ທ່ານ Alexander Lukashenko ປະທານາທິບໍດີປະເທດ
ເບຣາຣູສ ຈະໄດ້ຄອງຕໍາແໜ່ງຕື່ມອີກສະໄໝນື່ງ ເປັນສະ
ໄໝທີສີ່ ທີ່ມີວາລະ 5 ປີ ຫລັງຈາກໄດ້ຊະນະດ້ວຍຄະແນນ
ສຽງຖ້ວມທົ້ນ ການເລືອກຕັ້ງໃນວັນອາທິດວານນີ້ ທີ່ດ່າງ
ພ້ອຍດ້ວຍການກວາດລ້າງຢ່າງຮຸນແຮງຂອງຕໍາຫລວດຕໍ່
ພວກປະທ້ວງ ແລະການຈັບກຸມພວກສະມັກເລືອກຕັ້ງຈາກ ຝ່າຍຄ້ານນັ້ນ.
ຄະນະກໍາມະການການເລືອກຕັ້ງໄດ້ເປີດເຜີຍບັດຄະແນນ
ສຽງເລືອກຕັ້ງໃນຕອນເຊົ້າຂອງວັນຈັນມື້ນີ້ ທີ່ສະແດງວ່າ
ທ່ານ Lukashenko ໄດ້ຖືກເລືອກຕັ້ງອີກດ້ວຍຄະແນນສຽງຫລາຍເຖິງ 80 ເປີເຊັນ.
ພວກຝ່າຍຄ້ານກ່າວວ່າ ທ່ານ Lukashenko ໂກງຄະແນນສຽງເລືອກຕັ້ງ ແຕ່ຄະນະສັງ
ເກດການເລືອກຕັ້ງຈາກກຸ່ມ CIS ທີ່ນໍາໂດຍຣັດເຊຍ ກ່າວໃນວັນຈັນນີ້ວ່າ ການປ່ອນບັດ ເລືອກຕັ້ງແມ່ນຈັດຂື້ນຢ່າງຖືກຕ້ອງຕາມກົດໝາຍ. ທ່ານ Sergei Lebedev ຫົວໜ້າ
ຄະນະສັງເກດການເລືອກຕັ້ງ ບອກກັບຜູ້ສື່ຂ່າວວ່າ ພວກສັງເກດການບໍ່ໄດ້ພົບເຫັນຫລັກ
ຖານໃດໆທີ່ເຮັດໃຫ້ຄວາມຖືກຕ້ອງຕາມກົດໝາຍຂອງການເລືອກຕັ້ງຄັ້ງນີ້ ຕົກຢູ່ພາຍໃຕ້ ຄວາມລະແວງສົງໃສ.
ໃນທັນທີທີ່ບ່ອນປ່ອນບັດໄດ້ປິດລົງໃນວັນອາທິດວານນີ້ ພວກຕໍາຫລວດປາບຈະລາຈົນ
ເບລາຣູສ ໄດ້ພາກັນໃຊ້ໄມ້ຄ້ອນເພື່ອຂັບໄລ່ ພວກປະທ້ວງກຸ່ມໃຫຍ່ກຸ່ມນຶ່ງໃນໃຈກາງນະ
ຄອນຫລວງ Minsk ໃຫ້ສະຫລາຍໂຕ. ປະຊາຊົນຫລາຍພັນຄົນພາກັນທ້າທາຍປະທາ
ນາທິບໍດີ ແລະອອກໄປອັ່ງອໍກັນ ຢູ່ເຕັມຈະຕຸລັດ ເອກະລາດ ຫລື Independence Square ນັ້ນ.
ຫລັງຈາກກຸ່ມປະທ້ວງກຸ່ມນຶ່ງໄດ້ທຸບແລະທັບມ້າງ ປະຕູແລະປ່ອງຢ້ຽມຂອງຕຶກສໍານັກງານ
ລັດຖະບານ ແລະ ພະຍາຍາມຈະບຸກເຂົ້າໄປທາງໃນ ພວກກໍາລັງທະຫານກໍໄດ້ເຂົ້າໄປອ້ອມ
ຈະຕຸລັດເອກະລາດໄວ້ ຂະນະທີ່ພວກຕໍາຫລວດປາບຈະລາຈົນ ບຸກເຂົ້າໄປໃນຝຸງຊົນປະທ້ວງ
ມືແກວ່ງໄມ້ຄ້ອນ. ປາກົດວ່າ ຫລາຍຮ້ອຍຄົນຖືກຈັບກຸມ ແລະຜູ້ເຫັນເຫດການລາຍງານວ່າ ມີຜູ້ໄດ້ຮັບບາດເຈັບອີກຈໍານວນຫລວງຫລາຍ.
