ລິ້ງ ສຳຫລັບເຂົ້າຫາ

logo-print

ທ່ານ ໄບ​ເດັນ ແລະ ທ່ານ ແຊນ​ເດີ​ສ໌ ໂຕ້​ວາ​ທີ​ກັນ ກ່ຽວ​ກັບ ວິ​ທີ​ທີ່​ດີ​ທີ່​ສຸດ ເພື່ອ​ເອົາ​ຊະ​ນະ​ທ່ານ ທ​ຣຳ


​ທ່ານ ໂຈ ໄບ​ເດັນ ແລະ ທ່ານ ເບີ​ນີ ແຊນ​ເດີ​ສ໌ ໂຕ້​ວາ​ທີ​ກັນ ກ່ຽວ​ກັບ ໄວ​ຣັ​ສ​ໂຄ​ໂຣ​ນາ.

ຜູ້​ລົງ​ແຂ່ງ​ຂັນ​ເອົາ​ຕຳ​ແໜ່ງ​ປະ​ທາ​ນາ​ທິ​ບໍ​ດີ ສະ​ຫະ​ລັດ ສັງ​ກັດ​ພັກ​ເດ​ໂມ​ແຄ​ຣັດ ສອງ​ຄົນ​ສຸດ​ທ້າຍ​ທີ່​ສຳ​ຄັນຄື ອະ​ດີດ​ຮອງ​ປະ​ທາ​ນາ​ທິ​ບໍ​ດີ ໂຈ ໄບ​ເດັນ ກັບ ສະ​ມາ​ຊິກ​ສະ​ພາ​ສູງ​ລັດ ເວີ​ມັອນ ທ່ານ ເບີ​ນີ ແຊນເດີ​ສ໌ ໄດ້ປະ​ເຊີນ​ໜ້າ​ກັນໃນ​ຄືນ​ວັນ​ອາ​ທິດ​ວານນີ້ ໃນ​ການໂຕ້​ວາ​ທີ​ທີ່​ມີ​ຄວາມ​ກະ​ຕື​ລື​ລົ້ນ​ ກ່ຽວ​ກັບ ຫຼາຍ​ບັນ​ຫາ ໃນ​ຂະ​ນະ​ທີ່​ພວກ​ເພິ່ນ ໄດ້​ຍົກ​ກໍ​ລະ​ນີ​ທີ່​ດີ​ທີ່​ສຸດ​ຂຶ້ນ​ມາ ເພື່ອ​ເປັນ​ຜູ້​ຖືກ​ສະ​ເໜີ​ຊື່​ຕາງ​ໜ້າ​ໃຫ້​ພັກ ສຳ​ລັບ​ການ​ແຂ່ງ​ຂັນ​ກັບ​ປະ​ທາ​ນາ​ທິ​ບໍ​ດີ ດໍ​ໂນ​ລ ທ​ຣຳ ສັງ​ກັດ​ພັກ​ຣີ​ພັບ​ບ​ລີ​ກັນ ໃນ​ການ​ເລືອກ​ຕັ້ງ​ແຫ່ງ​ຊາດ​ໃນ​ເດືອ​ນ​ພະ​ຈິກນີ້.

ຜູ້​ລົງ​ແຂ່ງ​ຂັນ​ທັງ​ສອງ​ທ່ານ​ໄດ້​ໂຈມ​ຕີ​ທ່ານ ທ​ຣຳ ຢ່າງ​ຊ້ຳ​ແລ້ວ​ຊ້ຳ​ອີກ, ດ້ວຍ​ທ່ານ ໄບ​ເດັນ ເອີ້​ນ​ທ່ານ ທ​ຣຳ ວ່າ “ເປັນໄພ​ຂົ່ມ​ຂູ່​ຕໍ່​ປະ​ເທດ​ຊາດ​ໃນ​ປັດ​ຈຸ​ບັນ,” ໃນ​ຂະ​ນະ​ທີ່​ທ່ານ ແຊນ​ເດີ​ສ໌ ໄດ້​ປະ​ກາດ​ວ່າ​ທ່ານ ທ​ຣຳ ແມ່ນ “ພະ​ຍາດນັກ​ຂີ້​ຕົວະ” ທີ່​ຄວບ​ຄຸມ “ລັດ​ຖະ​ບານ​ທີ່​ສໍ້​ໂກງ.”

