ປະຊາຊົນ ບາຫ໌ເຣນ ຈໍານວນຫລາຍພັນຄົນພາກັນເດີນຂະ
ບວນຕໍ່ຕ້ານລັດຖະບານເປັນມື້ທີ 3 ລຽນຕິດໃນນະຄອນ
ຫລວງ Manama ບ່ອນທີ່ພວກປະທ້ວງຫລາຍຄົນໄດ້ໄປ
ຮ່ວມພິທີສົ່ງສະການພວກປະທ້ວງຄົນທີສອງທີ່ຖືກຕໍາ
ຫລວດຍິງຕາຍໃນມື້ກ່ອນນັ້ນ.
ພວກນັກເຄື່ອນໄຫວຢ່າງນ້ອຍຈໍານວນ 2 ພັນຄົນຊຶ່ງສ່ວນ
ຫລາຍເປັນຊາວ Shi’ite ໄດ້ເຂົ້າຍຶດຄອງຈະຕຸລັດ Pearl
ໃນນະຄອນຫລວງ Manama ໃນວັນພຸດມື້ນີ້ ຫລັງຈາກ
ຈັດຕັ້ງຄ້າຍຕູບຜ້າໃບຂຶ້ນໃນວັນອັງຄານວານນີ້ ແລະໄດ້ພາກັນຄ້າງຄືນທໍາອິດຢູ່ກາງແຈ້ງ. ບ່ອນປະທ້ວງດັ່ງກ່າວ
ນີ້ແມ່ນສະທ້ອນໃຫ້ເຫັນເຖິງການຄວບຄຸມຈະຕຸລັດ Tahrir ໃນກຸງໄຄໂຣ ຂອງພວກນັກ
ເຄື່ອນໄຫວອີຈິບ ທີ່ໄດ້ຂັບໄລ່ປະທານາທິບໍດີປະເທດຂອງເຂົາເຈົ້າໃຫ້ລາອອກຈາກຕໍາ
ແໜ່ງໄປໃນສັບປະດາຜ່ານມາ ຫລັງຈາກທໍາການລຸກຮືຂຶ້ນເປັນເວລາ 18 ມື້.
ພວກປະທ້ວງ Bahrain ໄດ້ໄປຮ່ວມຂະບວນແຫ່ສົບ ຊາຍຖືສາສະ ໜາອິສລາມນິກາຍ Shi’ite ຄົນນຶ່ງທີ່ຖືກຕໍາຫລວດຍິງຕາຍໃນວັນອັງຄານວານນີ້ ເວລາພວກໄວ້ທຸກພາກັນໄປໂຮມຊຸມນຸມໃນນະຄອນຫລວງ Manama ໃນພິທີສົ່ງສະການຜູ້ປະທ້ວງນິກາຍ Shi’ite ອີກຄົນນຶ່ງທີ່ໄດ້ເສຍຊີວິດໃນການປະທະກັນກັບພວກຕໍາຫລວດໃນມື້ກ່ອນນັ້ນ.
ພວກປະທ້ວງຫລາຍຄົນທີ່ຈະຕຸລັດ Pearl ກັນໃຫ້ຄໍາໝັ້ນສັນຍາວ່າ ຈະພາກັນຢູ່ທີ່ນັ້ນຕໍ່ໄປ
ຈົນກວ່າເຂົາເຈົ້າບັນລຸເປົ້າໝາຍຂອງເຂົາເຈົ້າ. ພວກປະທ້ວງບາງຄົນພາກັນຮຽກຮ້ອງໃຫ້ຂັບ
ໄລ່ລາດຊະວົງ Sunni ຊຶ່ງເປັນຊົນກຸ່ມນ້ອຍທີ່ຄອງອໍານາດໃນປະເທດເກາະດອນໃນອ່າວເປີ
ເຊຍແຫ່ງນີ້ ໃນຂະນະດຽວກັນພວກປະທ້ວງອີກຈຳນວນນຶ່ງກໍພາກັນຮຽກຮ້ອງໃຫ້ນາຍົກລັດ
ຖະມຸນຕີ Sheik Khalifa bin Salman Al Khalifa ທີ່ຄອງອໍານາດມາເປັນເວລາດົນ
ນານນັ້ນ ລາອອກຈາກຕໍາແໜ່ງ.
ກະສັດ Hamad bin Isa al-Khalifa ແຫ່ງ Bahrain ໄດ້ຊົງໃຫ້ພະລາດຊະໂອວາດທາງໂທລະພາບທີ່ບໍ່ສູ້ມີມາກ່ອນໃນວັນອັງຄານວານນີ້ ໂດຍສະແດງຄວາມເສົ້າໂສກພະໄທນໍາການເສຍຊີວິດໄປຂອງພວກປະທ້ວງຊາວ Shi’ite 2 ຄົນນັ້ນ ແລະຊົງໃຫ້ຄໍາໝັ້ນສັນຍາວ່າ ຈະທໍາການສືບສວນສອບສວນກ່ຽວກັບເຫດການທີ່ວ່ານີ້. ນອກນັ້ນພະອົງຍັງຊົງໃຫ້ຄໍາໝັ້ນສັນຍາເຊ່ນກັນທີ່ຈະສືບຕໍ່ການປະຕິຮູບດ້ານການເມືອງຕ່າງໆຕໍ່ໄປຊຶ່ງພະອົງໄດ້ຊົງລິເລີ້ມດ້ວຍການລົງປະຊາມະຕິໃນປີ 2001 ຊຶ່ງໄດ້ມີການຟື້ນຟູລັດຖະສະພາ ໃນປີຕໍ່ມານັ້ນ.
