ປະທານາທິບໍດີສະຫະລັດ ທ່ານ ໂຈ ໄບເດັນ ປະກາດໃນວັນຈັນວານນີ້ ການຜ່ອນໂທດໃຫ້ນັກໂທດປະຫານຊີວິດ 37 ຄົນ ຈາກ 40 ຄົນ ເຫຼືອຕິດຄຸກຕະຫຼອດຊີວິດ ກ່ອນທີ່ທ່ານຈະພົ້ນຈາກຕຳແໜ່ງ ໃນວັນທີ 20 ມັງກອນ 2025 ອີງຕາມລາຍງານຂອງອົງການຂ່າວເອພີ.
ຄຳປະກາດນີ້ ຈະຊ່ອຍຮັກສາຊີວິດຂອງນັກໂທດທີ່ຖືກຕັດສິນປະຫານຊີວິດ ຈາກຄະດີຄາດຕະກຳເຈົ້າໜ້າທີ່ຕຳຫຼວດ ແລະທະຫານຄາດຕະກຳຜູ້ອື່ນ ໃນພື້ນທີ່ຂອງລັດຖະບານກາງ ຫຼືກໍ່ເຫດປຸ້ນທະນາຄານໂດຍມີຜູ້ເສຍຊີວິດ ລວມທັງຄະດີຢາເສບຕິດ ແລະສັງຫານເຈົ້າໜ້າທີ່ຫຼືນັກໂທດຄົນອື່ນ ໃນສະຖານທີ່ຄຸມຂັງຂອງລັດຖະບານກາງ.
ນັ້ນກໍໝາຍຄວາມວ່າ ຈະເຫຼືອນັກໂທດທີ່ຈະຖືກປະຫານຊີວິດໃນຄະດີຂອງ ລັດຖະບານກາງສະຫະລັດ ພຽງ 3 ຄົນເທົ່ານັ້ນ ກໍຄື ທ້າວ ດີແລນນ໌ ຣູຟ ຜູ້ກໍ່ເຫດສັງຫານສະມາຊິກໂບດຊາວຜິວດຳ 9 ຄົນຂອງໂບດແຫ່ງນຶ່ງໃນ ລັດຄາໂຣໄລນາໃຕ້ ເມື່ອປີ 2015, ທ້າວ ໂຈກຄາ ຊານາເຢບ ມືລະເບີດໃນ ງານແລ່ນມາຣາທອນທີ່ນະຄອນບອສຕັນ ເມື່ອປີ 2013 ແລະ ທ້າວ ໂຣເບີດ ບາວ໌ເອີຣ໌ສ ຜູ້ຍິງສັງຫານຊາວຢີວທີ່ໂບດແຫ່ງນຶ່ງໃນນະຄອນ ພິດສເບີກ ເມື່ອປີ 2018.
ກ່ອນໜ້ານີ້ ທ່ານໄບເດັນ ເຄີຍຮັບປາກວ່າ ຈະຍຸຕິໂທດປະຫານຊີວິດໃນຄະດີ ທີ່ບໍ່ກ່ຽວຂ້ອງກັບການກໍ່ການຮ້າຍ ແລະການສັງຫານໝູ່ ເນື່ອງຈາກຄວາມກຽດ ຊັງດ້ານເຊື້ອຊາດຜິວພັນ ໂດຍໃນຊ່ວງຫາສຽງເລືອກຕັ້ງເມື່ອປີ 2020 ເວັບໄຊ້ ຫາສຽງຂອງທ່ານໄບເດັນ ລະບຸວ່າ ທ່ານຈະ “ພະຍາຍາມຜ່ານຮ່າງກົດໝາຍ ຍົກເລີກການປະຫານຊີວິດໃນຄະດີຂອງລັດຖະບານກາງ ແລະຈະຊັກຈູງໃຫ້ລັດ ຕ່າງໆເຮັດຕາມ.”
