ລິ້ງ ສຳຫລັບເຂົ້າຫາ

logo-print

ທ່ານ ໄບ​ເດັນ ຫວັງ​ວ່າ ລັດ​ຄາ​ໂຣ​ໄລ​ນາ​ໃຕ້ ​ຈະ​ຊ່ວຍ​ຮັກ​ສາ ​ອະ​ນາ​ຄົດທາງ​ການ​ເມືອງ​ຂອງ​ທ່ານໄວ້


ອະ​ດີດ​ຮອງ​ປະ​ທາ​ນາ​ທິ​ບໍ​ດີ ທ່ານ ໂຈ ໄບ​ເດັນ ພົບ​ປະ​ກັບ​ຜູ້​ສະ​ໜັບ​ສະ​ໜູນ​ໃນ​ລະ​ຫວ່າງ​ການ​ໂຄ​ສະ​ນາ​ຫາ​ສຽງ ທີ່ເມືອງຊາ​ລ​ສ​ຕັນ ລັດ ຄາ​ໂຣ​ໄລ​ນາ​ໃຕ້. 26 ກຸມ​ພາ, 2020.

ໃນ​ການ​ລົງ​ສະ​ໝັກ​ແຂ່ງ​ຂັນ​ເທື່ອ​ທີສາມ ​ເອົາ​ຕຳ​ແໜ່ງ​ປະ​ທາ​ນາ​ທິ​ບໍ​ດີ​ສະ​ຫະ​ລັດ​ນັ້ນ ທ່ານ​ໂຈ ໄບ​ເດັນ ອະ​ດີດ​ຮອງ​ປະ​ທາ​ນາ​ທິ​ບໍ​ດີ​ສະ​ຫະ​ລັດ ກຳ​ລັງ​ຕໍ່​ສູ້​ເພື່ອໃຫ້ຊີ​ວິດ​ທາງ​ການ​ເມືອງ​ຂອງ​ທ່ານ​ຢູ່​ລອດ.

ແຕ່​ຮ່ອງ​ຮອຍ​ຕ່າງໆທີ່ສະ​ແດງ​ໃຫ້​ເຫັນ​ວ່າ ທ່ານ​ອາດ​ຈະ​ເປັນ​ຜູ້​ໄດ້​ຮັບ​ໄຊ​ຊະ​ນະ ​ການ​ເລືອກ​ຕັ້ງ​ຂັ້ນ​ຕົ້ນຜູ້​ສະ​ໝັກ​ປະ​ທາ​ນາ​ທິ​ບໍ​ດີ​ຂອງ​ພັກ​ເດ​ໂມ​ແຄ​ຣັດ​ທີ່​ລັດ​ຄາ​ໂຣ​ໄລ​ນາ​ໃຕ້ແມ່ນ​ເປີດ​ໂອ​ກາດ​ໃຫ້​ທ່ານ​ໃນ​ການ​ແຂ່ງ​ຂັນ​ເພື່ອ​ໃຫ້​ໄດ້​ຮັບ​ການ​ແຕ່ງ​ຕັ້ງ​ທີ່​ໃຊ້​ເວ​ລາ​ຍາວ​ນານ​ຂອງ​ພັກ ທີ່​ຈະ​ຕິດ​ຕາມ​ມາ​ໃນ​ເດືອນ​ມີ​ນາ.

