ປະທານາທິບໍດີໂຈ ໄບເດັນ ແລະສະຕີໝາຍເລກນຶ່ງ, ທ່ານນາງຈີລ ໄບເດັນໄດ້ພົບກັບ
ຄອບຄົວຂອງສະມາຊິກທະຫານ ຂອງສະຫະລັດ 13 ຄົນ ທີ່ເສຍຊີ ວິດໃນການວາງ
ລະເບີດ ຢູ່ໃກ້ກັບສະໜາມບິນກາບູລ ໃນອາທິດແລ້ວນີ້. ຢ່າງໜ້ອຍມີຊາວອາຟຣິກາ
170 ຄົນ ເສຍຊີວິດໃນເຫດລະເບີດດັ່ງກ່າວ.
ສະມາຊິກທະຫານສະຫະລັດ 13 ຄົນດັ່ງກ່າວມີອາຍຸລະຫວ່າງ 20 ຫາ 31 ປີ ໃນນັ້ນ 5 ຄົນມີອາຍຸພຽງແຕ່ 20 ປີ. ຄອບຄົວຂອງເຂົາເຈົ້າໄດ້ພົບກັບທ່ານປະທານາທິບໍດີ ຢູ່ທີ່ຖານທັບອາກາດ ໂດເວີ (Dover) ໃນລັດເດລາແວ, ບ່ອນທີ່ເຂົາເຈົ້າໄດ້ເຂົ້າຮ່ວມໃນ “ການສົ່ງມອບຢ່າງມີກຽດ,” ເຊິ່ງເປັນພິທີທາງທະຫານໃນການຮັບເອົາຊາກສົບຂອງຜູ້ທີ່ເສຍຊີວິດໃນການສູ້ລົບຢູ່ຕ່າງປະເທດ.
“ທ່ານປະທານາທິບໍດີແລະສະຕີໝາຍເລກນຶ່ງ ຈະໄປພົບປະກັບຄອບຄົວຂອງສະມາຊິກທະຫານອາເມຣິກັນທີ່ເສຍຊີວິດທີ່ໄດ້ສະຫລະຊີວິດຂອງຕົນເພື່ອຊ່ວຍເຫຼືອຊາວອາເມຣິກັນ, ຄູ່ຮ່ວມພາຄີຂອງພວກເຮົາ, ແລະພັນທະມິດອັຟການິສຖານຂອງພວກເຮົາ ຢູ່ໃນນະຄອນຫຼວງກາບູລ,” ນັ້ນຄືຄໍາເວົ້າຕອນນຶ່ງ ຢູ່ໃນຖະແຫຼງການຂອງທຳນຽບຂາວ ທີ່ກ່າວອອກມາກ່ອນໜ້ານັ້ນ.
ການໂຈມຕີທີ່ຮ້າຍແຮງໃນອາທິດແລ້ວນີ້ ໄດ້ເກີດຂຶ້ນໃນຂະນະທີ່ຫຼາຍພັນຄົນໄປເຕົ້າໂຮມກັນຢູ່ນອກສະໜາມບິນ, ໃນການພະຍາຍາມອອກຈາກອັຟການິສຖານຫຼັງຈາກພວກຕາລີບານ ເຂົ້າຍຶດເອົາປະເທດ. ເຄືອຂ່າຍກຸ່ມລັດອິສລາມໃນອັຟການິສຖານ ໄດ້ອ້າງເອົາຄວາມຮັບຜິດຊອບ ໃນເຫດລະເບີດດັ່ງກ່າວ.