ່າ ທ່ານ ໄບເດັນ ໄດ້ສະແດງໃຫ້ເຫັນອາການຕ່າງໆລວມມີ ນໍ້າມູກໄຫຼ, ໄອ ແລະ ອາການອ່ອນແອ.
ຟໍຣັມສະແດງຄວາມຄິດເຫັນ