ຊາວອາເມຣິກັນ ເດີນທາງຄຶກຄັກ, ທ່ານ ໄບເດັນ ໄຖ່ຊີວິດໄກ່ງວງໃນວັນຂອບໃຈພຣະເຈົ້າ

ບໍລິສັດທຣິບເປີລເອ ທີ່ໃຫ້ການປະກັນອຸບັດຕິເຫດແລະຂໍ້ມູນການເດີນທາງ ປະເມີນວ່າຈຳນວນຊາວອາເມຣິກາເດີນທາງຂັ້ນຕໍ່າ 50 ໄມລ ຫຼືກ່ວາ 80 ກິໂລແມັດ ໜ້າຈະຢູ່ທີ່ປະມານ 80 ລ້ານຄົນໃນຊ່ວງສັບປະດາວັນຂອບ ໃຈພຣະເຈົ້າຫຼື Thanksgiving ລະຫວ່າງວັນອັງຄານນີ້ເຖີງວັນຈັນໜ້າ.

ທ່າມກາງການສັນຈອນທີ່ຄຶກຄື້ນການໂດຍສານທາງອາກາດເບິ່ງຄືວ່າຈະບໍ່ໄດ້ເກີດບັນຫາໃຫຍ່ເປັນພິເສດໃນວັນຈັນ.

ຂໍ້ມູນຂອງ FlightAware ລະບຸວ່າຈຳນວນຖ້ຽວບິນທີ່ຖືກຍົກເລີກຢູ່ທີ່ບໍ່ເຖີງ 40 ຖ້ຽວ. ຢ່າງໃດກໍ່ຕາມ ເຄິ່ງມື້ຂອງວັນຈັນມີຖ້ຽວບີນທີ່ເລື່ອນເວລາບີນ 1,600 ຖ້ຽວທາງຝັ່ງຕາເວັນອອກຂອງປະເທດ.

ຄົນທີ່ເດີນທາງດ້ວຍການຂັບລົດເອງໄດ້ຮັບຜົນດີຈາກລາຄານໍ້າມັນທີ່ຕໍ່າລົງຄືຢູ່ທີ່ 3,06 ໂດລາຕໍ່ແກລລອນໜ້ອຍກ່ວາ 3,26 ໂດລາໃນຊ່ວງເດືອນດຽວກັນຂອງປີກ່ອນ.

ໜ່ວຍງານດູແລຄວາມປອດໄພດ້ານຄົມມະນາຄົມສະຫະລັດຄາດວ່າຈະຕ້ອງກວດກາຄວາມປອດໄພຂອງຜູ້ເດີນທາງທາງອາກາດ 18,3 ລ້ານຄົນ ຊ່ວງອາທິດນີ້ເຊີ່ງເປັນຕົວເລກທີ່ເພີ່ມຂື້ນ 6% ຈາກຊ່ວງດຽວກັນຂອງປີກ່ອນແຕ່ ບໍ່ໄດ້ແຕກຕ່າງຈາກຄວາມຄຶກຄື້ນທີ່ເຫັນຕັ້ງແຕ່ຕົ້ນປີ.

ໃນວັນອາທິດທີ່ຜ່ານມາຈຳນວນຜູ້ເດີນທາງມາສະໜາມບີນທົ່ວສະຫະລັດຜ່ານດ່ານກວດກາຄວາມປອດໄພໜ້າຈະຢູ່ທີ່ປະມານ 3 ລ້ານຄົນທຽບກັບ 3,01 ລ້ານ ຄົນເຊີ່ງເປັນສະຖິຕິສູງສຸດທີ່ເກີດຂືືນໃນວັນອາທິດຫຼັງຈາກທີ່ຊາວອາເມຣິກາ ໄດ້ສະຫຼອງວັນຊາດສະຫະລັດ 4 ກໍລະກົດ ທີ່ຜ່ານມາ.

ແລະທີ່ທຳນຽບຂາວປະທານາທິບໍດີ ໂຈ ໄບເດັນ ໄດ້ເຮັດພິທີໄຖ່ຊີວິດໄກ່ງວງ ສອງໂຕຕາມປະເພນີຂອງເທດສະການວັນຂອບໃຈພຣະເຈົ້າ.

ໄກ່ງວງສອງໂຕມາຈາກລັດມີເນໂຊຕ້າແລະມີຊື່ວ່າ ພິສ ກັບ ບອດສ໌ຊໍາ ໂດຍຜູ້ ນໍາສະຫະລັດຕັ້ງຊື່ພວກມັນຕາມຊື່ດອກໄມ້ ພິສບອດສ໌ຊໍາ ປະຈຳລັດເດລາແວຣ໌ ລັດຕົ້ນສັງກັດຂອງທ່ານ ໂຈ ໄບເດັນ.

ປະເພນີໄຖ່ຊີວິດໄກ່ງວງໂດຍປະທານາທິບໍດີສະຫະລັດເປັນຈຸດສົນໃຈຂອງເທດສະການນີ້ແລະຜູ້ນໍາແຕ່ລະຄົນສານຕໍ່ທັນຽມນີ້ມາຍາວນານ. ປີນີ້ ເປັນປີສຸດ ທ້າຍຂອງ ທ່ານ ໂຈ ໄບເດັນ ໃນຖານະປະທານາທິບໍດີ ສະຫະລັດ ກ່ອນສົ່ງ ຕໍ່ໜ້າທີ່ໃຫ້ກັບ ໂດນັນລ໌ ທຣໍາ ທີ່ຊະນະເລືອຕັ້ງເມື່ອວັນທີ 5 ພະຈິກ ຜ່ານມາ.

ໃນຊ່ວງ 3 ປີກ່ອນໜ້ານີ້ ທ່ານ ໂຈ ໄບເເດັນ ໄຖ່ຊີວິດໄກ່ງວງ 3 ຄູ່ ພີນັດ ບັດເຕີ ກັບ ເຈນລີ ລວມທັງ ຊອກໂກແລັດ ກັບ ຊິບ ແລະ ລີເບີຕີ ກັບ ເບນລ໌.