ພະສົງສາສະໜາຮິນດູຄົນນຶ່ງ ໄດ້ຖືກສັງຫານ ໃນວັນຈັນວານນີ້ ໃນອັນທີ່ຕຳຫຼວດຢ້ານກົວວ່າ ຈະເປັນການໂຈມຕີເທື່ອຫຼ້າສຸດ ຕໍ່ສາສະໜາຮິນດູ ໃນ Bangladesh ທີ່ຜູ້ຄົນສ່ວນໃຫຍ່ນັບຖືສາສະໜາອິສລາມນັ້ນ.
ພະສົງສາສະໜາຮິນດູ ໄວ 70 ປີ ທ່ານ Ananda Gopal Ganguly ໄດ້ຖືກພົບເຫັນເສຍຊີວິດໃກ້ໆກັບເຮືອນຂອງທ່ານ ທີ່ບ້ານ Noldanga ບໍ່ເທົ່າໃດຊົ່ວໂມງ ຫຼັງຈາກທ່ານຫາຍສາບສູນໄປ ຊຶ່ງໄດ້ຮັບລາຍງານວ່າ ພະອົງນີ້ ແມ່ນກຳລັງເດີນທາງໄປພາວະນາໃນຕອນເຊົ້ານັ້ນ.
ສົບທີ່ເກືອບວ່າຖືກຕັດຂາດນັ້ນ ແມ່ນຄ້າຍຄືກັນກັບຊາວຮິນດູ ແລະຊາວຄຣິສ ໃນທົ່ວປະເທດ ທີ່ຖືກຟັນ ຈົນຕາຍ ໂດຍກຸ່ມຫົວຮຸນແຮງອິສລາມນັ້ນ.
ມີຫຼາຍກວ່າ 40 ຄົນແລ້ວ ໄດ້ຖືກສັງຫານ ໃນການໂຈມຕີທີ່ຄ້າຍຄືກັນນີ້ ໃນຮອບ 3 ປີ ຜ່ານມາ ແລະຄວາມຮຸນແຮງແມ່ນນັບມື້ ນັບທະວີຂຶ້ນ ໃນຮອບສອງສາມເດືອນຜ່ານມານີ້. ມີຊາວຄຣິສຄົນໄດ້ຖືກທຸບຕີຈົນຕາຍ ພຽງ 2 ມື້ກ່ອນໜ້ານີ້ ຫຼັງຈາກທີ່ລາວໄດ້ສູດມົນພາ ວະນາປະຈຳວັນອາທິດ ໃນພາກຕາເວັນຕົກສຽງເໜືອຂອງປະເທດ.
ນັກເຄື່ອນໄຫວເລື້ອງສິດທິຂອງພວກຮັກຮ່ວມເພດ ບັນດາອາຈານສອນທີ່ບໍ່ຝັກໄຝ່ໃນເລື້ອງ ສາສະໜາ ແລະພວກນັກຂຽນຂ່າວທາງອິນເຕີເນັດ ແມ່ນຮວມຢູ່ໃນພວກເຄາະຮ້າຍທີ່ວ່ານີ້.
ພວກຫົວຮຸນແຮງຂອງກຸ່ມລັດອິດລາມ 3 ຄົນ ມີລາຍງານວ່າ ໄດ້ຖືກສັງຫານ ໃນການປະທະ ກັບພວກຕຳຫຼວດ ທີ່ນະຄອນຫຼວງ Dhaka ໃນວັນອັງຄານມື້ນີ້ ໃນຂະນະທີ່ກອງກຳລັງຕຳຫລວດແຫ່ງຊາດ ພະຍາຍາມທີ່ຈະປາບປາມກຸ່ມຫົວຮຸນແຮງທີ່ສ່ວນໃຫຍ່ຖືກຖິ້ມໂທດໃສ່ ວ່າເປັນຜູ້ຮັບຜິດຊອບ ໃນການໂຈມຕີທີ່ວ່ານີ້.
ກຸ່ມລັດອິສລາມແລະກຸ່ມ al-Qaida ໄດ້ອອກມາອ້າງເອົາຄວາມຮັບຜິດຊອບ ໃນການໂຈມຕີຫຼາຍຄັ້ງ, ແຕ່ວ່າ ເຈົ້າໜ້າທີ່ Bangladesh ຍັງສືບຕໍ່ຢືນຢັນວ່າ ບໍ່ມີກຸ່ມກໍ່ການຮ້າຍຕ່າງ ປະເທດ ປະຕິບັດງານໃນປະເທດຕົນ ເຈົ້າໜ້າທີ່ກັບກ່າວປະນາມພວກຫົວຮຸນແຮງທ້ອງຖິ່ນ ຫຼືບໍ່ກໍພວກພວກຝ່າຍຄ້ານທາງການເມືອງນັ້ນແທນ.
ເຖິງແມ່ນວ່າ ໃນທາງການແລ້ວ ແມ່ນເປັນປະເທດທີຕ່ບໍ່ຝັກໄຝ່ໃນສາສະໜາ ແຕ່ປະມານ 90 ເປີເຊັນ ຊາວ Bangladesh ແມ່ນນັບຖືສາສະໜາອິສລາມ.
ກະລຸນາອ່ານຂ່າວນີ້ເພີ້ມຕື່ມເປັນພາສາອັງກິດ