ຖະແຫລງການຂອງທ່ານໄບເດັນ ໃນວັນຈັນວານນີ້ ລະບຸວ່າ “ການຜ່ອນໂທດ ຄັ້ງນີ້ ສອດຄ່ອງກັບນະໂຍບາຍລະງັບໂທດປະຫານຂອງລັດຖະບານຊຸດນີ້ ໃນຄະດີທີ່ບໍ່ກ່ຽວຂ້ອງກັບການກໍ່ການຮ້າຍ ແລະການສັງຫານໝູ່ ເນື່ອງຈາກ ຄວາມກຽດຊັງດ້ານເຊື້ອຊາດຜິວພັນ.”
ແລະວ່າ ຕົນເອງຍັງຄົງປະນາມການຄາດຕະກຳ ແລະເສຍໃຈຕໍ່ບັນດາເຫຍື່ອ ຂອງການກະທຳເຫຼົ່ານັ້ນ ລວມທັງຄວາມເຈັບປວດຂອງຄອບຄົວຜູ້ທີ່ສູນເສຍ ແຕ່ຕົນກໍເຊື່ອໝັ້ນຫຼາຍຂຶ້ນວ່າ ການໃຊ້ໂທດປະຫານຊີວິດໃນລະດັບລັດຖະບານ ກາງນັ້ນ ຄວນຍຸຕກິລົງໄດ້ແລ້ວ.
ທ່ານ ໄບເດັນ ຍັງບອກດ້ວຍວ່າ ທ່ານບໍ່ອາດຢືນຢູ່ເສີຍໆ ໃນຂະນະທີ່ລັດ ຖະບານຊຸດໃໝ່ຈະນຳໂທດປະຫານຊີວິດມາໃຊ້ອີກໄດ້.
ທັງນີ້ ວ່າທີປະທານາທິບໍດີ ດໍໂນລ ທຣຳ ເຄີຍເນັ້ນຢ້ຳຫຼາຍຄັ້ງວ່າ ຈະຂະ ຫຍາຍການໃຊ້ໂທດປະຫານຊີວິດ ເຊັ່ນ ໃນການຜ່າຍແພ້ຫາສຽງເມື່ອຕົ້ນປີນີ້ ທ່ານທຣຳ ບອກວ່າ ຈະນຳໂທດປະຫານມາໃຊ້ກັບຜູ້ຄ້າຢາເສບຕິດ ພ້ອມກັບ ຍົກຍ້ອງຈີນ ທີ່ໃຊ້ວິທີການທີ່ເດັດຂາດກັບພວກນັກຄ້າຢາເສບຕິດດ້ວຍ.
ໂດຍໃນການດຳລົງຕຳແໜ່ງສະໄໝທຳອິດຂອງທ່ານທຣຳ ມີການປະຫານ ຊີວິດນັກໂທດ 13 ຄົນ ຫຼາຍກວ່າປະທານາທິບໍດີທຸກຄົນ ໃນປະຫວັດສາດ ການເມືອງສະໄໝໃໝ່ຂອງ ສະຫະລັດ.
ຄຳປະກາດຫຼ້າສຸດຂອງທ່ານ ໄບເດັນ ມີຂຶ້ນຫລັງຈາກທີ່ທ່ານຫາກໍ່ອະໄພໂທດ ໃຫ້ແກ່ລູກຊາຍ ຮັນເຕີ ໄບເດັນ ຈາກຄະດີກ່ຽວກັບພາສີ ແລະອາວຸດປືນ ເຖິງແມ່ນວ່າ ກ່ອນໜ້ານີ້ ທ່ານໄບເດັນ ເຄີຍຮັບປາກວ່າ ຈະບໍ່ອະໄພໂທດໃຫ້ ລູກຊາຍຂອງຕົນກໍຕາມ ແລະຍັງນຳໄປສູ່ຄຳຖາມທີ່ວ່າ ທ່ານໄບເດັນ ຈະອະໄພ ໂທດໃຫ້ແກ່ເຈົ້າໜ້າທີ່ໃນລັດຖະບານຊຸດນີ້ ລວມທັງບຸກຄົນໃກ້ຊິດທີ່ຢ້ານວ່າ ຈະຕົກເປັນເປົ້າໝາຍຂອງລັດຖະບານຊຸດໃໝ່ ດ້ວຍຫຼືບໍ່.
ຟໍຣັມສະແດງຄວາມຄິດເຫັນ