ທັງ​ສອງ​ທ່ານ ໄດ້​ໂຈມ​ຕີ​ທ່ານ ທ​ຣຳ ກ່ຽວ​ກັບ ການ​ຮັບ​ມື​ກັບ​ການ​ລະ​ບາດ​ຂອງ​ໄວ​ຣັ​ສ​ໂຄ​ໂຣ​ນາໃນ ສະ​ຫະ​ລັດ, ດ້ວຍ​ທ່ານ ແຊນ​ເດີ​ສ໌ ຕຳ​ໜິ​ທ່ານ​ວ່າ “ດູ​ໝິ່ນ​ນັກ​ວິ​ທະ​ນາ​ສາດ” ແລະ ທ່ານ ໄບ​ເດັນ ໄດ້​ຖິ້ມ​ໂທດ​ໃສ່​ລັດ​ຖະ​ບານ ສຳ​ລັບ​ການ​ປະ​ຕິ​ເສດ​ການ​ນຳ​ເຂົ້າ​ອຸ​ປະ​ກອນ​ທົດ​ລອງ ​ໃນ​ຕອນ​ຕົ້ນ​ຂອງວິ​ກິດ​ການ​ຈາກ​ຕ່າງ​ປະ​ເທດ ໃນ​ເວ​ລາ​ທີ່ ສະ​ຫະ​ລັດ ມີ​ໂອ​ກາດ​ທີ່​ຈະ​ເຮັດ​ແນວ​ນັ້ນ.

ທ່ານ ໄບ​ເດັນ ເວົ້າ​ວ່າ “ມັນຄື​ກັບ​ການ​ຖືກ​ໂຈມ​ຕີ. ໃນ​ສົງ​ຄາມ, ເຈົ້າ​ຈະ​ເຮັດ​ທຸກ​ຢ່າງ​ທີ່​ຈຳ​ເປັນ​ເພື່ອ​ຮັກ​ເບິ່ງ​ແຍງ​ຄົນ​ຂອງ​ເຈົ້າ. ທຸກ​ຢ່າງ​ທີ່​ເຈົ້າ​ຕ້ອງ​ການ​ເພື່ອເອົາ​ໃຈ​ໃສ່​ໃນ​ວິ​ກິດ​ການນີ້​ຈະ​ບໍ່​ມີ​ຄ່າ​ໃຊ້​ຈ່າຍ​ຫຍັງ. ມັນ​ຈະ​ຖືກ​ຈ່າຍ​ໂດຍ​ຜູ້​ເສຍ​ພາ​ສີ ສະ​ຫະ​ລັດ.”

ທ່ານ ໄບ​ເດັນ​ ໄດ້​ກ່າວ​ວ່າ ທ່ານຈະ​ຮຽກ​ຮ້ອງ​ໃຫ້​ກອງ​ທັບ​ຮັບ​ມື​ກັບ​ວິ​ກິດ​ການ​ດັ່ງ​ກ່າວ ໃນ​ຂະ​ນະ​ທີ່​ທ່ານ ແຊນ​ເດີ​ສ໌ ໄດ້ຫຼີກ​ລ່ຽງ​ບັນ​ຫາ​ນັ້ນ. ແຕ່​ກົງ​ກັນ​ຂ້າມ, ທ່ານ ແຊນ​ເດີ​ສ໌ ໄດ້​ຕຳ​ໜິວ່າ ທ່ານ ທ​ຣຳ ໄດ້ທຳ​ລາຍ​ການ​ຕອບ​ຮັບ​ຂອງ​ລັດ​ຖະ​ບານ ດ້ວຍ​ການ​ໂຕ້​ແຍ້ງ​ສິ່ງ​ທີ່​ບັນ​ດາ​ຜູ້​ຊ່ຽວ​ຊານ​ຂອງ​ລັດ​ຖະ​ບານ ແລະ ນັກ​ວິ​ທະ​ຍາ​ສາດ​ໄດ້​ແນະ​ນຳ.

