ທ່ານ Joe Biden ຮອງປະທານາທິບໍດີສະຫະລັດ ໄດ້ໂອ້ລົມ
ສົນທະນາກັນກັບນາຍົກລັດຖະມົນຕີ Haider al-Abadi ແຫ່ງ
ອີຣັກ ໃນວັນເສົາວານນີ້ ໂດຍໃຫ້ຄຳໝັ້ນໝາຍຂອງສະຫະລັດ
ອີກຄັ້ງໃໝ່ຕໍ່ອີຣັກທີ່ເປັນປະເທດປະຊາທິປະໄຕແລະການຊ່ອຍ
ເຫຼືອຂອງສະຫະລັດ ໃນການເອົາຊະນະຕໍ່ພວກກໍ່ການຮ້າຍລັດ
ອິສລາມໃນອີຣັກ ແລະໃນຊີເຣຍ ນັ້ນ.
ທຳນຽບຂາວ ກ່າວວ່າ ທ່ານ Biden ຍັງໄດ້ສະແດງຄວາມໂສກ
ເສົ້າເສຍໃຈນຳພວກທີ່ໄດ້ຮັບເຄາະຮ້າຍຈາກການໂຈມຕີຂອງ
ພວກກໍ່ການຮ້າຍຕໍ່ພວກພົນລະເຮືອນໃນແບກແດັດ ຮວມທັງ
ພວກປະຊາຊົນຢ່າງໜ້ອຍ 17 ຄົນທີ່ແຈ້ງໃຫ້ຊາບວ່າ ໄດ້ເສຍ
ຊີວິດໄປໃນວັນເສົາວານນີ້ ໃນເຫດລະເບີດແຕກຂຶ້ນສອງບັ້ນ ໃນນະຄອນຫຼວງນັ້ນ.
ການໂອ້ລົມສົນທະນາກັນດັ່ງກ່າວ ມີຂຶ້ນໃນຂະນະທີ່ອົງການຂ່າວຂອງ ຊາວ Kurds ອ້າງແຫຼ່ງຂ່າວຊົນເຜົ່າ Yazidi ທີ່ກ່າວວ່າພວກກໍ່ການຮ້າຍລັດອິສລາມ ໄດ້ສັງຫານພວກຄົນໂທດ Yazidi ຈຳນວນຫຼາຍກວ່າ 300 ຄົນ ທີ່ຄ້າຍແຫ່ງໜຶ່ງທາງພາກຕາເວັນຕົກເມືອງ Mosul ໃນວັນສຸກຜ່ານມານີ້. ຖະແຫຼງການສະບັບໜຶ່ງຈາກພັກກ້າວໜ້າ Yazidi ທີ່ໄດ້
ອ້າງໂດຍອົງການຂ່າວ Shafaq News ໄດ້ປະນາມການສັງຫານນີ້ວ່າ ເປັນ “ການກໍ່
ອາຊະຍາກຳທີ່ໂຫດຫ້ຽມທີ່ສຸດ.”
ໄດ້ມີການອ້າງຄຳເວົ້າຂອງທ່ານ Mahma Khalil ສະມາຊິກສະພານິຕິບັນຍັດ Yazidi ວ່າ ພວກທີ່ເສຍຊີວິດນັ້ນ ແມ່ນຮວມທັງພວກຜູ້ຊາຍ ແມ່ຍິງແລະພວກສູງອາຍຸ. ທ່ານຍັງກ່າວຕື່ມວ່າ ທ່ານເຊື່ອວ່າ ພວກ Yazidi ອື່ນໆອີກປະມານ 1400 ຄົນຍັງຖືກກັກຂັງຢູ່ໃນຄຸກທີ່ເມືອງ Tal Afar ນັ້ນ.
ໃນຂະນະດຽວກັນ ກຳລັງປະສົມພາຍໃຕ້ການນຳພາຂອງສະຫະລັດ ກ່າວວ່າ ກຳລັງທະ
ຫານຍັງສືບຕໍ່ທຳການໂຈມຕີສະຖານທີ່ແຫ່ງຕ່າງໆຂອງກຸ່ມລັດອິສລາມ ໃນອີຣັກ ແລະໃນຊີເຣຍ ໃນວັນເສົາວານນີ້ ຮວມທັງການໂຈມຕີທາງອາກາດ 17 ຄັ້ງ ໃນຊີເຣຍ ແລະເປົ້າ
ໝາຍ ຕື່ມອີກ 7 ແຫ່ງໃນອີຣັກນັ້ນ.
