ບັງກລາແດັສ ​ຕັດສິນ​ ປະຫານ​ຊິວິດ ຜູ້ນຳ ພັກສາສະໜາ ອິສລາມ (ວີ​ດີ​ໂອ/ສະ​ໄລ​ດ໌)

ສານ​ສູງ​ສຸດຂອງ Banglasdesh ​ໄດ້ຕັດສິນ​ລົງ​ໂທດປະຫານ
​ຊິວິດ ຕໍ່ຜູ້​ນໍາ​ພັກສາ​ສະໜາ ອິສລາມ ​ທີ່​ຖືກ​ກ່າວ​ຫາ​ວ່າ ກໍ່​ອາດ
ຊະຍາ​ກຳ​ສົງຄາມ ໃນ​ລະຫວ່າງ​ສົງຄາມ​ເພື່ອ​ຄວາມ​ເປັນ​ເອກ
​ກະລາດ​ ຕໍ່ຕ້ານ​ປາ​ກິ​ສຖານ ຂອງປະ​ເທດ​ດັ່ງກ່າວ ໃນປີ 1971
ທີ່​ເປັນ​ສົງຄາມ​ກາງ​ເມືອງ ຫຼັງ​ຈາກ​ທີ່​ໄດ້​ມີ​ການ​ຕັດສິນ​ໂທດ
ກ່ອນ​ໜ້ານີ້ ​ໂດຍສານ​ອາດຊະຍາ​ກຳ​ສົງຄາມ​ ທີ່​ເຫັນວ່າ
ເບົາເກີນໄປ.

ໃນວັນຈັງຄານມື້ນີ້ ທີ່ສານ​ສູງສຸດ​ໄດ້​ຕັດສິນວ່າ ທ່ານ Abdul
Quader Mollah ຜູ້​ນໍາ​ຂອງ​ພັກ Jemaate-Islami ຄວນ​ຖືກ​ລົງ
​ໂທດ​ປະຫານຊີວິດ​ຍ້ອນ​ໄດ້​ກໍ່​ໂທດ​ກຳ​ຕ່າງໆ​ຕ້ານ​ມະນຸດ​ແທນ​ທີ່​
ຈະ​ເປັນໂທດຈໍາ​ຄຸກ​ຕະຫຼອດ​ຊີວິດ ທີ່​ທ່ານ​ໄດ້​ຮັບ​ໃນ​ຂັ້ນຕົ້ນນັ້ນ.


​ໄດ້​ມີ​ການ​ປະ​ທ້ວງ​ລະ​ເບີດຂຶ້ນ ຫຼັງ​ຈາກ​ໄດ້​ມີ​ການ​ຕັດສິນ​ໂທດ ​ໃນຂັ້ນຕົ້ນ ​ເມື່ອເດືອນມັງກອນ
​ທີ່​ຜ່ານ​ມາ​ ຊຶ່ງ​ພາ​ໃຫ້​ທາງ​ສະພາແຫ່ງ​ຊາດ​ຕ້ອງ​ໄດ້​ດັດ​ແປງ​ແກ້​ໄຂກົດໝາຍ​ວ່າ​ດ້ວຍອາດຊະ
ຍາ​ກຳ​ສົງຄາມ​ໃໝ່. ກົດໝາຍ​ດັ່ງກ່າວ​ນີ້ ຊຶ່ງປະຈຸ​ບັນ​ ອະນຸຍາດ​ໃຫ້​ລັດຖະບານ​ຂໍ ອຸທອນ​ໄດ້
ຕໍ່​ການ​ຕັດສິນ​ໂທດ​ໃດໆ​ກໍ​ຕາມ ທີ່​ເຫັນ​ວ່າ ​ເປັນ​ການ​ບໍ່​ພຽງພໍຫລື​ບໍ່ເໝາະ​ສົມ​ເທົ່າ​ທີ່​ຄວນ​.

​ມີ​ຫຼາຍ​ກວ່າ 100 ຄົນ​ ​ເສຍ​ຊີວິດ ​ໃນ​ການ​ປະ​ທ້ວງ​ທີ່​ດຳ​ເນີນມາ​ເປັນ​ເວລາ​ຫຼາຍໆ​ເດືອນ​ແບບ​
ຕໍ່​ເນືອງ ​ໃນ​ຕົ້ນ​ປີ​ນີ້.

ການ​ຕັດສິນ​ໂທດ​ທ່ານ Mollah ນີ້ ​ແມ່ນ​ເປັນ​ການ​ຕັດສິນຄັ້ງ​ທໍາ​ອິດ​ ຂ​ອງສານອາດ​ຊະ​ຍາ​ກໍາ​
ສົງຄາມ.