ທ່ານ​ໄບ​ເດັນ​ໄດ້​ປະ​ກາດ​ຢ່າງ​ມີ​ຄວາມ​ເຊື່ອ​ໝັ້ນ ຢູ່​ທີ່​ການ​ໂຕ້​ວາ​ທີ​ຂອງຜູ້​ສະ​ໝັກ​ປະທາ​ນາ​ທິ​ບໍ​ດີພັກ​ເດ​ໂມ​ແຄ​ຣັດ​ໃນ​ຄືນ​ວັນ​ອັງ​ຄານ​ຜ່ານ​ມານີ້​ວ່າ ທ່ານ​ຈະ​ເປັນ​ຜູ້ໄດ້​ຮັບ​ໄຊ​ຊະ​ນະ ໃນ​ລັດ​ພາກ​ໃຕ້​ດັ່ງ​ກ່າວ ແລະ​ການ​ຢັ່ງ​ຫາງ​ສຽງ​ຈຳ​ນວນ​ນຶ່ງ​ໃຫ້ການ​ສະ​ໜັບ​ສະ​ໜຸນ ​ຕໍ່​ການ​ກ່າວ​ອ້າງ​ຂອງ​ທ່ານໄບ​ເດັນ. ເວັບ​ໄຊ​ການ​ຢັ່ງຫາງ ສຽງ fivethirtyeight.com ສະ​ແດງ​ໃຫ້​ເຫັນ​ວ່າ ທ່ານ​ໄບ​ເດັນ​ໄດ້​ຮັບ​ຄະ​ແນນ​ສຽງປະ​ມານ 30 ເປີ​ເຊັນ​ຂອງ​ຜູ້​ປ່ອນ​ບັດ ຕິດ​ຕາມ​ໂດຍ​ຜູ້​ມີ​ຄະ​ແນນ​ສຽງ​ນຳ​ໜ້າໃນ​ທົ່ວ​ປະ​ເທດ ທ່ານ​ເບີ​ນີ ແຊນ​ເດີ​ຣ໌​ສ ທີ່​ໄດ້​ຮັບ 23 ເປີ​ເຊັນ ແລະ​ມະ​ຫາ​ເສດຖີ ທ່ານ ທອມ ສ​ເຕ​ເຢີ ທີ່​ໄດ້​ຮັບ​ຄະ​ແນນ​ເປັນ​ທີ 3 ດ້ວຍ 13 ເປີ​ເຊັນ.

ທ່ານ​ໄບ​ເດັນ ພ້ອມ​ດ້ວຍຜູ້​ມີ​ສິດ​ປ່ອນ​ບັດ​ຊາວ​ອາ​ເມ​ຣິ​ກັນ​ເຊື້ອ​ສາຍ​ອາ​ຟ​ຣິ​ກາ​ທີ່ ໃຫ້​ການ​ສະ​ໜັບ​ສະ​ໜຸນ​ມາ​ເປັນ​ເວ​ລາ​ດົນ​ນານນັ້ນ ຫວັງ​ວ່າຈະ​ໄດ້​ຮັບ​ໄຊ​ຊະ​ນະຢູ່​ໃນລັດ ທີ່​ຊາວ​ຜິວ​ດຳ​ປະ​ກອບ​ເປັນ​ຫຼາຍກວ່າ​ເຄິ່ງ​ນຶ່ງ​ຂອງ​ຜູ້​ມີ​ສິດ​ປ່ອນ​ບັດ​ຂອງພັກ​ເດ​ໂມ​ແຄ​ຣັດ. ທ່ານ​ໄດ້​ກ່າວ​ເຖິງ​ປະ​ສົບ​ພ​ະ​ການ​ໃນ​ຖາ​ນະ​ຮອງ​ປະ​ທາ​ນາ​ທິ​ບໍ​ດີ​ເປັນ​ເວ​ລາ 8 ປີ່ ພາຍ​ໃຕ້​ປະ​ທາ​ນາ​ທິ​ບໍ​ດີ​ຄົນ​ຜິວ​ດຳ​ຂອງ​ປະ​ເທດ​ພຽງ​ຄົນ​ດຽວ​ເທົ່າ​ນັ້ນ ທ່ານ​ບາ​ຣັກ​ ໂອບາ​ມາ. ໃນ​ວັນ​ພຸດ​ວານນີ້ ສະ​ມາ​ຊິກ​ສ​ະ​ພາ ​ທີ່​ສຳ​ຄັນ ຄົນ​ນຶ່ງ​ຈາກ​ລັດ​ດັ່ງ​ກ່າວ ສະ​ມາ​ຊິກ​ສະ​ພາ​ຕ່ຳ ເຈມ​ສ໌ ໄຄ​ລ​ເບີນ ກໍ​ໄດ້​ປະ​ກາດ​ໃຫ້​ການ​ສະ​ໜັບ​ສະ​ໜຸນ​ຕໍ່​ທ່ານ​ໄບ​ເດັນ.