ທ່ານ​ໄດ້​ກ່າວ​ວ່າ “ສິ່ງ​ທີ່​ພວກ​ເຮົາ​ຕ້ອງ​ເຮັດ​ແມ່ນ​ໃຫ້​ປິດ​ປາກ​ຂອງ​ປະ​ທາ​ນາ​ທິ​ບໍ​ດີ​ຄົນ​ນີ້​ໄວ້.”

ໂດຍ​ລວມ​ແລ້ວ​ທັງ​ສອງ​ທ່ານ​ແມ່ນ​ໄດ້​ເຫັນ​ພ້ອມ​ກັນ ກ່ຽວ​ກັບ ການ​ແຕ່​ງ​ຕັ້ງ​ແມ່​ຍິງ​ຄົນ​ນຶ່ງ​ເປັນຜູ້​ຮ່ວມ​ລົງ​ແຮ່ງ​ຂັນ ​ເອົາຕຳ​ແໜ່ງ​ຮອງ​ປະ​ທາ​ນາ​ທິ​ບໍ​ດີ​ຂອງ​ເຂົາ​ເຈົ້າ. ທ່ານ ໄບ​ເດັນ ເວົ້າ​ວ່າ​ທ່ານ​ຈະ​ເລືອກ​ແມ່​ຍິງ​ຢ່າງ​ແນ່ນອນ ແລະ ທ່ານ ແຊນ​ເດີ​ສ໌ ກ່າວ​ວ່າ “ໃນ​ຄວາມ​ເປັນ​ໄປ​ໄດ້​ທັງ​ໝົດ​ນັ້ນ” ທ່ານ​ຈະເລືອກ​ເຊັ່ນ​ກັນ, ໂດຍ​ກ່າວ​ວ່າ​ທ່ານ​ອາດ​ຊອກ​ຫາ​ຄົນ​ຜູ້​ນຶ່ງ ​ທີ່​ເຫັນ​ພ້ອມ​ກັບ​ນະ​ໂຍ​ບາຍ​ຫົວ​ກ້າວ​ໜ້າ​ຂອງ​ທ່ານ.

ແຕ່​ຜູ້​ລົງ​ແຂ່ງ​ຂັນ​ສັງ​ກັ​ດ​ພັກ​ເດ​ໂມ​ແຄ​ຣັດ​ທັງ​ສອງ​ທ່ານ​ນັ້ນ​ ໄດ້​ໂຕ້​ຖຽງ​ກັນ ກ່ຽວ​ກັບ ການ​ທີ່​ຈະ​ຕໍ່​ສູ້​ກັບ​ທ່ານ ທ​ຣຳ, ເຊິ່ງ​ແມ່ນ​ເຈົ້າ​ພໍ່​ດ້ານ​ອະ​ສັງ​ຫາ​ລິ​ມະ​ຊັບຂອງ​ນະ​ຄອນ ນິວຢອກ ແລະ ເປັນ​ນັກ​ການ​ເມືອງ​ມື​ໃໝ່ ຜູ້​ທີ່​ໄດ້​ຮັບ​ໄຊ​ຊະ​ນະ​ຢ່າງ​ບໍ່​ຄາດ​ຄິດ​ໃນ​ການ​ເລືອກ​ຕັ້ງ​ປີ 2016 ເພື່ອ​ກາຍ​ເປັນ​ປະ​ທາ​ນາ​ທິ​ບໍ​ດີ​ຄົນ​ທີ 45 ຂອງ​ປະ​ເທດ.

ທ່ານອາດຈະມັກເລື້ອງນີ້ຄືກັນ

XS
SM
MD
LG