ລິ້ງ ສຳຫລັບເຂົ້າຫາ

ພວກ​ທີ່​ເຫັນ​ເຫດການ​ເກີດ​ຂຶ້ນ​ໃນ​ນະຄອນຫລວງ Mana-
ma ຂອງ​ບາຫ໌​ເຣນກ່າວ​ວ່າ ກໍາລັງ​ຮັກສາ​ຄວາມ​ປອດ​ໄພ​
ໄດ້​ສັງຫານ​ພວກ​ປະ​ທ້ວງ 2 ຄົນຫຼັງ​ຈາກ​ທໍາ​ການ​ບຸກ​ເຂົ້າ​
ໄປ​ຄ້າຍ​ຂອງ​ພວກ​ປະ​ທ້ວງ​ນິຍົມ​ປະຊາທິປະ​ໄຕ​ທີ່​ຈັດ​ຕຸ​ລັດ​
ໃຫຍ່​ແຫ່ງ​ນຶ່ງ​ໃນ​ນະຄອນຫລວງ​ນັ້ນ.

ພວກ​ກໍາລັງ​ຮັກສາ​ຄວາມ​ປອດ​ໄພ​ໄດ້​ຍິງ​ແກ​ສນໍ້າຕາ​ໃນ​ວັນ
ພຸດ​ມື້​ນີ້ເພື່ອຂັບໄລ່​ພວກ​ປະ​ທ້ວງ​ທີ່​ພາກັນ​ພັກ​ແຮມຢູ່​ໃນ​ຈັດ​
ຕຸ​ລັດ Pearl ນັ້ນ.

ຕາໜ່າງຂ່າວ CNN ລາຍ​ງານ​ໃຫ້​ຮູ້​ວ່າ ​ໄດ້​ຍິນ​ສຽງ​ປືນ​ດັງ​ຂຶ້ນ​ໃນ ລະຫວ່າງ​ການ​ປະ​ທະ​ກັນ​ນັ້ນ ຊຶ່ງ​ໄດ້​ເຮັດ​ໃຫ້​ຜູ້​ຄົນ​ໄດ້​ຮັບບາດ​ເຈັບຫລາຍ​ຄົນ.

ການ​ປະ​ທະ​ກັນ​ໃນ​ວັນ​ພຸດ​ມື້​ນີ້ ມີ​ຂຶ້ນ​ໃນ​ເວລາ 1 ມື້​ຫລັງ​ຈາກ​ໄດ້​ມີ​ການ​ສູ້​ລົບ​ກັນ​ຕາມ​ຖະໜົນ​ຫົນທາງ​ລະຫວ່າງ​ຕໍາຫລວດ​ກັບ​ພວກ​ນັກ​ເຄື່ອນ​ໄຫວ​ນິຍົມ​ປະຊາທິປະ​ໄຕ ຊຶ່ງ​ໄດ້​ເຮັດ​ໃຫ້​ຜູ້​ຄົນ​ເສຍ​ຊີວິດ​ໄປ​ຢ່າງ​ນ້ອຍ 2 ຄົນ​ແລະ​ບາດ ​ເຈັບ​ຕື່ມ​ອີກ​ຫລາຍ​ຮ້ອຍ​ຄົນ.

ລັດຖະບານ​ໄດ້​ປະກາດ​ໃຊ້​ກົດ​ພາວະ​ສຸກ​ເສິນ​ເພື່ອ​ພະຍາຍາມ​ຢຸດເຊົາການ​ລຸກ​ຮື​ຂຶ້ນ​ຕໍ່ຕ້ານ​ລັດຖະບານ​ນີ້.

ໂທລະ​ພາຍ​ແຫ່ງ​ຊາດ​ບາຫ໌​ເຣນ ກ່າວ​ໃນ​ວັນ​ອັງຄານ​ວານ​ນີ້​ວ່າ ກະສັດ Hamad bin Isa al-Khalifa ​ໄດ້​ສັ່ງ​ໃຫ້​ຜູ້​ບັນຊາ​ການ​ກອງທັບ​ແຫ່ງ​ຊາດ​ເອົາ​ມາດ​ຕະການ​ທີ່​ເໝາະ​ສົມ​ເພື່ອ​ປົກປັກຮັກສາ​ປະ​ເທດ​ຊາດ​ໄວ້​ບໍ່ໃຫ້​ພວກ​ປະ​ທ້ວງເຂົ້າຢຶດ ​ທີ່​ພະ​ອົງ​ຊົງ​ກ່າວ​ຫາ​ວ່າ ສ້າງ​ຄວາມ​ຢ້ານ​ກົວໃຫ້​ແກ່​ປະຊາຊົນ​ນັ້ນ.

ໃນ​ວັນ​ຈັນ​ຜ່ານ​ມາ​ນີ້ ກະ​ສັດບາຫ໌ເຣນ​ໄດ້​ຊົງ​ອະນຸຍາດ​ໃຫ້​ພວກ​ທະຫານ​ຊາ​ອດີ​ອາຣາ​ເບຍ​ປະມານ 1 ພັນ​ຄົນ​ແລະ​ຕໍາຫລວດ​ຈາກສະຫະຣັດອາ ຣັບ Emirates ​ເຂົ້າ​ໄປ​ປົກ​ປ້ອງ​ພວກ​ຕຶກ​ອາຄານ​ແລະ​ຫ້ອງການ​ຕ່າງໆ​ຂອງ​ລັດຖະບານ.

ພວກ​ປະ​ທ້ວງ​ຫລາຍ​ພັນ​ຄົນ​ພາກັນ​ເດີນຂະບວນໄປຍັງ​ສະຖານທູດ ຊາ​ອຸ​ດີ​ອາຣາ​ເບຍ​ໃນ​ກຸງ Manama ​ໂດຍ​ເອີ້ນ​ການ​ມີໜ້າ​ຂອງ​ພວກ​ກໍາ​ລັງ​ຕ່າງປະ​ເທດ​ເຫລົ່າ​ນີ້​ວ່າ ​ເປັນ​ການ​ເຂົ້າ​ຍຶດຄອງ​ປະ​ເທດ​ນັ້ນ.

XS
SM
MD
LG