ວັນອາທິດມື້ນີ້ ເປັນຂີດໝາຍ ຄົບຮອບ 25 ປີ ຂອງການພັງລົງ
ກຳແພງເບີລີນ ຫຼື Berlin Wall ແລະ ບັນດາຜູ້ນຳຂອງໂລກ ທັງ
ໃນປັດຈຸບັນ ແລະ ອະດີດ ໄດ້ເຂົ້າຮ່ວມການສະເຫລີມສະຫຼອງ
ຂີດໝາຍ ດັ່ງກ່າວນີ້ ດ້ວຍການເຕືອນ ກ່ຽວກັບການສືບຕໍ່ແບ່ງ
ແຍກ ໃນບັນດາປະເທດມະຫາອຳນາດ ທີ່ສຳຄັນໆ ຂອງໂລກ.
ປະທານາທິບໍດີສະຫະລັດ ທ່ານ ບາຣັກ ໂອບາມາ ໄດ້ອອກ
ຖະແຫຼງການສະບັບນຶ່ງກ່າວວ່າ ການເຄື່ອນໄຫວຂອງຣັດເຊຍ
ຕໍ່ຢູເຄຣນ ແມ່ນເປັນສິ່ງຊ່ວຍເຕືອນ ຄວາມຊົງຈຳວ່າ ຍັງມີ “ວຽກ
ງານຫຼາຍຢ່າງທີ່ຈະຕ້ອງໄດ້ທຳ” ເພື່ອໃຫ້ຢູໂຣບ ເປັນ “ປຶກ
ແຜ່ນ ມີອິດສະຫລະເສລີ ແລະ ມີສັນຕິພາບ.”
ກຳແພງເບີລິນ ໄດ້ແບ່ງນະຄອນຫຼວງຂອງເຢຍຣະມັນ ແລະ ກາຍມາເປັນຂີດກຳນົດຂອງສົງຄາມເຢັນ ທີ່ເປັນຜົນເຮັດໃຫ້ສະຫະລັດແລະບັນ ດາພັນທະມິດຂອງຕົນ ຕໍ່ຕ້ານກັບສະຫະພາບໂຊຫວຽດ ຫຼັງຈາກສົງຄາມໂລກຄັ້ງທີ 2 ນັ້ນ.
ອະດີດຜູ້ນຳໂຊຫວຽດ ທ່ານ Mikhail Gorbachev ກ່າວໃນວັນເສົາວານນີ້ວ່າ ໂລກແມ່ນ
ພວມກ້າວເຂົ້າສູ່ “ສົງຄາມເຢັນໃໝ່” ແລະບາງຄົນ ກ່າວວ່າ ມັນໄດ້ເລີ້ມຂຶ້ນແລ້ວ.
ຢູ່ທີ່ພິທີສະຫລອງລະນຶກເຖິງວັນຄົບຮອບໃນການພັງລົງຂອງກຳແພງ ເບີລິນນັ້ນ ທ່ານ Gorbachev ກ່າວວ່າ “ການນອງເລືອດ ໃນຢູໂຣບ ແລະ ຕາເວັນອອກກາງ ຊຶ່ງ
ເປັນການສະທ້ອນໃຫ້ເຫັນ ເຖິງການແຕກຫັກລົງ ໃນການສົນທະນາຫາລື
ລະຫວ່າງ ບັນດາປະເທດມະຫາອຳນາດ ທີ່ສຳຄັນໆນັ້ນ ແມ່ນໜ້າເປັນຫ່ວງ
ເປັນໃຍຢ່າງໃຫຍ່ຫລວງ.”
