ຮອງປະທານາທິບໍດີສະຫະລັດ ທ່ານ Joe Biden ແລະປະທານາທິບໍດີຢູເຄຣນ ທ່ານ Petro Poroshenko ຮຽກຮ້ອງໃນວັນສຸກວານນີ້ ໃຫ້ມີການເອົາມາດຕະການ ແກ້ໄຂ ບັນຫາຂັດແຍ້ງ ກັບພວກແບ່ງແຍກດິນແດນນິຍົມຣັດເຊຍໃນພາກຕາເວັນອອກຂອງຢູເຄຣນ.
ຖະແຫຼງການຂອງທຳນຽບຂາວກ່າວວ່າ “ທ່ານ Biden ແລະທ່ານ Poroshenko ໄດ້ໂອ້ລົມກັນທາງໂທລະສັບ ແລະໄດ້ສະແດງຄວາມວິຕົກກັງວົນຢ່າງເລິກເຊິ່ງ ກ່ຽວກັບການສູ້ລົບກັນທີ່ເພີ້ມທະວີຂຶ້ນ ຢູ່ໃນພາກຕາເວັນອອກຂອງຢູເຄຣນ ບ່ອນທີ່ການລະເມີດຢຸດຍິງໂດຍກຳລັງປະສົມແບ່ງແຍກດິນແດນທີ່ນິຍົມຣັດເຊຍແມ່ນຢູ່ໃນລະດັບທີ່ີຮ້າຍແຮງສຸດນັບແຕ່ປີ 2015 ເປັນຕົ້ນມາ ຊຶ່ງມັກຈະໃຊ້ອາວຸດໜັກນັ້ນ.”
ທຳນຽບຂາວກ່າວວ່າ ທ່ານ Biden ແຈ້ງໃຫ້ຊາບວ່າສະຫະລັດໄດ້ສົ່ງຄຳເຕືອນໄປໃຫ້ຣັດເຊຍແລ້ວ ໂດຍເວົ້າວ່າໂລກພວມຈັບຕາເບິ່ງ ແລະກ່າວຢ້ຳເຖິງຄວາມຈຳເປັນ ເພື່ອຫລຸດ ຜ່ອນສະຖານະການທີ່ເຄັ່ງຕຶງລົງ. ຖະແຫຼງການກ່າວຕື່ມວ່າ ຮອງປະທານາທິບໍດີສະຫະ ລັດຍັງໄດ້ຮຽກຮ້ອງໃຫ້ຢູເຄຣນໃຊ້ຄວາມຢັບຢັ້ງ.
ທ່ານ Biden ແລະທ່ານ Poroshen ຍັງໄດ້ເນັ້ນຢ້ຳເຖິງຄວາມຈຳເປັນໃນການເອົາມາດຕະການແກ້ໄຂທາງດ້ານການເມືອງແລະດ້ານການທູດຕໍ່ບັນຫາຂັດແຍ້ງດ້ວຍການຈັດຕັ້ງ ປະຕິບັດຢ່າງຄົບຖ້ວນຂໍ້ຕົກລົງນະຄອນມິງສ໌ໂດຍທຸກພັກຝ່າຍ.
ເຈົ້າໜ້າທີ່ຢູເຄຣນກ່າວວ່າ ໃນວັນພະຫັດວານນີ້ ພວກແບ່ງແຍກດິນແດນນິຍົມຣັດເຊຍໄດ້ຍິງໂຈມຕີດ້ວຍປືນຄົກຫຼາຍກວ່າ 500 ລູກແລະປືນໃຫຍ່ອີກ 300 ລູກໃສ່ທີ່ໝັ້ນຂອງທະຫານຢູເຄຣນໃນພາກຕາເວັນອອກຂອງປະເທດທີ່ເຮັດໃຫ້ທະຫານຢູເຄຣນຢ່າງນ້ອຍ 3 ຄົນເສຍຊີວິດແລະ 6 ຄົນບາດເຈັບ.
ທ່ານ Poroshen ເຕືອນໃນວັນພະຫັດວານນີ້ວ່າ ປະເທດຂອງທ່ານບໍ່ໄດ້ປະຕິເສດເຖິງຄວາມເປັນໄປໄດ້ ກ່ຽວກັບການປະກາດກົດໄອຍະການເສິກຫຼືການລະດົມກຳລັງທາງທະ ຫານເທື່ອໃໝ່ ຖ້າການສູ້ລົບຫາກຍັງດຳເນີນຢູ່ຕໍ່ມາ.
ເມື່ອບໍ່ດົນມານີ້ ຣັດເຊຍໄດ້ກ່າວຫາກອງທັບແລະໜ່ວຍສືບລັບຢູເຄຣນວ່າ ວາງແຜນໂຈມຕີຕໍ່ເຂດໄຄຣເມຍທີ່ຣັດເຊຍໄດ້ປະກາດຮວມເຂົ້າເປັນດິນແດນສ່ວນນຶ່ງຂອງຕົນນັ້ນ.
ເຈົ້າໜ້າທີ່ຢູເຄຣນໄດ້ປະຕິເສດຕໍ່ຂໍ້ກ່າວຫາດັ່ງກ່າວ ໂດຍເວົ້າວ່າ ວັງເຄຣັມລິນມີທ່າທາງວ່າຈະໃຊ້ເລື້ອງນີ້ເປັນຂໍ້ອ້າງ ເພື່ອເຮັດໃຫ້ສະຖານະການເຄັ່ງຕຶງຕື່ມຂຶ້ນ ຢູ່ໃນບັນຫາຂັດແຍ້ງທີ່ດຳເນີນມາເປັນເວລາສອງປີ ໃນພາກຕາເວັນອອກຂອງຢູເຄຣນ.
