ປະທານຂອງສະພາປົກຄອງການກະຈາຍສຽງ ຫຼື BBG ທີ່ຄວບຄຸມວິທະຍຸສຽງອາເມຣິກາ ຫຼື Voice of America, ວິທະຍຸຢູໂຣບເສລີ ແລະການກະຈາຍສຽງອື່ນໆ ຂອງສະຫະລັດ ໄດ້ຖືກປະຕິເສດບໍ່ໃຫ້ເຂົ້າໄປຍັງຣັດເຊຍໃນສັບປະດານີ້ແລະຍັງຖືກຄຸມຕົວເປັນເວລາຫຼາຍໆຊົ່ວໂມງ ຢູ່ສະໜາມບິນນາໆຊາດທີ່ມົສກູ.
ທ່ານ Jeff Shell ປະທານຂອງສະພາດັ່ງກ່າວ ທັງຍັງເປັນປະທານຂອງບໍລິສັດສື່ຍັກໃຫຍ່ NBC ນຳ. ເຈົ້າໜ້າທີ່ຣັດເຊຍ ໄດ້ກ່າວວ່າ ທ່ານໄດ້ຖືກຈັດເຂົ້າໃນ “ບັນຊີລາຍຊື່ສ່ວນ ບຸກຄົນ ທີ່ຖືກຫ້າມບໍ່ໃຫ້ເຂົ້າໄປໃນຣັດເຊຍ ຍ້ອນບົດບາດຂອງທ່ານທີ່ຊີ້ນຳການໂຄສະນາຊວນເຊື່ອຕ້ານຕໍ່ຣັດເຊຍ” ນັ້ນຄືລາຍງານຂອງອົງການຂ່າວ Tass.
ເຈົ້າໜ້າທີ່ຣັດເຊຍ ໄດ້ດຶງທ່ານ Shell ອອກຈາກແຖວຂອງພວກຜູ້ໂດຍສານ ທີ່ເດີນທາງເຂ້າໄປຍັງຣັດເຊຍ ຢູ່ສະໜາມບິນນາໆຊາດ ໃນແລງວັນອັງຄານຜ່ານມານີ້ ເຖິງແມ່ນວ່າທ່ານມີວີຊາເຂົ້າໄປຍັງຣັດເຊຍ ຢ່າງຖືກຕ້ອງຕາມກົດໝາຍ ກໍຕາມ.
ທ່ານ Shell ໄດ້ກ່າວວ່າ ທ່ານໄດ້ຖືກກັກຂັງໄວ້ ໃນຫ້ອງໃສ່ກຸນແຈ ເປັນເວລາຫຼາຍໆຊົ່ວໂມງ ກ່ອນທີ່ເຈົ້າໜ້າທີ່ຈະສົ່ງຂຶ້ນເຮືອບິນ ອອກເດີນທາງປະເທດໄປຍັງ Amsterdam. ປະທານສະພາ BBG ໄດ້ບອກກັບພວກເພື່ອນຮ່ວມງານວ່າ ທ່ານໄດ້ຖືກແຈ້ງໃຫ້ຊາບເຖິງການປະຕິເສດການບໍ່ໃຫ້ທ່ານເຂົ້າໄປຍັງຣັດເຊຍ ຢ່າງເປັນການຖາວອນ ແລະປະຈຸບັນນີ້ ແມ່ນຖືກເກືອດຫ້າມເຂົ້າຣັດເຊຍ ຕະຫຼອດຊີວິດ.
“ເຈົ້າໜ້າທີ່ຍາມຖືອາວຸດ ເຂົ້າມາຄຸມຕົວຂ້າພະເຈົ້າປະມານ 5 ໂມງເຊົ້າ ແລະນຳຂ້າພະເຈົ້າໄປຍັງເຮືອບິນ ແລະເຖິງບ່ອນນັ່ງຂ້າພະເຈົ້າ” ຊຶ່ງທ່ານ Shell ໄດ້ບອກກັບບັນດານັກຂ່າວ ຕອນທີ່ທ່ານໄປຮອດ ຢູໂຣບຕາເວັນຕົກ ໃນເຊົ້າວັນພຸດວານນີ້. ທ່ານຍັງໄດ້ກ່າວຕື່ມວ່າ“ເຈົ້າໜ້າທີ່ໄດ້ມອບໜັງສືເດີນທາງໃຫ້ກັບນັກບິນ ແລະບອກກັບລາວວ່າ ບໍ່ໃຫ້ມອບໜັງສືເດີນທາງຄືນໃຫ້ຂ້າພະເຈົ້າຈົນກວ່າເຖິງແຜ່ນດິນໂຮນລັງ ຊຶ່ງມັນເປັນເລື່ອງອັບອາຍຂາຍໜ້າທີ່ສຸດ.”
ກະຊວງການຕ່າງປະເທດຣັດເຊຍ ໄດ້ກ່າວວ່າ ທ່ານ Shell ແມ່ນໄດ້ຖືກຫ້າມເຂົ້າໄປຍັງ ຣັດເຊຍ ຍ້ອນວ່າ ທ່ານເປັນປະທານຂອງເຄືອຄ່າຍໂຄສະນາຊວນເຊື່ອຂອງລັດຖະບານສະຫະລັດ.