ທ່ານ​ໄຄ​ລ​ເບີນ ກ່າວ​ວ່າ “ຂ້າ​ພະ​ເຈົ້າ​ໄດ້​ກ່າວ​ຖະ​ແຫຼງ​ຕໍ່​ສື່ມວນ​ຊົນ ຂ້າ​ພະ​ເຈົ້າ​ໄດ້​ຮູ້​ຈັກ​ມາ​ເປັນ​ເວ​ລາ​ດົນ​ນານ ຕໍ່​ຜູ້​ທີ່​ຂ້າ​ພະ​ເຈົ້າ​ຈະ​ປ່ອນ​ບັດ​ໃຫ້. ແຕ່​ຂ້າ​ພະ​ເຈົ້າຢາກ​ໃຫ້​ປະ​ຊາ​ຊົນ​ຮູ້​ວ່າ ຂ້າ​ພະ​ເຈົ້າ​ຈະ​ປ່ອນ​ບັດ​ເອົາ​ທ່ານ​ໄບ​ເດັນ. ລັດ​ຄາ​ໂຣ​ໄລນາ​ໃຕ້ ຄວນ​ປ່ອນ​ບັດ​ເອົາ​ທ່ານ​ໄບ​ເດັນ.”

ທ່ານ​ໄບ​ເດັນ ຄັ້ງ​ນຶ່ງ ​ເຄີຍ​ເປັນ​ຜູ້​ທີ່​ໄດ້​ຮັບ​ຄະ​ແນນ​ສຽງ​ນຳ​ໜາ ໃນ​ການ​ຢັ່ງ​ຫາງ​ສຽງ​ຜູ້​ມີ​ສິດ​ປ່ອນ​ບັດ​ພັກ​ເດ​ໂມ​ແຄ​ຣັດ ໃນ​ຖາ​ນະ​ຜູ້​ສະ​ໝັກ​ທີ່​ມີ​ໂອ​ກາດ​ຫຼາຍ​ທີ່​ສຸດທີ່​ຈະ​ເອົາ​ຊະ​ນະ​ປະ​ທາ​ນາ​ທິ​ບໍ​ດີ ດໍ​ໂນ​ລ ທ​ຣຳ. ແຕ່ໃນເວ​ລານີ້ ທ່ານ​ແຊນ​ເດີ​ຣ໌​ສ​ສະ​ມາ​ຊິກ​ສະ​ພາ​ສູງ​ຈາກ​ລັດ​ເວີ​ມັອນ ໃນ​ພາກ​ຕາ​ເວັນ​ອອກ​ສຽງ​ເໜືອ​ຂອງ​ສະ​ຫະ​ລັດ ແລະ​ປະ​ກາດ​ຕົນ​ເອງວ່າເປັນ​ນັກ​ສັງ​ຄົມ​ນິ​ຍົມ​ປະ​ຊາ​ທິ​ປ​ະ​ໄຕ​ນັ້ນ ໄດ້​ຜັກ​ດັນໃຫ້​ທ່ານ​ໄບ​ເດັນ​ລົງ​ມາ​ເປັນ​ທີ 2 ໃນ​ການ​ຢັ່ງ​ຫາງ​ສຽງ​ທົ່ວ​ປະ​ເທດ ຫລັງ​ຈາກ​ໄດ້
ຊະ​ນະ​ການ​ປ່ອນ​ບັດ​ລົງ​ຄະ​ແນນ​ສຽງ​ຂອງ​ປະ​ຊາ​ຊົນໃນ​ການ​ແຂ່ງ​ຂັນ​ເພື່ອ​ຖືກ​ສະເໜີ​ຊື່​ຂອງ​ພັກ ຢູ່​ໃນ 3 ລັດ​ທຳ​ອິດ​ໃນ​ເດືອນນີ້.

ໃນ​ຂະ​ນະ​ດຽວ​ກັນ ທ່ານ​ໄບ​ເດັນ​ໄດ້​ຮັບ​ຄະ​ແນນ​ສຽງ​ເປັນ​ທີ 4 ຢູ່​ລັດ​ໄອ​ໂອ​ວາ ທີ 5 ຢູ່​ລັດ​ນິວ​ແຮມ​ເຊີ ແລະ​ມີ​ຄະ​ແນນ​ສຽງ​ຫ່າງໆ​ເປັນ​ທີ​ 2 ຢູ່​ລັດ​ເນ​ວາ​ດາ​ໃນມື້​ວັນ​ເສົາ​ແລ້ວນີ້.

ອ່ານ​ຂ່າວນີ້​ເປັນ​ພາ​ສາ​ອັງ​ກິດ

XS
SM
MD
LG