ຜູ້ພິພາກສາ ໃນບັງກລາແດັສ ໄດ້ຕັດສິນໂທດປະຫານຊີວິດ
ຫົວໜ້າພັກອີສລາມທີ່ໃຫຍ່ສຸດຂອງປະເທດ ໃນຖານກໍ່ອາຊະ
ຍາກຳສົງຄາມ.
ຄະນະຜູ້ພິພາກສາ 3 ຄົນ ຂອງສານພິເສດ ໃນນະຄອນ Dhaka
ໄດ້ອອກຄຳພິພາກສາ ທີ່ມີການລໍຄອຍມາດົນນານແລ້ວ ໃນວັນພຸດ
ມື້ນີ້ ໃຫ້ແຂວນຄໍ ທ່ານ Motiur Rahman Nizami ໄວ 71 ປີ
ທີ່ເປັນອະດີດລັດຖະມົນຕີ ໃນຄະນະລັດຖະບານນັ້ນ. ໃນເດືອນ
ມິຖຸນາຜ່ານມາ ທາງສານໄດ້ເລື່ອນການອອກຄຳພິພາກສາ
ຫຼັງຈາກເຈົ້າໜ້າທີ່ການແພດ ລະບຸວ່າ ທ່ານ Nizami ມີສຸຂພາບ
ບໍ່ຄ່ອຍແຂງແຮງພໍທີ່ຈະໄປປາກົດຕົວທີ່ສານໄດ້.
ທ່ານ Nizami ຊຶ່ງເປັນຜູ້ນຳພາພັກຫົວຮຸນແຮງ Jamaat-e-Islami ໄດ້ຖືກຟ້ອງໃນຂໍ້ຫາ ຂ້າລ້າງເຊື້ອຊາດເຜົ່າພັນ ຄາດຕະກຳ ທໍລະມານ ຂົ່ມຂື່ນສຳເລົາ ແລະທຳລາຍຊັບສິນ ໃນບົດບາດຂອງທ່ານ ລະຫວ່າງສົງຄາມ ເປັນເວລາ 9 ເດືອນ ເພື່ອຄວາມເປັນເອກກະ ລາດຈາກປາກີສຖານ ໃນປີ 1971 ນັ້ນ.
ບັງກລາແດັສ ກ່າວວ່າ ຜູ້ຮ່ວມມືໃນເຂດທ້ອງຖິ່ນ ແລະທະຫານປາກີສຖານ ໄດ້ສັງຫານຜູ້ຄົນ 3 ລ້ານຄົນ ຂົ່ມຂື່ນສຳເລົາແມ່ຍິງ 200 ພັນຄົນແລະເຮັດໃຫ້ຜູ້ຄົນ 10 ລ້ານຄົນ ຕ້ອງອົບພະຍົບຫລົບໄພ ໄປສູ່ສູນອົບພະຍົບ ໃນປະເທດອິນເດຍ ທີ່ເປັນເພື່ອນບ້ານ. ກຸ່ມ Jamaat-e-Islami ບໍ່ເຫັນດ້ວຍໃນການແບກແຍກຕົວອອກເປັນເອກກະລາດ.
ນາຍົກລັດຖະມົນຕີບັງກລາແດັສ ທ່ານນາງ Sheikh Hasina ໄດ້ຈັດຕັ້ງສານພິເສດຂຶ້ນທີ່ໄດ້ຕັດສິນລົງໂທດບັນດາຜູ້ນຳພັກຝ່າຍຄ້ານຢ່າງນ້ອຍ 10 ຄົນ ໃນຖານເປັນອາຊະຍາກອນສົງຄາມ ນັບຕັ້ງແຕ່ໄດ້ມີການສ້າງຕັ້ງຂຶ້ນ ໃນປີ 2010.