ຕຳຫຼວດປາບຈະລາຈົນຂອງ Bahrain ໄດ້ພາກັນບຸກເຂົ້າ
ໄປໃນບໍລິເວນຈະຕຸລັດໃຫຍ່ ທີ່ນະຄອນຫຼວງ Manama
ໃນຕອນເຊົ້າຂອງວັນພະຫັດມື້ນີ້ ເພື່ອຂັບໄລ່ພວກປະທ້ວງ
ຈຳນວນຫຼາຍພັນຄົນທີ່ຕັ້ງຄ້າຍຂຶ້ນຢູ່ທີ່ນັ້ນ ເພື່ອທວງໃຫ້ມີ
ການປ່ຽນແປງທາງດ້ານການເມືອງ ໃນຂອບເຂດທີ່ກວ້າງ
ຂວາງສຳລັບປະເທດເກາະດອນແຫ່ງນີ້. ພວກທີ່ເຫັນເຫດ
ການກ່າວວ່າ ມີຜູ້ເສຍຊີວິດຢ່າງນ້ອຍ 4 ຄົນ.
ກຳລັງຮັກສາຄວາມສະຫງົບ ຂອງ Bahrain ໄດ້ເຄື່ອນ
ເຂົ້າໄປໃນບໍລິເວນຈະຕຸລັດ Pearl ໃນຕອນເຊົ້າມືດມື້ນີ້
ພ້ອມກັບຍິງລະເບີດນໍ້າຕາ ລະເບີດມືສຽງດັງແລະລູກປືນຢາງເພື່ອຂັບໄລ່ພວກປະທ້ວງ
ຊຶ່ງສ່ວນໃຫຍ່ແລ້ວ ເປັນພວກທີ່ນັບຖືສາສະໜາອິດສະລາມນິກາຍຊີໄອທ໌ ຮວມທັງແມ່
ຍິງແລະເດັກນ້ອຍ ທີ່ໄດ້ພາກັນເຂົ້າໄປຢຶດເອົາບໍລິເວນຈະຕຸລັດດັ່ງກ່າວ ມາແຕ່ມື້ວັນອັງ
ຄານ. ມີຫຼາຍໆຄົນໄດ້ຮັບບາດເຈັບແລະຖືກສົ່ງໄປຮັບການພະຍາບານທີ່ໂຮງໝໍໃນເຂດ
ທ້ອງຖິ່ນ.
ມີກຳລັງລາດຕະເວນປະກອບອາວຸດ ແລະລົດຖັງ ຢູ່ຕາມຖະໜົນຫົນທາງສາຍຕ່າງໆໃນ
ຕອນເຊົ້າຂອງວັນພະຫັດມື້ນີ້ ຂະນະທີ່ພວກຕຳຫຼວດທຳການມ້າງຕູບຜາຕັ້ງ ທີ່ພວກປະ
ທ້ວງປະໄວ້ ແລະບໍລິເວນຈະຕຸລັດເກືອບວ່າຫວ່າງເປົ່າ ນອກຈາກຜູ້ຄົນຈຳນວນນຶ່ງທີ່ຖືກ
ຕຳຫຼວດສອບຖາມ.
ກຳລັງຮັກສາຄວາມສະຫງົບບໍ່ໄດ້ເຮັດຫຍັງໃນວັນພຸດວານນີ້ຂະນະທີ່ພວກປະທ້ວງຫຼາຍ
ສິບພັນຄົນໄປຮວມໂຕກັນເພື່ອທໍາການໂຮມຊຸມນຸມ ຊຶ່ງເຮັດໃຫ້ການປະທ້ວງຮຽກຮ້ອງ
ເອົາປະຊາທິປະໄຕມີການຂະຫຍາຍໂຕຢ່າງໃຫຍ່. ຕົກມາໃນຕອນກາງຄືນ ຝູງຊົນທີ່ມ່ວນ
ຊື່ນດີອົກດີໃຈ ໃນບໍລິເວນຈະຕຸລັດ Pearl ໄດ້ເພີ້ມຈຳນວນຂຶ້ນຢ່າງຫຼວງຫຼາຍ ລຸນຫຼັງທີ່
ໄດ້ມີການປະທ້ວງຢ່າງສັນຕິມາຕະຫຼອດມື້. ກ່ອນໜ້ານັ້ນ ພວກປະທ້ວງຫຼາຍຮ້ອຍຄົນ
ໄດ້ໄປຮ່ວມຂະບວນແຫ່ເພື່ອໄວ້ອາໄລໃຫ້ພວກປະທ້ວງ 2 ຄົນທີ່ເສຍຊີວິດ ນັບແຕ່ມື້ວັນ
ຈັນເປັນຕົ້ນມາ.
