ໃນຄວາມພະຍາຍາມທີ່ຈະຟື້ນຟູການຜະລິດພາຍໃນປະເທດ, ປະທານາທິບໍດີ ໂຈ ໄບເດັນ ປະກາດໃນວັນອັງຄານວານນີ້ວ່າ ທ່ານກຳລັງຈະກຳນົດການຂຶ້ນ ພາສີຢ່າງຫຼວງຫຼາຍສຳລັບລົດໄຟຟ້າຂອງຈີນ ແລະ ການເກັບພາສີໃໝ່ສຳລັບໄມໂຄຣຊິບຂອງຄອມພິວເຕີ, ແຜງພະລັງງານແສງອາທິດ ແລະແບັດເຕີຣີ ລີທຽມ-ໄອອອນ (lithium-ion).
ທ່ານ ໄບເດັນ ກ່າວວ່າ “ພວກເຮົາຈະບໍ່ປ່ອຍໃຫ້ຈີນເຂົ້າມາເຮັດໃຫ້ຕະຫຼາດ ຂອງພວກເຮົາມີສິນຄ້າລົ້ນຕະຫຼາດ ເຊິ່ງຈະເຮັດໃຫ້ມັນເປັນໄປບໍ່ໄດ້ທີ່ຂະແໜງ ໂອໂຕຂອງອາເມຣິກັນ ກໍ່ຄືບັນດາຜູ້ຜະລິດລົດຍົນ ຈະແຂ່ງຂັນຢ່າງເປັນທຳ."
"ຂ້າພະເຈົ້າຈະດຳເນີນການຕາມກົດຫມາຍການຄ້າລະຫວ່າງປະເທດ."
ອັດຕາພາສີຕໍ່ລົດຍົນໄຟຟ້າຫຼື EV ຂອງຈີນຈະເພີ່ມຂຶ້ນເປັນ 100 ເປິເຊັນ. ການນໍາເຂົ້າແຜງພະລັງງານແສງອາທິດແລະ ຊີມີຄອນດັກເຕີ (semiconductor) ຈາກຈີນຈະຕ້ອງເສຍຕາພາສີ 50 ເປີເຊັນ ເຊິ່ງເປັນສອງ ເທົ່າຂອງອັດຕາໃນປັດຈຸບັນ. ອັດຕາການນຳເຂົ້າເຫຼັກກ້າ ແລະອາລູມີນຽມບາງຊະນິດ ຈະເພີ່ມຂຶ້ນເປັນ 25 ເປີເຊັນ, ເຊິ່ງຫຼາຍກວ່າລະດັບປະຈຸບັນ 3 ເທົ່າ.
ການເພີ່ມອັດຕາພາສີດັ່ງກ່າວຈະກວມເອົາ 18 ຕື້ໂດລາສະຫະລັດຂອງສິນຄ້າຈີນ. ອັດຕາພາສີສໍາລັບລົດ EV, ເຫຼັກກ້າ ແລະອາລູມິນຽມ, ແລະແຜງພະ ລັງງານແສງອາທິດ ຈະມີຜົນບັງຄັບໃຊ້ໃນປີນີ້, ແລະໃນປີຫນ້າສໍາລັບໄມໂຄຣ ຊິບ.
ທ່ານນາງ ແຄັດເທີຣິນ ທາຍ (Katherine Tai) ຜູ້ຕາງຫນ້າດ້ານການຄ້າຂອງສະຫະລັດກ່າວວ່າ ລັດຖະບານໄດ້ແຈ້ງໃຫ້ປັກກິ່ງ ຮູ້ເປັນການລ່ວງໜ້າແລ້ວ.
ທ່ານນາງ ກ່າວວ່າ "ພວກເຮົາໄດ້ລະບຸຢ່າງຈະແຈ້ງວ່ານີ້ແມ່ນບໍ່ກ່ຽວກັບການຍົກ ລະດັບຄວາມຮຸນແຮງຂື້ນ," "ນີ້ແມ່ນກ່ຽວກັບຜົນສະທ້ອນຂອງນະໂຍບາຍເສດ ຖະກິດທີ່ດຳເນີນມາຫຼາຍທົດສະວັດ ແລະຄວາມຈຳເປັນຂອງ ສະຫະລັດ ໃນການປົກປ້ອງສິດທິຂອງພວກເຮົາ."
ຟໍຣັມສະແດງຄວາມຄິດເຫັນ