ໃນເດືອນໜ້ານີ້ ປະທານາທິບໍດີສະຫະລັດ ທ່ານບາຣັກ ໂອບາມາ ຈະເຮັດໃນອັນທີ່ຄາດກັນວ່າ ເປັນການເດີນທາງເທື່ອສຸດທ້າຍມາຍັງເຂດເອເຊຍ.
ທຳນຽບຂາວໄດ້ປະກາດໃນວັນພະຫັດວານນີ້ວ່າ ໃນວັນທີ 2 ກັນຍາ ປະທານາທິບໍດີໂອບາມາ ຈະເດີນທາງມາປະເທດຈີນ ເພື່ອເຂົ້າຮ່ວມກອງປະຊຸມສຸດຍອດຂອງກຸ່ມຈີ 20 ທີ່ເມືອງຫາງໂຈ່ວ.
ຫລັງຈາກນັ້ນ ທ່ານກໍຈະເດີນທາງມາປະເທດລາວ ຊຶ່ງທ່ານຈະເປັນປະທານາທິບໍດີຄົນ ທຳອິດ ມາຢ້ຽມຢາມປະເທດດັ່ງກ່າວ ທີ່ຕັ້ງຢູ່ໃນເຂດເອເຊຍຕາເວັນອອກສຽງໃຕ້.
ທີ່ປະເທດຈີນ ທ່ານໂອບາມາ ຈະເພັ່ງເລັງໃສ່ເລື້ອງຄວາມສຳຄັນ ກ່ຽວກັບໂອກາດທາງດ້ານເສດຖະກິດທີ່ຕ່າງຝ່າຍຕ່າງມີໂອກາດແລະຜົນປະໂຫຍດນຳກັນ ນັ້ນຄືຄຳເວົ້າຂອງໂຄສົກທຳນຽບຂາວ ທ່ານ Josh Earnest.
ນອກນັ້ນ ປະທານາທິບໍດີ ໂອບາມາ ຍັງຈະໄດ້ພົບປະ ກັບປະທານປະເທດຈີນ ທ່ານ Xi Jinping ໃນຂະນະທີ່ຄວາມເຄັ່ງຕຶງຍັງສືບຕໍ່ເພີ້ມທະວີຂຶ້ນຢູ່ໃນຂົງເຂດກ່ຽວກັບເລື້ອງທະເລຈີນໃຕ້ແລະຄວາມໄຝ່ຝັນທາງດ້ານນິວເຄລຍຂອງເກົາຫຼີເໜືອ.
ຢູ່ທີ່ປະເທດລາວ ປະທານາທິບໍດີ ຈະເຂົ້າຮ່ວມກອງປະຊຸມ ສະຫະລັດກັບອາຊ່ຽນ ແລະເຈລະຈາຫາລືກັບປະທານປະເທດລາວທ່ານບຸນຍັງ ວໍລະຈິດ ແລະເຈົ້າໜ້າທີ່ຄົນສຳຄັນອື່ນໆເພື່ອສ້າງຄວາມກ້າວໜ້າໃຫ້ແກ່ການຮ່ວມມືລະຫວ່າງສະຫະລັດແລະລາວໃນດ້ານເສດຖະກິດ ການພັດທະນາ ແລະຄວາມສຳພັນລະຫວ່າງປະຊາຊົນກັບປະຊາຊົນ.
ນອກນັ້ນແລ້ວ ການເດີນທາງໃນຄັ້ງນີ້ ຍັງຈະເປັນໂອກາດໃຫ້ແກ່ທ່ານໂອບາມາ ໄດ້ຊຸກຍູ້ຂໍ້ຕົກລົງການຄ້າພາຄີຂ້າມມະຫາສະມຸດປາຊີຟິກ ຫຼື TPP ທີ່ມີສະມາຊິກ 12 ປະເທດ ອັນເປັນພາກສ່ວນນຶ່ງໃນຍຸດທະສາດຫັນໄປສູ່ເຂດເອເຊຍທີ່ທ່ານຫວັງວ່າລັດຖະສະພາຈະໃຫ້ການອະນຸມັດ ກ່ອນສະໄໝການດຳລົງຕຳແໜ່ງຂອງທ່ານຈະສິ້ນສຸດລົງໃນວັນທີ 20 ມັງກອນປີໜ້າ.
ໃນລະຫວ່າງທີ່ກຳຕຳແໜ່ງຢູ່ໃນທຳນຽບຂາວນັ້ນ ປະທານາທິບໍດີໂອບາມາໄດ້ຊອກຫາຊ່ອງທາງເພື່ອຈະສ້າງຄວາມກ້ຳເກິ່ງຄືນໃໝ່ ຫລືຫັນການປ້ອງກັນປະເທດແລະເສດຖະ ກິດຂອງສະຫະລັດ ໄປຕ້ານກັບອິດທິພົນທີ່ມີເພີ້ມຂຶ້ນຂອງຈີນຢູ່ໃນຂົງເຂດດັ່ງກ່າວ.
