ປະທານປະເທດ ຈີນ ທ່ານ ສີ ຈິ້ນຜິງ, ບໍ່ໄດ້ເປັນທີ່ຮູ້ຈັກກັນ ສຳລັບການສະແດງອອກອາລົມຄວາມຮັກແພງໃນສາທາລະນະ.
ສະນັ້ນການກອດຄູ່ຮ່ວມຕຳແໜ່ງຈາກ ຣັດເຊຍ, ທ່ານ ວລາດີເມຍ ປູຕິນ, ສອງຄັ້ງໂດຍທ່ານ ສີ ໃນອາທິດແລ້ວນີ້ ທີ່ຖືກຖ່າຍທອດອອກໂທລະພາບຂອງລັດຖະບານ ຈີນ ແລະ ຣັດເຊຍ, ໄດ້ຖືກພິຈາລະນາດັ່ງກັບສັນຍານຕໍ່ໂລກທີ່ຖືກຄິດໄລ່ໄວ້ແລ້ວ ກ່ຽວກັບ ສາຍພົວພັນສ່ວນຕົວ ແລະ ພູມສາດການເມືອງທີ່ກຳລັງງອກງາມ.
ການຢ້ຽມຢາມ ຈີນ ຂອງທ່ານ ປູຕິນ ໄດ້ຢ້ຳໃຫ້ເຫັນສາຍພົວພັນດ້ານເສດຖະກິດທີ່ກຳລັງຈະເລີນເຕີບໂຕລະຫວ່າງ ມົສກູ ແລະ ປັກກິ່ງ, ໃນຂະນະທີ່ສອງປະເທດດັ່ງກ່າວໄດ້ເຊັນຫຼາຍຂໍ້ຕົກລົງທີ່ແນເປົ້າໃສ່ການຫຼໍ່ຫຼອມສາຍພົວພັນທີ່ໃກ້ຊິດຂຶ້ນ, ແມ່ນກະທັ້ງທີ່ຕາເວັນຕົກພະຍາຍາມຈະແຍກ ມົສກູ ໃຫ້ໂດດດ່ຽວ ລຸນຫຼັງການບຸກລຸກຂອງເຂົາເຈົ້າໃນ ຢູເຄຣນ ກໍຕາມ.
ການສະແດງຄວາມອົບອຸ່ນສ່ວນຕົວດັ່ງກ່າວ ແມ່ນມາພ້ອມກັບພິທີທີ່ຫຼູຫຼາທາງລັດຖະການຫຼາຍຄັ້ງ, ເຊິ່ງເຫັນໄດ້ຢ່າງຊັດເຈນວ່າ ເປັນການລະນຶກເຖິງວັນຄົບຮອບ 75 ປີຂອງສາຍພົວພັນທາງການທູດ.
ທ່ານ ສີ ໄດ້ກ່າວຕໍ່ທ່ານ ປູຕິນ ໃນລະຫວ່າງການເຈລະຈາໃນ ປັກກິ່ງ ເມື່ອວັນທີ 16 ພຶດສະພາວ່າ “ມັນແມ່ນທາງເລືອກດ້ານຍຸດທະສາດຮ່ວມກັນຂອງທັງສອງປະເທດ ເພື່ອເສີມຂະຫຍາຍສາຍພົວພັນດ້ານຍຸດທະສາດແບບເລິກເຊິ່ງ, ຂະຫຍາຍການຮ່ວມມື ທີ່ເປັນຜົນປະໂຫຍດຕໍ່ທັງສອງຝ່າຍ ແລະ ປະຕິບັດຕາມແນວໂນ້ມທາງປະຫວັດສາດທົ່ວໄປ ກ່ຽວກັບ ຫຼາຍມະຫາອຳນາດຢູ່ໃນໂລກ ແລະ ເສດຖະກິດໂລກາພິວັດ.”
ທ່ານ ປູຕິນ ໄດ້ຍົກຍ້ອງການຄ້າສອງຝ່າຍທີ່ເພີ່ມຂຶ້ນລະຫວ່າງ ຣັດເຊຍ ແລະ ຈີນ, ເຊິ່ງທ່ານກ່າວວ່າ ໄດ້ບັນລຸເຖິງ 240 ຕື້ໂດລາຕໍ່ປີ ແລະ ໄດ້ກ່າວຢ້ຳເຖິງຄວາມທະເຍີທະຍານໃນການຂາຍນ້ຳມັນ ແລະ ແກັສ ຫຼາຍຂຶ້ນກວ່າເກົ່າໃຫ້ ປັກກິ່ງ.
ຟໍຣັມສະແດງຄວາມຄິດເຫັນ